ميحال بيلەك: ەڭ الدىمەن شابۋىل شەبىن رەتكە كەلتىرەمىن

— مەن قازاقستان قۇراماسىنىڭ باس باپكەرى بولىپ تاعايىندالعانىما قۋانىشتىمىن. جىگىتتەردىڭ قارقىنىن ءبىلۋ ءۇشىن تۇركيادا وقۋ-جاتتىعۋ جيىندارىن وتكىزەمىز. ەرتەڭ سول جاققا ۇشامىز. فۋتبولشىلارمەن بەتپە-بەت سويلەسىپ، ماقساتىمىزدى ايقىنداپ الۋىمىز قاجەت. بىزدە ازىرگە جالپىلاما شاقىرىلعان اياقدوپشىلار سانى وتە كوپ. — قازاقستان قۇراماسىنىڭ باپكەرى بولۋ شەشىمىنە قانشا ويلاندىڭىز؟ — 3 اپتا بويى ويلانىپ، قازاقستان قۇراماسىن باپتاۋعا كەلىستىم. بۇل مەن ءۇشىن وڭاي شەشىم بولمادى. سەبەبى، مەن ول ۋاقىتتا چەحيالىق كلۋبپەن جۇمىس ىستەپ جاتتىم. مەنىڭ كوماندام «زلين» ماعان رۇقسات بەرىپ، قازاقستان قۇراماسىن باپتاۋعا رۇقساتىن بەردى. مەن نەگىزىنەن قۇراما باپتاعاندى جاقسى كورەمىن. — قازىر جيىنعا 33 ويىنشى شاقىرىپسىزدار… — مەن ءالى فۋتبولشىلار تۋرالى ءالى كوپ اقپارات بىلە بەرمەيمىن. قازىر قۇراماعا شاقىرتىلىپ وتىرعان ويىنشىلاردى ءبىزدىڭ كومەكشىلەر، قازاقستانداعى باپكەرلەر شاقىرتىپ وتىر. مەن ولاردى ىرىكتەپ الامىن. — قازاق فۋتبولى جايلى وسى كەزگە دەيىن قانداي اقپاراتتار ءبىلدىڭىز؟ ويىندارىن كوردىڭىز بە؟ — وسىدان ءبىر جىل بۇرىن «سلاۆيا» كومانداسىنىڭ ويىنىن تاماشالادىم. ول قازاقستاننىڭ چەمپيونىمەن كۇش سىناستى. سوسىن ميروسلاۆ بەرانەكپەن سويلەسكەن ەدىم. ىرىكتەۋدىڭ الدىندا ءبىرشاما ۋاقىت بار، سوندىقتان دا اياقدوپشىلاردىڭ اياقالىسىن بايقاپ الامىز دەپ ويلايمىن. — بىرنەشە ويىنشى قۇرامدا جوق ەكەنىن بايقادىق… — مىنا ويىنشىلاردى جاساقتاعان كەزدە پوستنيكوۆ جاراقات الىپ قالعانىن ەسكەرىپ، ونى جيىنعا شاقىرمادىق. ال ۆالەري كارپين بىزگە ءوتىنىش جاساپ، باحتيور زاينۋتدينوۆتى ازىرگە قۇراماعا شاقىرماۋىن سۇرادى. سەبەبى، ول «روستوۆ» كومانداسىنا ءسىڭىسىپ ۇلگەرمەپتى. — ستانيمير ستويلوۆ قازاقستان قۇراماسىنىڭ نەگىزگى پروبلەماسى شابۋىل شەبى دەگەن ەدى. ءسىز ويىنداردى كورسەڭىز، قانداي پىكىردەسىز؟ — ءيا، بايقاۋىمشا شابۋىل شەبىندە ماسەلە بار. دەگەنمەن، ونى كومبيناتسيالىق ويىن ارقىلى رەتكە كەلتىرۋگە بولادى. ەڭ الدىمەن وسى ماسەلەنى قولعا الامىن. — الەكساندر مەركەلدى دە شاقىرىپسىز. ول قۇراماعا وينايتىن بولدى ما؟ — ءيا، ءبىز ونىڭ بۇرىن قۇراماعا شاقىرتىلعانىن ەستىدىك. ول قازىر گوللانديادا ويناپ ءجۇر ەكەن. ءبىز ونىمەن سويلەسىپ، قۇراماعا قايتا الدىرتقىمىز كەلەدى.

"الادوپ" سايتى