(بەس جاستاعى ءبۇلدىرشىننىڭ ومىرىنە قيانات جاسالىپ وتىر.)
ماعان ءبىر اتا-انا جىلاپ، امالدارى قۇرىعاننان كومەك سۇراپ كەلدى. ول ءوزىنىڭ باسىنداعى جاعدايمەن تانىستىرىپ، بولعان وقيعانىڭ بارلىعىن ايتىپ بەردى. اتى ءجونى ەربول ءابدىروۆ. جالپى جاعداي بىلاي بولعان:
وسىدان بىرنەشە ۋاقىت بۇرىن ونىڭ بەس جاسار ۇلى نۇريسلامدى ءوزىنىڭ ءۇيىنىڭ تۇسىندا مەملەكەتتىك نومەرى «رەنو» 521 NXA01 اۆتوكولىگى قاعىپ كەتەدى. وقيعا ورنىندا بالانىڭ ءبىر اياعى مەن قول تۇسىنداعى بۇعانا سۇيەگى سىنعان. «رەنو» اۆتوكولىگىنىڭ يەسى ش.ت. نەسىپباي وقيعا بولعان جەردە بالانى جولدىڭ شەتىنە شىعارىپ تاستاپ، ءوزى ءىزىن سۋىتادى. بالانى كەيىننەن ءوزىنىڭ اتا-اناسى كورىپ قالىپ، جانۇشىرا استانا قالاسىنداعى №2 قالالىق اۋرۋحاناعا جەتكىزەدى. ابىروي بولعاندا بالا امان قالىپ، اۋرۋحانادا بالانىڭ اياعى مەن قولىنا مەديتسينالىق جەدەل جاردەم جاسالادى. بالا اۋرۋحانادا ءبىراز ۋاقىت جاتىپ، ەمدەلىپ شىعادى. بىراق بالانىڭ بۇعانا سۇيەگى قيسىق سالىنىپ، سول بويى ءبىتىپ كەتكەن. قازىر بالانىڭ قول سۇيەگى قيسىق. باسىنا اۋىر سوققى كەلىپ، ميىنىڭ شايقالۋ بەلگىلەرى (سوترياسەنيە) بار. اقىل ەسى ورنىندا. بەس جاسار بالا قازىر اتا اناسىنىڭ قولىندا. وقيعا ورنىندا بولعان جاعدايدىڭ بارلىعى سول جەردەگى دۇكەننىڭ بەينەكامەراسىنا ءتۇسىپ قالادى. مەن بەينەكامەرادا وقيعانىڭ قالاي بولعانىن سالىپ وتىرمىن. تومەندە بەينەكامەرادان ءوز كوزىڭىزبەن كورىڭىز.
مەن بالانىڭ اتا-اناسىمەن كەزدەسىپ، حال-جاعدايلارىنىڭ بارلىعىنا كوز جەتكىزدىم. بالانىڭ جاعدايىن ءوز كوزىممەن بارىپ كورىپ، جاعدايىن ءبىلىپ، اياعى مەن قولىن دا قاراپ كوردىم. وتباسىنىڭ الەۋمەتتىك حال-احۋالىنا كەلەر بولساق، الەۋمەتتىك جاعىنان جاعدايى تومەن، قاراجات جاعىنان ابدەن قىسىلعان جاس وتباسى ەكەن. استانادا لەرمونتوۆ كوشەسىنىڭ بويىندا №39 ۇيدە پاتەر جالداپ تۇراتىن اۋىلدىڭ قارا قازاعى. نۇريسلامنىڭ اكەسى ەربولدىڭ دەنساۋلىعى ناشار، ەر-ازامات جاسايتىن جۇمىستىڭ ەشبىرىنە جارامايتىن بولىپ شىقتى. ال اناسى راۋشان بولسا كولىك جۋاتىن ورىندا (اۆتومويكادا) اۋرىپىمدەپ جۇمىس جاساپ، جان باعىپ، بالالارىن اسىراپ وتىر ەكەن. مىناۋ جاعدايدان ەسىن جيناي الماعان جاس وتباسىندا وتاعاسى جۇمىس تابا الماي، كۇنىن ارەڭ كورىپ جاتىر. ءبىز دە قولدان كەلگەنشە تانىس ازاماتتارعا ايتىپ، قاراجات جاعىنان كومەك كورسەتتىك. وقىس جاعداي بۇل وتباسىنىڭ اۋىرتپالىعىنىڭ ۇستىنە سالماق سالىپ، ەڭسەلەرىن باسىپ وتىر. نە ارى، نە بەرى ەمەس، تىرشىلىكتەرىن جاساي الماي جاتقان وتباسى.
مەن ەندى ودان كەيىن جاعدايدىڭ قالاي وربىگەنىن تۇسىندىرەيىن. وسى وقيعادان كەيىن بالانىڭ اتا-اناسى ءىستى تەكسەرتۋ بويىنشا استانا قالالىق، بايقوڭىر ىشكى ىستەر باسقارماسىنا ارىزدانادى. قۇزىرلى ورگاندار تەكسەرىس جۇرگىزىپ، بالانى كولىكپەن قاعىپ، ءىزىن سۋىتقان ش.ت. نەسىپبايدى قولعا تۇسىرەدى. ءىستىڭ جاي جاپسارىن وزدەرىنشە تەكسەرەدى. ولار ءىستى قاراپ جۇرگەندە ارادا ءۇش اي ۋاقىت ءوتىپ كەتەدى. ءىستىڭ اياقتالماۋى جاس وتباسىنى اۋرە-سارساڭعا سالىپ قويادى. بالانىڭ اتا اناسى وسى ءىستىڭ سوڭىندا جۇگىرۋمەن كۇنىن وتكىزەدى. اتا انا بۇل ءىستى جارتى جولدا قالدىرماي، اقىرىنا دەيىن جەتكىزىپ، ادىلدىكتى تالاپ ەتەدى. ءسويتىپ وقيعا ورىن العان ورىندا تەحنيكالىق تەكسەرۋ جاساتادى. وقيعاعا بايلانىستى ارنايى تەكسەرۋ مەن سوت-ەسپەرتيزالىق ساراپتاما جاسالادى. ارنايى ماماندار مەن تەحنيكالىق ەكسپەرتتەردىڭ ارالاسۋىمەن وقيعا بولعان ورىندا وقيعانىڭ ورىن العانى بويىنشا سحەمالار جاسالادى. ناتيجەسىندە ادىلدىك كۇتكەن اتا-انا ءۇشىن ءىس 180 گرادۋسقا وزگەرگەن. قۇزىرلى ورگانداردىڭ قىزمەتكەرلەرى بەس جاسار نۇريسلامدى قاعىپ، جولدىڭ شەتىنە تاستاپ كەتىپ، ومىرىنە اسا اۋىر زاقىم كەلتىرسە دە، سوت-ەكسپەرتيزالىق ساراپتاما بويىنشا دا الگى ش.ت. نەسىپبايدى كىناسىز ەتىپ اقتاپ شىعادى. قۇزىرلى ورگانداردىڭ تاراپىنان جاس وتباسىعا كومەك بولمايدى. ءىستىڭ بارلىعى سوڭىنا دەيىن وسىلاي بىتەدى.
جاعدايدان تولىق حاباردان بولعاننان سوڭ مەن نۇريسلمانىڭ اكەسى ەربولمەن بىرگە استانا قالالىق، بايقوڭىر ىشكى ىستەر بولىمىنە بارىپ، بولعان جاعدايدىڭ قالاي ورىن العانىن كوزبەن كورمەك بولىپ تەرگەۋشىمەن جۇمىس ورنىندا ارنايى كەزدەستىم. تەرگەۋشى ماعان جول اپاتىنىڭ قانداي جولمەن وربىگەنى بويىنشا وقيعا سحەماسىن جايىپ ءتۇسىندىردى. سونداعى ايتقانى، كولىك جۇرگىزۋشىسىنىڭ ايتۋى بويىنشا كولىكتىڭ جىلدىمدىعى 20كم/ساعات بولعانى انىقتالىپتى. بۇل جىلدامدىق نورمادان ەشقانداي دا ارتىق بولىپ سانالماپتى. بۇل جەردە ەشقانداي دا قىلمىستىڭ نىشانى جوق ەكەن-مىس. وسى جىلدامدىقپەن كەلگەن كولىك بالانىڭ اياعى مەن قولىن سىندىرىپ كەتكەن. باسىنا زاقىم كەلتىرگەن. بىراق ءجاسوسپىرىم بالانىڭ كامەلەتكە تولماعانىن ەسكەرمەي، كولىكپەن قاعىپ، اياعى مەن قولىن سىندىرعان كولىك جۇرگىزۋشىسىنىڭ جاساعان قىلمىسىن ەسكەرگەن جوق. مەن ءىس قاعازدارىنىڭ كەرەكتىلەرىن فوتوعا ءتۇسىرىپ الىپ، ەشقانداي كونفليكتىگە كەلمەي، اڭگىمەنى اياقتاپ شىعىپ كەتتىم. ارنايى جاسالعان تەكسەرىس پەن سوت-ەكسپەرتيزالىق ساراپتامانىڭ قورىتىندىسىنىڭ فوتوكوشىرمەلەرى، پروتوكولدار، راپورتتاردىڭ فوتوكوشىرمەلەرى مەنىڭ قولىمدا بار.
ءبىر «اتتەڭ-اي» دەيتىنى، بالانىڭ اتا اناسى ورىس ءتىلىن تۇسىنبەيتىن بولىپ شىقتى. ول قازاقشا تالاپ ەتسە دە ءىس قاعازدارىنىڭ بارلىعى ورىسشا جاسالىپتى. بۇل جەردە قۇزىرلى ورگاندار تاراپىنان تاعى دا قاتەلىك كەتىپ وتىر. وسى شەشىمنەن كەيىن بالانىڭ اتا اناسى ارى بەرى جۇگىرىپ، ادىلدىك تاپپاي ۇمىتتەرىن ۇزەدى. سونداعى ءبىر ماسقاراسى، الگى بالانى قاعىپ، جولدىڭ شەتىنە تاستاپ كەتكەن ونىڭ اتا اناسىنا كەلىپ كەشىرىم دە سۇراماعان، تىم بولماسا ازىراق كومەگىم بولسىن دەپ قاراجات جاعىنان دا كومەك بەرمەي، قايتا وزدەرىنە كەلىپ «مەنىڭ ەشقانداي كىنام جوق، مەن تازامىن» دەپ كەتكەن. جاس وتباسى مىناۋ جاعدايدىڭ وسىلاي جالعاسقانىنا كۇيىنىپ، شارا جاساۋ قولدارىنان كەلمەي وتىر. بۇل وقيعانىڭ ورىن العانىنا ءۇش ايدىڭ ءجۇزى بولىپتى. بىراق ادىلەت ىزدەگەن اتا انا شىندىقتى اقتاپ الا الماي، شىپ-پىر بولىپ وتىر. ءىستىڭ وڭىنان شەشىمىن تابارىنان ولاردىڭ ءۇمىتى مۇلدەم ۇزىلگەن.
مەن مىناۋ وقيعانى نۇريسلامنىڭ اكەسى ەربولدىڭ ءوتىنىشى بويىنشا ءادىل شەشىمىن تابۋى ءۇشىن كوپشىلىكتىڭ ورتاسىنا شىعارۋعا بەل بۋدىم. قوعامنىڭ حاباردار بولىپ، ادىلەت ىزدەگەن اتا انانىڭ زارىن كوپشىلىككە ءبىلسىن. جاناشىر ازاماتتار تابىلىپ جاتسا زاڭ اياسىندا كومەگىن بەرسىن دەگەن وي. مەنى تاڭ قالدىرىپ وتىرعانى، كامەلەتكە تولماعان ءجاسوسپىرىمنىڭ ومىرىنە اۋىر جاعدايدا قيانات جاسالىپ وتىرسا دا قۇزىرلى ورگاندار نەگە بالانى كولىكپەن قاعىپ، اياق قولىن سىندىرىپ، جولدىڭ شەتىنە تاستاپ ءىزىن سۋىتىپ كەتكەن ادامدى اقتاپ شىعىپ وتىرعانى. ەڭ اۋىر ءتيىپ وتىرعانى دا وسى. ءبىزدىڭ ەلدە ادام ءومىرى تۇككە تۇرعىسىز بولىپ بارا جاتقانى بارىڭىزگە دە بەلگىلى. ءبىز ەندى وسىلاي سابىر ساقتاپ، ارەكەتسىز وتىرا بەرەمىز بە؟ ءبىز ادام ءومىرى مەن ادام قۇقىن ساقتاماي، قالاي دامىعان ەلدەردىڭ قاتارىنا قوسىلامىز؟ شاراسى قالماعان جاس وتباسىعا از دا بولسىن كومەك بولسىن دەگەن ماقساتتا ورىن العان جاعدايدى، الەۋمەتتىك جاعىنان اقساپ وتىرعان جاس وتباسىنىڭ جانايقايىن ورتاعا سالىپ وتىرمىز. ءبىزدىڭ ورتامىزدا بەلگىلى زاڭگەرلەر، ازاماتتار، جاناشىر ادامدار بار. بەلسەندى ازاماتتاردان وسى وتباسىعا زاڭ بويىنشا كومەك بولىپ جاتسا، بۇل ءىستىڭ قايتا قارالىپ، اياعىنا دەيىن دۇرىس شەشىلۋىنە ازاماتتىق ۇلەسىن قوساتىن ازاماتتار تابىلسا، ەلىمىزدەگى ءبىر قازاق وتباسىنا جەڭىلدىك بولاتىن ەدى. قولدان كەلگەنشە كومەك بەرەيىك، اعايىن!
بەكبولات قارجان
[playlist type="video" ids="14068"]
