ۇقشۇ باس حاتشىسى يمانعالي تاسماعامبەتوۆ تمد، ۇقشۇ، ەاەو-عا مۇشە مەملەكەتتەردىڭ اتقارۋشى قۇرىلىمدارىنىڭ باسشىلارىمەن كەزدەستى، دەپ حابارلايدى «ادىرنا» ءتىلشىسى.
وتىرىسقا رەسەيدىڭ سىرتقى ىستەر ءمينيسترى سەرگەي لاۆروۆ، تمد-نىڭ باس حاتشىسى سەرگەي لەبەدەۆ، ەۋرازيالىق ەكونوميكالىق كوميسسيا القاسىنىڭ توراعاسى ميحايل مياسنيكوۆيچ، بەلارۋس جانە رەسەي وداقتىق مەملەكەتىنىڭ مەملەكەتتىك حاتشىسى دميتري مەزەنتسەۆ قاتىستى.
تاراپتار اتالعان بىرلەستىكتەردىڭ 2022 جىلعى قىزمەتىنىڭ ناتيجەلەرىن جانە الداعى ۋاقىتتا جۇزەگە اساتىن ىنتىماقتاستىق پەرسپەكتيۆالارىن تالقىلادى.
«وزەكتى حالىقارالىق جانە وڭىرلىك ماسەلەلەر بويىنشا پىكىر الماسۋ بولدى. ەۋرازيالىق ايماقتاعى ينتەگراتسيالىق ۇدەرىستەردى كونيۋگاتسيالاۋ، قايتالاناتىن جانە ءبىرىن-ءبىرى تولىقتىراتىن قۇزىرەتتەر سالالارىندا تىعىز ۇيىمارالىق بايلانىستاردى ورناتۋ ماسەلەلەرىنە ەرەكشە نازار اۋدارىلدى»،—دەلىنگەن حابارلامادا.
سەرگەي لاۆروۆ پەن يمانعالي تاسماعامبەتوۆتىڭ جەكە كەزدەسۋىندە ۇيىم قىزمەتىنىڭ وزەكتى اسپەكتىلەرى، ونىڭ ىشىندە بەلارۋس ەلىنىڭ توراعالىعىمەن 2023 جىلى وتەتىن وسى قۇرىلىمنىڭ جارعىلىق ورگاندارىنىڭ وتىرىستارىنا دايىندىق بارىسى قارالدى. مينيستر رەسەيلىك تاراپتىڭ يمانعالي تاسماعامبەتوۆكە ۇقشۇ باس حاتشىسى رەتىندەگى قىزمەتىنە جان-جاقتى قولداۋ كورسەتۋگە دايىن ەكەنىن اتاپ ءوتتى.
