اتىراۋ مەن ماڭعىستاۋ وبلىستارىندا بالىق ينسپەكتسياسى مەن پوليتسيا قىزمەتكەرلەرىنىڭ قولاستىندا جۇمىس ىستەگەن قىلمىستىق توپتاردىڭ ارەكەتتەرى اشكەرەلەندى، - دەپ حابارلايدى تengrinews.kz تىلشىسى.
باس پروكۋراتۋرادا زاڭسىز اڭشىلىققا قارسى ءىس-قيمىلدىڭ ءتيىمدى شارالارىن ازىرلەۋ ماسەلەسى بويىنشا ۆەدومستۆوارالىق جينالىس ءوتتى. وعان اۋىل شارۋاشىلىعى، ىشكى ىستەر، قارجى مينيسترلىكتەرىنىڭ، ۇقك شەكارا قىزمەتىنىڭ جانە سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرونىڭ جاۋاپتى تۇلعالارى قاتىستى. قىزمەت بورىشى بويىنشا جانۋارلار الەمىن ساقتاۋعا مىندەتتى ۋاكىلەتتى جانە قۇقىق قورعاۋ ورگاندارى قىزمەتكەرلەرىنىڭ قىلمىس جاساۋ فاكتىلەرى دە بەلەڭ العانى تالقىلاندى. تابيعات قورعاۋ ينسپەكتورلارىن قورعاۋدى قامتاماسىز ەتۋ جانە قۇقىقتىق مارتەبەسىن بەكىتۋ ماسەلەسى دە قوزعالدى. وسىعان وراي قاراستىرىلىپ وتىرعان سالاداعى احۋالدى جاقسارتۋ جونىندە بىرقاتار ۇسىنىمدار ازىرلەندى. جينالىستىڭ ناتيجەسى بويىنشا براكونەرلەردىڭ ارەكەتتەرىنىڭ جولىن كەسۋگە، بيورەستۋرستاردى زاڭسىز ساتىپ الۋعا، تاسىمالداۋعا جانە ونىڭ ەكسپورتىنا جول بەرمەۋگە باعىتتالعان بىرلەسكەن ءىس-شارالار جوسپارى ازىرلەندى.
سوڭعى جىلدارى ەلىمىزدە سيرەك كەزدەسەتىن جانە جويىلىپ بارا جاتقان جانۋارلارعا زاڭسىز اڭشىلىق جاساۋ وقيعالارى جيىلەپ كەتكەنى اتاپ ءوتىلدى. 3 جىلدا وسىنداي قىلمىستىق ارەكەتتەردىڭ سالدارىنان تابيعاتقا كەلتىرىلگەن زالال مولشەرى - 3,6 ميلليارد تەڭگە. كيىكتەردى اتۋ فاكتىلەرىنىڭ سانى ءوسىپ جاتىر. تەك 2016-2018 جىلداردىڭ وزىندە 3 مىڭعا جۋىق كيىك اتىلعان. براكونەرلەردىڭ قىلمىستىق ارەكەتى ۇيىمداسقان تۇردە جانە تۇراقتى سيپات الۋدا. بۇعان قاراعاندى وبلىسىنداعى "وحوتزووپروم" رمك ينسپەكتورىنىڭ قازا بولۋىنا بايلانىستى وقيعا دالەل. وسىعان ۇقساس وقيعالار بەكىرە تۇقىمداس بالىقتاردى اۋلاۋعا بايلانىستى دا ورىن الىپ وتىر. 2018 جىلى زاڭسىز اينالىمنان 8 مىڭ كەلىگە جۋىق بەكىرە الىندى، الايدا كوبىسى كولەڭكەدە قالىپ وتىر. كەڭەستە قۇقىق قورعاۋ جانە تابيعات قورعاۋ ورگاندارىنىڭ ارەكەتتەرى ءتيىمسىز ەكەنى جانە زاڭسىز اڭ اۋلاۋعا قارسى كۇرەستە كەشەندى شارالار ازىرلەۋدى تالاپ ەتەتىنى اتاپ ءوتىلدى.
