داۋلەت باقبەرگەنوۆ: «بۇل بارىپ تۇرعان الاياقتىق»

جاقىندا رەداكتسيامىزعا كاسىپكەر داۋلەت باقبەرگەنوۆ حابارلاسىپ، ءوزى باسقارعان كومپانيانىڭ سوتتىڭ سولاقايلىعىنان ادىلەتسىزدىكتىڭ قۇربانى بولعانىن ايتىپ، اراشا سۇرادى. ءبىز دە داۋلەت مىرزانىڭ ءسوزىن جەرگە تاستامادىق. ماسەلەنىڭ ءمان-جايىن سۇراپ، بىلدىك. داۋلەت مىرزا الماتى قالاسىندا ورنالاسقان «Fuji-ليفت» جاۋاپكەرشىلىگى شەكتەۋلى سەرىكتەستىگىن باسقارادى ەكەن. بۇل سەرىكتەستىك كۇنى بۇگىنگە دەيىن ءليفتى ورناتۋمەن اينالىسىپ كەلگەن. ءسويتىپ، 2015 جىلى «احەكو» جشس-مەن كەلىسىمشارت ءتۇزىپتى. بۇل سەرىكتەستىكتىڭ باسىندا ءازىربايجان قاۋىمداستىعىنىڭ توراعاسى ءابىلفاس مۋسليموۆيچ حامەدوۆ دەيتىن كىسى بولعان. كەلىسىمشارتتى جاساۋ، كەلىسسوزدەر جۇرگىزۋ پروتسەسسىن باسقا-باسقا ەمەس، ءدال وسى ءابىلفاس مۋسليمۇلى جۇرگىزگەن ەكەن. تاپسىرىس بەرۋشى ءتۇرلى سەبەپتەرمەن كەلىسىمشارت تالاپتارىن بۇزعانىنا قاراماستان، اقىرىندا سوتقا بەرىپ، سوتتا سۋديانىڭ بىرجاقتىلى شەشىمىمەن جەڭىپ شىققان. سوت جاۋاپكەر تاراپتىڭ ناقتىلى كەلتىرگەن دالەلدەرىنىڭ بىردە-بىرەۋىن ەسكەرمەگەن. ءارى قاراي، ءسوزىمىز سۇيىق شىقپاس ءۇشىن، «Fuji-ليفت» جشس-ءنىڭ اتقارۋشى ديرەكتورى داۋلەت باقبەرگەنوۆتى اڭگىمەگە تارتتىق. سوت پروتسەسسىنىڭ قالاي وتكەنى تۋرالى ەگجەي-تەگجەيلى سۇراپ بىلدىك. كەلىسىم قالاي جاسالدى؟ داۋلەت باقبەرگەنوۆ،  «Fuji-ليفت» جشس اتقارۋشى ديرەكتورى: - سىزدەرگە تۇسىنىكتى بولۋى ءۇشىن، كەلىسىمشارتتىڭ قالاي تۇزىلگەنىنەن باستايىن. 2015 جىلدىڭ ماۋسىم ايىندا ءبىزدىڭ «Fuji-ليفت» جشس مەن «احەكو» جشس اراسىندا كەلىسىمشارت جاسالعان. ول بويىنشا ءبىز ولارعا 6 ءليفتى ورناتىپ بەرۋىمىز كەرەك ەدى. بۇل كەلىسىمشارتتىڭ جالپى سوماسى 5 ميلليون 300 مىڭ تەڭگەدەي بولدى. 2016 جىلدىڭ قاڭتار ايىندا ءبىز ليفتىلەردى ورناتۋ جۇمىستارىن باستادىق. نەگە وسىنشا ۇزاق ۋاقاتتىن سوڭ؟ ءبىز كەلىسىم جاسالعاننان كەيىن-اق، ورناتۋ جۇمىستارىن باستاپ كەتەر ەدىك. كەلىسىمشارت بويىنشا ولار بىزگە ليفتىلەردى ورناتاتىن جەرلەردى دايىنداپ بەرۋى كەرەك بولعان. ياعني، ءليفتى ورناتاتىن شۇڭقىردى دايىنداپ بەرۋى كەرەك ەدى. ودان كەيىن، «احەكو» جشس اراسىندا كەلىسىمشارت تۇزىلگەننەن 3 كۇننىڭ ىشىندە جالپى سومانىڭ 75 پايىزىن تولەۋى مىندەتتى بولعان. ولار 3 كۇندە تولەۋى كەرەك سومانى 162 كۇن دەگەندە تولەدى.  بىراق، ءبىز سوندا دا جۇمىستى باستاپ كەتتىك. وتكەندەگى سوت وتىرىسىندا مەن وسى ماسەلەردى ايتىپ، ءوتىنىش، ارىز، مالىمدەمە جاساعان ەدىك. سوت ءبىزدىڭ مالىمدەمەلەردىڭ بىردە-ءبىرىن ەسكەرگەن جوق. نەگە ەكەنى تاعى بەلگىسىز... جالپى ءليفتىنى ورناتۋ ەكى كەزەڭنەن تۇرادى. ءبىرىنشى مونتاج جۇمىستارى، ەكىنشى ءليفتىنى ىسكە قوسۋ. توكتارىن، ەلەكترلىك قۇرىلعىلارىن ىسكە قوسۋ كەزەڭى. ءسويتىپ، مونتاج جاسايتىن جەر دايىن ەمەس. ءبىز بۇل تۋرالى «احەكو-عا» بىرنەشە حات جازدىق.  ءليفتىنى ولار وزدەرى ساتىپ العان. ليفت ولاردىڭ مەنشىگى. ولار بىزگە ءليفتىنىڭ بولشەكتەرىن اكەلىپ بەرۋى كەرەك ەدى. جالپى ءبىر ءليفتى 100 شاقتى بولشەكتەن تۇرادى. بىزگە سول بولشەكتەردى اكەلىپ بەرگەن سوڭ، ءبىز ءليفتىنى ورناتۋىمىز كەرەك قوي... «احەكو» بىزگە سول بولشەكتەردى ءبولىپ-ءبولىپ اكەلە باستادى. وندا دا تولىق ەمەس.  سەبەبى، ساتىپ العان ليفتتەرى باسقا جەردەگى قويمالارىندا ەكەن. نەگىزى كەلىسىم بويىنشا التى ءليفتى ورناتۋىمىز كەرەك. بىزگە قالاي جەتىزىپ بەردى، ءبىز سولاي ورناتا باستادىق.  ءليفتىنىڭ جابدىقتارىن ءبولىپ-ءبولىپ اكەلگەن سوڭ، ءبىز تاعى دا «احەكو-عا» ارىز حاتتار جازدىق. بىراق، ولار ءبىزدىڭ جازعان حاتتارىمىزدىڭ ەشقايسىسىنا جاۋاپ بەرمەدى. جوعارىدا ايتقانىمداي، كەلىسىمشارت سوماسىنىڭ 75 پايىزىن جارتى جىل سوزىپ ءجۇرىپ، 162 كۇندە تولەدى. كەيىن، ولار ءليفتىنىڭ كوتەرىلەتىن بيىكتىگىن تاعى 3 مەترگە ۇزارتاتىنىن ايتتى. قۇرىلىس ءجۇرىپ جاتقان عيماراتقا تاعى ءبىر قابات قوسىلادى ەكەن. ول كەزدە ءبىز ورناتۋ جۇمىستارىن باستاپ كەتكەنبىز. سودان، عيماراتقا تاعى ءبىر قابات قوسىلاتىن بولدى. ونىڭ دا شۇڭقىرى دايىن ەمەس. جۇمىس تاعى توقتاپ قالدى. 3 مەترگە ۇزارعان سوڭ، وعان قوسىمشا بولشەكتەر كەرەك قوي. ول بولشەكتەردى «احەكو» الۋى كەرەك بولدى. ءسويتىپ، سوزىپ ءجۇرىپ الدى. اقىرى، 2017 جىلدىڭ قازان ايىندا عانا بىزگە ءليفتى ورناتاتىن ورىندى دايىنداپ، ءليفتىنىڭ قوسالقى بولشەكتەرىن جەتكىزىپ بەردى. ءبىز سول كەزدە-اق، ونى ورناتتىق. ءليفتىنىڭ مونتاجىن بىتىردىك. ءليفتىنىڭ نەگىزگى جۇمىسى – قاڭقاسى، اۋىر تەمىر بولشەكتەرى ورناتىلدى. ەندى ونى ىسكە قوسۋ كەرەك. قوسۋ ءۇشىن ەلەكترلىك جابدىقتارى كەرەك. ەندى سول ەلەكترلىك جابدىقتاردى جەتكىزىپ بەرمەي، سوزا باستادى. ول جەرە ەلەكترلىك جابدىقتار، پلانتا، باسقارۋ بولشەكتەرى دەگەن جابدىقتار كەرەك ەدى. سودان ءبىز، جاڭاعى «احەكو-عا» تاعى دا حات جازدىق. ولار تاعى  جاۋاپ بەرمەدى. مەن وسىنىڭ بارلىعىن اپپەلياتسيالىق ارىزدا دا، سوتتا دا ايتىپ، كورسەتكەنمىن. ءبىر قىزىعى سۋديا وسىنىڭ ەشقايسىسىن ەسكەرگەن جوق. ءبىز شاعىمدارىمىزدى حاتقا ءتۇسىرىپ، جاڭاعى «احەكو-عا» جىبەرەمىز. ولاردان جاۋاپ جوق. ءسويتىپ، نەگىزگى جۇمىستار اياقتالعان سوڭ، ولار بىزگە حات جازدى.  «نەگە بىتىرمەيسىڭدەر؟» دەگەن ماعىناداعى سۇراقتاردى قويدى. ءتىپتى، ءبىزدىڭ جۇمىسقا مۇلدە قاتىسى جوق تالاپتاردى قويدى. وسىدان كەيىن، ارادا كەلىسسوزدەر بولدى. ەكى جاق كەلىسىمگە كەلىپ، ءبىز ارى قاراي ءوز جۇمىسىمىزدى جاساي بەردىك. ولار دا ءبىزدى سوتقا بەرگەن جوق. ءبىز دە ولاردىڭ ارتىنان قۋدالامادىق. 2017 جىلدىڭ قازان ايىندا مونتاج جۇمىستارى تولىعىمەن ءبىتتى. ەندى تەك ليفتىلەردى قوسۋ كەرەك. ول ءۇشىن جوعارىدا ايتقانىمداي، ەلەكترلىك جابدىقتاردى بىزگە اكەلىپ بەرمەگەن. ءسويتىپ جۇرگەندە، جاڭاعى عيماراتتاعى وزدەرىنىڭ قۇرىلىس جۇمىستارى اياقتالماي، سوزىلعان جۇمىس سوزىلا بەردى. اقىرى 2018 جىلدىڭ قازان-قىركۇيەك ايلارىندا ولار ءبىزدى سوتقا بەردى. سوندا بىزگە كەلىسىمشارتتى ۋاقىتىلى ورىنداعان جوق دەپ شاعىمداندى. «كەلىسىمشارتتا كورسەتىلگەن ءوز مىندەتتەرىن ورىندامادى. كەلىسىمشارتتىڭ مەرزىمىن، شارتىن بۇزدى» دەپ سوتقا بەرىپ، ەكى ارادا جاسالعان كەلىسىمشارتتى تولىق كۇشىن جوياتىنداي ەتىپ بۇزۋدى، وزدەرى كەشىكتىرىپ تولەگەن 75 پايىزدىڭ اقشاسىن تولىق قايتارۋدى تالاپ ەتتى. ال سوت ءبىزدىڭ كەلتىرگەن ارگۋمەنت دالەلدەرىمىزدىڭ بىردە-بىرەۋىن ەسكەرمەستەن، «احەكو-نىڭ» پايداسىنا شەشىم شىعارىپ بەردى. «كوپ سۇراققا كوزىن جۇمعان مادىباەۆا «الدەنەگە» مۇددەلى مە؟» سۋديا الماتى قالالىق مامانداندىرىلعان اۋدانارالىق سوتىنىڭ سۋدياسى – مادىباەۆا زەينەكۇلتاي دەگەن كىسى. 2018 جىلدىڭ 28-جەلتوقسانى كۇنى مەن اپپەلياتسيالىق ارىز بەردىم. سول جەردە الدىڭعى سوتتاعى ساۋاتتى، حات تانيتىن ادامعا ايدان انىق ورەسكەلدىكتى جازدىم. الدىڭعى سوت وتىرىسى كەزىندە سۋديا مادىباەۆا ءبىزدىڭ ايتقان مالىمدەمە، ەسكەرتپە، ارىز، دالەلدەرىمىزدى ەسكەرگەن جوق. ايتپەسە، ءبىز سوتتا بارلىعىن دالەل فاكتىمەن، ۋاقىت-كۇنىمەن كورسەتتىك. ءتىپتى، سوت شەشىمىن قاراساڭىز ارىزدانۋشى، ياعني تاپسىرىس بەرۋشى «احەكو» جشس كەلىسىمشارتتىڭ بىردە-ءبىر پۋنكتىن بۇزباعان سياقتى كورسەتىلگەن. بارلىق قاتەلىك، زاڭ بۇزۋشىلىق تەك ءبىزدىڭ كومانيا تاراپىنان بولعان سياقتى. مىسالى، اپپەلياتسيالىق ارىزدا مەن نەگە ءبىز تاپسىرىستى ۋاقىتىلى ورىنداي الماعانىمىزدى كورسەتتىم. ورىنداي الماعان سەبەبىمىز:

1. ولار بىزگە ءليفتىنىڭ بولشەكتەرىن جەتكىزىپ بەرمەدى. ارىزدانۋشى تاراپ سوت وتىرىسىندا وسىعان قارسى ەشقانداي ارگۋمەنت ايتا المادى. بىراق، سۋديا مۇنى ەسكەرمەدى.
2. ءليفتىنىڭ سىزبالارعا سايكەس بولماۋى. ونى دا ارىزدانۋشى تاراپ دالەلدەي العان جوق. مۇنداي شارت بۇزۋ بولماعانىن دالەلدەي العان جوق. بۇل دا ەسكەرۋسىز قالدى.
3. كەلىسىمشارتتىڭ تولەم بويىنشا شارتتارىن ولار ورىنداعان جوق. 3 كۇننىڭ ىشىندە تولەيتىن قارجىنى 6 ايدىڭ، 162 كۇننىڭ ىشىندە تولەدى. بۇل دا كەلىسىمشارتتى بۇزۋ ەدى. بىراق سۋديا تاعى كوز جۇمدى.
4. ورناتۋ جۇمىستارى ءجۇرىپ جاتقان كەزدە تاعى ءبىر قاباتتىڭ قوسىلۋى ءبىزدىڭ جۇمىسىمىزعا كەدەرگى كەلتىردى.
5. ودان كەيىن ءليفتىنى قوسۋعا، تاعى ءبىر قاباتقا كوتەرۋ ءۇشىن قاجەت بولشەكتەردى ۋاقىتى اكەلىپ بەرگەن جوق.
6. ءليفتىنى قوسۋعا كەرەك بولشەكتەردى بىزگە دەر كەزىندە جەتكىزىپ بەرگەن جوق. سوندىقتان ءبىزدىڭ دە جۇمىستارىمىز ەداۋىر كەشەۋىلدەدى.

وسىنىڭ بارلىعىن سۋديا مادىباەۆا قاراۋسىز، ەسكەرۋسىز قالدىردى. مەن اپپەلياتسيالىق ارىزدا جازدىم. الدىڭعى سوتتا دا بىرنەشە مارتە ايتتىم. سول كەزدە ارىزدانۋشى تاراپ ەشبىر ارگۋمەنت ايتا المادى. وسى اپپەلياتسيالىق ارىزدى قالالىق سوتقا جازدىق. ەندى سوت ارىزدى وندىرىسكە الۋى كەرەك.  سودان كەيىن سوتتىڭ كۇنى تاعايىندالسا، وسى جولى ادىلدىك ورنايدى دەپ ويلايمىن. «ءبىز نەگە «احەكو-نى» سوتقا بەرمەدىك؟» كەلىسىمشارتتىڭ تالاپتارىن وسىنشاما ورەسكەل بۇزعان «احەكو-نى» نەگە ءبىز سوتقا بەرمەدىك؟ ءبىز ولاردى سوتقا بەرمەدىك. ءبىزدىڭ قاتەلىك سول بولدى.  مەن كومپانيانىڭ اتقارۋشى ديرەكتورى رەتىندە، باسشىلارعا تالاي رەت ايتتىم. «شارا قولدانايىق، سوتقا بەرەيىك» دەدىم. وكىنىشكە وراي، بىزبەن كەلىسىم جاساسقان كىسى ءبىزدىڭ باسشىلارمەن جاقسى قارىم-قاتىناستا بولعان، ءبىزدىڭ باسشىلار سىيلايتىن لاۋازىمدى كىسى ەكەن. ءبىزدىڭ باسشىلار سولاي دەپ ساناعان. جۇرتقا سىيلى، ءبىراز ەل تانيتىن كىسى بولعان سوڭ، قازاقىلىققا سالىنىپ، اراداعى ماسەلەلەردى سويلەسىپ شەشىپ جۇرگەن ەدىك. ءازىربايجان قاۋىمداستىعىنىڭ توراعاسى ما، پرەزيدەنتى مە، ايتەۋىر سونداي ادام. اتى-ءجونى ءابىلفاس مۋسليموۆيچ حامەدوۆ دەگەن كىسى. نەگىزى «احەكو» دەگەن كومپانيانىڭ ديرەكتورى – ابدۋللاەۆ تاير دەگەن كىسى. قۇجاتتا سولاي دەپ كورسەتىلگەن. ال شىن مانىسىندە جاڭاعى ايبدۋللاەۆ تاير دەگەن ادام قۇرىلىس بويىنشا مەڭگەرۋشى مە، ايتەۋىر سونداي ءبىر قىزمەت اتقارادى. «ءابىلفاس مۋسليموۆيچ – شەشىم قابىلداۋشى تۇلعا» كەلىسىمشارتتى جاساعان، تەكسەرگەن، كەلىسسوزدەردى جۇرگىزگەن ءابىلفاس مۋسليموۆيچ دەگەن ادام. ول جاڭاعى جەردە بۇيرىق بويىنشا ىستەپ ءجۇر مە، جوق پا، ءبىز ونى بىلمەيمىز. سەبەبى، كومپانيانىڭ رەسمي باسقارۋشىسى، قۇرىلتايشىسى، جالعىز قاتىسۋشىسى – ابدۋللاەۆ تاير دەپ كورسەتىلگەن. كومپانيا رەسمي سونىكى. ال شىن مانىندە بارلىعىن شەشىپ وتىرعان ءابىلفاس مۋسليموۆيچ دەگەن ادام. بارلىق كەلىسىمدەردى جاساعاندا، كەلىسسوزدەردى جۇرگىزگەندە ءبىز سول ءابىلفاس دەگەن كىسىمەن كەزدەسىپ، كەلىسىم جاساسىپ وتىردىق. مەنىڭ كەلىسىم جاسايتىن قۇزىرەتىم جوق. مەن اتقارۋشى ديرەكتورمىن. رەسمي كومپانيانىڭ بۇيرىعى شىعادى، مەنىڭ اتىما. مەن سول بۇيرىقپەن عانا جۇمىس جاسايمىن. كەلىسىمدى ءبىزدىڭ باسشىلار جاساعان. ول كەزدە باسشىمىز ايبىن اۋباكىر ەدى. قازىر قۇرمانالى سەرالى دەگەن ازامات. ءبىزدىڭ ەكەۋارا جاساسقان كەلىسىمشارتقا ءابىلفاس دەگەن كىسى قول قويماعان. دەگەنمەن، زاڭدا شەشىم قابىلداۋشى تۇلعا دەگەن تۇسىنىك بار. ءابىلفاس سول – شەشىم قابىلداۋشى تۇلعا. ونداي تۇلعا كەز كەلگەن جاعدايدا جاۋاپقا تارتىلادى. ول كومپانيانىڭ رەسمي وكىلى بولماعان كۇننىڭ وزىندە، ول شەشىم قابىلداۋشى تۇلعا كومپانيانىڭ بارلىق ءىس ارەكەتتەرىنە جاۋاپ بەرۋى كەرەك. «بۇل بارىپ تۇرعان الاياقتىق» بۇل اشىق تۇردە الاياقتىق دەپ ەسەپتەيمىن. سەبەبى، كەلىسىمشارت 2015 جىلدىڭ جازىندا جاسالعان. ولار ءبىزدى 2018 جىلدىڭ كۇزىندە، ارادا ءۇش جىل وتكەننەن كەيىن عانا سوتقا بەرىپ وتىر. كەلىسىمشارتتىڭ مەرزىمى 30 كۇن عانا. ياعني، ولار بىزگە ءليفتىنى اكەلىپ، ورىندى دايىنداپ بەرەدى. اقشاسىن تولەيدى. ءبىز 30 كۇننىڭ ىشىندە 6 ءليفتىنى ورناتىپ بەرۋىمىز كەرەك. ءبىز بۇل كەلىسىمشارتتى تۇزەردە وزىمىزگە جۇكتەلەتىن مىندەتتەردى تولىق ءتۇسىنىپ، 30 كۇننىڭ ىشىندە 6 ءليفتىنى ورناتامىز دەپ جاسادىق قوي. ەگەر جاڭاعىداي، قۇرىلىس جاعىنان كەدەرگىلەر بولماسا،  تالاپتار ورىندالسا، اقشانى ۋاقىتى تولەسە، ءليفتىنى تۇگەل، «مىنە، ورناتىڭدار» دەپ اكەلسە، ءبىز وناتىپ بەرەر ەدىك. بىراق  باسىنان باستاپ ولاي بولعان جوق. اقشانى كەشىكتىردى. ءليفتىنى ۋاقىتى اكەلمەدى. ودان كەيىن ورنى دايىن ەمەس بولدى. ءبىز 3 جىل بويى كەلىسسوزدەر جۇرگىزۋ ارقىلى ماسەلەنى شەشكىمىز كەلدى. 3 جىل بويى ءبىز جۇمىس ىستەدىك. ءتىپتى 3 جىل 3 اي. سودان كەيىن عانا ءبىزدى سوتقا بەرىپ جاتىر. ەگەر شىنىمەن ولار ءبىزدىڭ كومپانيامىزدىڭ كەلىسىمشارتتى ورىنداي المايتىنىنا كوزى جەتسە نەمەسە ءبىزدىڭ جۇمىسىمىزعا كوڭىلى تولماسا، نەگە ەكى ايدان نەمەسە  ءۇش ايدان كەيىن، مەيلى جارتى جىلدان نەمەسە ءبىر جىلدان كەيىن سوتقا بەرمەدى؟ سوتتا الدىندا وزدەرى كەشىكتىرىپ تولەگەن اقشانى  تولىق قايتارۋ تۋرالى تالاپ قويعان. ياعني جاڭاعى 5 ميلليوننىڭ 75 پايىزىن قايتارسىن دەدى. ءبىز 3 جىلدا كوپ جۇمىس جاسادىق. 90 پايىز جۇمىستى اياقتادىق. ەندى تەك سول ءليفتىنى قوسۋعا قاجەت بولشەكتى بەرمەي، جۇمىس توقتاعان كەزدە ولار سونى پايدالانىپ، ءبىزدى سوتقا بەرىپ، اقشا ءوندىرۋدى عانا ويلاپ وتىر. بۇل مەنىڭشە اشىق الاياقتىق. «احەكو-نى» بىرنەشە كومپانيا سوتقا بەرگەن ەكەن» ەندى «سوت.كز» دەگەن سايتتى قارادىم. جاڭاعى «احەكو-نى» سوتقا بەرگەن بىرنەشە كومپانيا بار ەكەن. بۇل سايت ادىلەت مينيسترلىگىنىڭ سايتى عوي دەيمىن، قاتەلەسپەسەم.  سول جەردە كومپانيانىڭ نومەرى ارقىلى بىلۋگە بولادى. كەز كەلگەن كومپانيانىڭ كىممەن سوتتاسىپ جاتقانىن، كىم-كىمگە ارىزدانعانىن بىلۋگە بولادى. بىرنەشە كومپانيا «احەكو-نى» سوتقا بەرگەن ەكەن. ەندى ول جەردە كىمدىكى دۇرىس ەكەنىن مەن  بىلمەيمىن، مۇمكىن «احەكو-نىكى» دۇرىس شىعار.  بىراق اقشانى كەشىكتىرىپ تولەپ جاتىر دەگەندى وقىدىم. «احەكو-نى» سوتقا بەرگەن كومپانيالار 17.07.2018 جىل. «نۋراسىل ستروي» جشس. 06.11.2018 جىل. «كۆانت تورگ سەرۆيس» جشس. 21.11.2018 جىل. الماتى قالاسى، ەنەرگەتيكا جانە كوممۋنالدىق شارۋاشىلىق باسقارماسى، «الماتى سۋ» مەملەكەتتىك كوممۋنالدىق ۇيىمى.   ءابىلفاس مۋسليموۆيچ – «ءازىربايجان قاۋىمداستىعى» رقب توراعاسى ءبىز ءابىلفاس مۋسليمۇلى حامەدوۆتىڭ بيوگرافياسىنا ۇڭىلدىك. ول كىسىنىڭ نىسپى-سويى كىم ەكەنىن، قانداي قىزمەتتەر اتقارعانىن بىلدىك. ءابىلفاس مۋسليمۇلى بۇرىنعى وڭتۇستىك قازاقستان وبلىسىنىڭ ماقتاارال اۋدانىندا تۋعان ەكەن. الماتى ساۋلەت-قۇرىلىس ينستيتۋتىن تامامداعان. 1993 جىلدان باستاپ «حەمكو» قۇرىلىس كومپانياسىن باسقارادى. قازاقستان حالقى اسسامبلەياسى كەڭەسىنىڭ مۇشەسى. ءبىراز جىل قازاقستان حالقى اسسامبلەياسى توراعاسىنىڭ ورىنباسارى بولىپتى. 2018 جىلدىڭ 28 ساۋىرىندە پرەزيدەنت پارمەن بەرىپ، ءابىلفاس مۋسليمۇلى حامەدوۆتى توراعا ورىنباسارى قىزمەتىنەن بوساتقان ەكەن. اقوردانىڭ رەسمي سايتى سولاي دەپ جازادى. 2007 جىلدان قازىرگى كەزگە دەيىن «ازەربايجاندىقتار قاۋىمداستىعى» رەسپۋبليكالىق قوعامدىق بىرلەستىگىنىڭ توراعاسى بولىپ تابىلادى. «قۇرمەت» وردەنىن تاققان، اسسامبلەيانىڭ جانە باسقا دا مەرەيتويلىق مەدالدەردىڭ يەگەرى ەكەن. «ۋيكيپەدياداعى» مالىمەتتە – «ابيلفاس مۋسليموۆيچ جىل سايىن قايىرىمدىلىق ماقساتتارعا، مامانداندىرىلعان مەكتەپتەر مەن مۇگەدەكتەرگە ارنالعان ينتەرناتتاردى قايتا قۇرىلىمداۋ مەن جوندەۋگە قارجى بولەدى، بالا باقشالارىنا، تۇرمىسى تومەن وتباسىلارىنا ماتەريالدىق كومەك كورسەتەدى» دەپ جازىلعان ەكەن. ءبىز ماسەلەنىڭ اق-قاراسىن ايىرۋ ماقساتىندا ءابىلفاس ءمۋسليموۆيچتىڭ قالتا تەلەفونىنا بىرنەشە مارتە قوڭىراۋ شالدىق. تەلەفون تۇتقاسىن ەشكىم كوتەرگەن جوق. ودان كەيىن، «spra.vkaru.net» پورتالىندا كورسەتىلگەن قالالىق تەلەفونعا دا حابارلاستىق. وكىنىشكە وراي، قوڭىراۋىمىز جاۋاپسىز بولدى. ءتۇيىن. ءبىز ازىرگە بۇل ماقالاعا قاتىستى ءتۇيىن جازبادىق. ءابىلفاس مۋسليمۇلى شەشىم قابىلدايتىن «احەكو» سەرىكتەستىگىنىڭ تالاپ-ارىزىن قۇپتاپ شىعارعان، سۋديا مادىباەۆانىڭ شەشىمىن اپپەلياتسياعا بەرگەن ەكەن. ارىز بەرۋشى «Fuji-ليفت» سەرىكتەستىگى اپپەلياتسيالىق سوت ەكى تاراپتىڭ دا ءۋاجىن ەستىسە، ەكى تاراپقا دا ءادىل شەشىم شىعارسا دەيدى. ءبىز دە وسىدان ءۇمىتتىمىز. اپپەلياتسيالىق سوت ءادىل تورەلەگىن ايتار... دەيتۇرعانمەن، پرەزيدەنت جارلىعىمەن اسسامبلەياداعى قىزمەتىنەن بوساتىلعان ءابىلفاس مۋسليموۆيچ حامەدوۆ مىرزا كۇنى بۇگىنگە دەيىن «ءازىربايجان قاۋىمداستىعى» بىرلەستىگىن باسقارىپ كەلە جاتىر ەكەن. جاۋاپتى قىزمەتتە، جۇرت الدىندا جۇرگەن، ەل مەن ەلدىڭ، ادام مەن ادامنىڭ تاتۋلىعىنا جاۋاپتى ازاماتتاردىڭ اتتارى وسىنداي كەلەڭسىز وقيعالاردا اتالىپ قالۋى – ەشكىمگە ابىروي اپەرمەيتىنى شىندىق. قازاق «ەلدەستىرمەك ەلشىدەن» دەيدى. ەل ىشىندە ەلشىلىك ەتىپ جۇرگەن ءابىلفاس مۋسليموۆيچ تە مۇنى ەسكەرسە يگى ەدى... ماقالا abai.kz اقپاراتتىق پورتالىنان الىندى. تولىق سىلتەمە: https://abai.kz/post/84272?fbclid=IwAR3Eem52MvaMZHmxbPhh7zzv2b6FvvTa7cc1CQn9tqArR8dmmIyvFBP_JwU