تالدىقورعان قالاسىنداعى نازارباەۆ زياتكەرلىك مەكتەبىندە اكەلەر فورۋمى ءوتتى. بۇل ءىس-شاراعا 100-دەن استام اكەلەر قاتىستى.
ۇلتتىق قۇندىلىقتار مەن وتانسۇيگىشتىك، بالالاردىڭ ەموتسيونالدىق تاربيەسىندەگى ەرلەردىڭ ءرولى، ومىرلىك داعدىلار تاقىرىپتارى تالقىلاندى.
قاتىسۋشىلاردىڭ پىكىرىنشە، الەمدە «سانالى اكەلىك» جاڭا تەندەنتسيا پايدا بولۋدا.
بۇل كۇنى ءتۇرلى سالا مەن ماماندىق يەلەرى ءبىر سۇحبات الاڭىندا باس قوسىپ، بالا تاربيەسىندەگى وزەكتى ماسەلەلەردى تالقىلاپ، بالا تاربيەسىندەگى تاجىريبەلەرىمەن ءبولىستى. پەداگوگ-پسيحولوگتار مەن كۋراتور-ۇيىمداستىرۋشىلار ماسەلەلەردى شەشۋ بويىنشا ءوز ۇسىنىستارىن ءبىلدىردى.
اكە بالاسى ءۇشىن - ۇلگى. بالا ەڭ الدىمەن ءوز اتا-اناسىنىڭ ۇلگىسىنەن ءومىردىڭ قۇرىلىمى تۋرالى ناقتى قورىتىندى جاسايدى. ارينە، ۇل ءۇشىن اكە ونەگەسى مىنەز-قۇلقى مەن بولاشاق ومىرلىك ۇستانىمىن قالىپتاستىرۋعا ۇلگى بولسا، انا بولسا قىزىنا ۇلگى بولۋى كەرەك، - دەيدى 8 - سىنىپ وقۋشىسى ايالا اكيمجانوۆانىڭ اكەسى نۇرىم اكيمجانوۆ.
پەداگوگيكالىق جاعداياتتاردى شەشۋ، سونىمەن قاتار «جاعىمسىز ەموتسيالاردى باسقارۋ تەحنولوگياسى» سياقتى پراكتيكالىق جاتتىعۋلار اكەلەردىڭ ەرەكشە قىزىعۋشىلىعىن تۋدىردى.
اكەلەر ءۇشىن شاحمات، وق اتۋ، بەينەلەۋ ونەرى، ۇستەل تەننيسى، باسكەتبولدان شەبەرلىك ساباقتارى دا ۇيىمداستىرىلدى.
فورۋم وتە قىزىقتى ءوتتى. شىنىندا دا، ءبىز قۇندى اقپارات الا الدىق، ناقتى ومىرلىك جاعدايلاردى تالداپ، شەشىمدەردى بىرگە تاپتىق. 21 عاسىر اكەسى – وتاعاسى عانا ەمەس، اقىلشى، تاربيەشى ەكەنىنە كوزىم جەتتى، – دەپ اڭگىمەسىن اتا-انا اسقار دۇيسەنبيەۆ تۇيىندەدى.
