بيلىككە تالاپ ايتقان انالار كوبەيدى

2183
Adyrna.kz Telegram

قازاقستاننىڭ بىرنەشە ايماعىندا جۇزدەگەن ايەل جەرگىلىكتى بيلىككە بارىپ، ارىزدارىن ايتىپ جاتىر. اقپاننىڭ 11-ءى كۇنى قاراعاندىدا جۇزگە جۋىق انا وبلىستىق اكىمدىككە جينالىپ، بيلىككە تالاپ قويدى. ال اقتوبەدە مەملەكەتتىك مەكەمە وكىلدەرى كوپ بالالى انالاردى قابىلداۋدى باستادى. ەلدىڭ قارجى مينيسترلىگى كوپ بالالى انالارعا تولەنەتىن جاردەماقىنى ءوسىرۋ ماسەلەسىنە پىكىر ءبىلدىردى.

"مەدالدارىڭىزدى تورگە ءىلىپ قويىپ، قاراپ وتىرامىز"

قاراعاندىدا وبلىستىق اكىمدىككە كەلگەن جۇزدەگەن كوپ بالالى انا جاردەماقىنى كوبەيتۋدى، كوممۋنالدىق قىزمەت پەن كومىر باعاسىن ازايتۋدى، بالالارعا ۇيىرمەلەردى تەگىن ەتۋدى تالاپ ەتتى. جينالعاندارمەن وبلىس اكىمىنىڭ ورىنباسارى اسحات ايماعامبەتوۆ كەزدەستى.

قاراعاندىداعى جيىنعا كەلگەن كوپ بالالى انالار. 11 اقپان 2019 جىل.
قاراعاندىداعى جيىنعا كەلگەن كوپ بالالى انالار. 11 اقپان 2019 جىل.

ال اقتوبە قالاسىندا 11 اقپاننان باستاپ ءتورت مەملەكەتتىك مەكەمە وكىلدەرى كوپ بالالى انالاردى قابىلداي باستادى. ازاتتىق ءتىلشىسى بارعان تاxاۋي اxتانوۆ اتىنداعى دراما تەاترىندا جۇزدەگەن ادام جينالعان. اراسىندا شالعاي اۋىلداردان كەلگەن ايەلدەر دە بار.

انالار باسپانا ماسەلەسى، بالاعا تولەنەتىن جاردەماقىنى كوبەيتۋ، بالالارىن بالاباقشاعا ورنالاستىرۋ الۋ، باستاۋىش سىنىپتا وقيتىن بالالاردى تەگىن تاماقپەن جانە قوعامدىق كولىكتە تەگىن جول ءجۇرۋ بيلەتىمەن قامتاماسىز ەتۋ، ءۇي سالۋعا جەر ءبولۋ سىندى الەۋمەتتىك پروبلەمالارىن شەشۋدى سۇراپ كەلىپ جاتىر.

- ءبىزدىڭ جەڭىلدىكتەردى ءوسىرسىن، جاردەماقىمىزدى اي سايىن جەتەتىندەي ەتىپ قويسىن. ودان ارتىق ەشتەمە سۇرامايمىز. مەن 200 شاقىرىم جەردەن جاروتكەل اۋىلىنىڭ بارشا انالارىنىڭ مۇڭ-مۇقتاجىن جەتكىزۋگە كەلدىم. [كوپ بالالى اناعا بەرگەن] مەدالدارىڭىز بار بولسىن، تورگە ءىلىپ قويىپ، قاراپ وتىرامىز. ونىڭ ورنىنا ءبىزدىڭ پايدامىزعا اسىراتىنداي ەتىپ جاردەم جاساسىن، - دەيدى التى بالانىڭ اناسى گۇلنار توقاباەۆا.

اقتوبە وبلىستىق اكىمدىگى ىشكى ساياسات باسقارماسىنىڭ باسشىسى بۇلبۇل ەلەۋسىنوۆا الداعى ءۇش كۇن بويى جينالاتىن اقپاراتتار سارالانىپ، كومەككە مۇقتاج انالاردىڭ ءتىزىمى جاسالاتىنىن ايتتى.

"ەڭ الدىمەن سولاردىڭ ماسەلەلەرىن شەشەمىز. بۇل - جەرگىلىكتى بيلىكتىڭ قۇزىرىنداعى جۇمىس. ال جاردەماقىنى كوبەيتۋ ءتارىزدى ماسەلەلەر ورتالىقتان شەشىلۋى كەرەك. ول ءبىزدىڭ قۇزىرىمىزدا ەمەس" دەدى اكىمدىك وكىلى.

بۇعان دەيىن اقتوبەدە كوپ بالالى انالار الەۋمەتتىك پروبلەمالارىن شەشۋدى تالاپ ەتىپ جەرگىلىكتى بيلىككە ەكى مارتە بارعان بولاتىن.

اكىمدىك ەسەبىنشە، اقتوبەدە 995 تۇرمىسى تومەن وتباسى بار. وتكەن جىلى ولارعا الەۋمەتتىك كومەك كورسەتۋ ءۇشىن بيۋدجەتتەن 196 مىڭ تەڭگە بولىنگەن.

اقتوبەلىك بەلسەندى باقىت جانشاەۆانىڭ پايىمداۋىنشا، اقتوبەدە مەملەكەت كومەگىنە مۇقتاج وتباسىلاردىڭ سانى بۇدان دا كوپ جانە ولاردىڭ كوبى بيلىك باسپانا ماسەلەسىن شەشىپ بەرەدى دەپ ۇمىتتەنەدى.

"حالىققا وليمپيادا كەرەك جوق"

اقپاننىڭ 10-ى كۇنى شىمكەنت اكىمدىگىنىڭ قىزمەتكەرلەرى شاعىم ايتىپ كەلگەن كوپ بالالى انالاردى قابىلدادى. انالار جاردەماقى، باسپانا، جۇمىسسىزدىق، كۇنكورىس قيىندىعى سىندى الەۋمەتتىك ماسەلەلەردى كوتەرگەن.

"وسى جينالىسقا كەلۋگە جولاقىسىن تابا الماي قانشا كوپ بالالى انا زارلاپ، جىلاپ وتىر. سولاردىڭ بارىنە ساناق جۇرگىزىلۋى كەرەك. جىلاماعان بالاعا نان جوق. كىمنىڭ جاعدايى قانداي ەكەنىن بالالاردىڭ سىنىپ جەتەكشىلەرى ءوزى-اق ايتىپ بەرەدى. ۇسىنىسىم، انالار كاپيتالى اشىلۋى كەرەك" دەدى جيىنعا كەلگەن ءۇش بالانىڭ اناسى ەلميرا اشىربەكوۆا.

جيىنعا كەلگەن كوپ بالالى انانىڭ ءبىرى "11 ميلليون تەڭگەگە ايالداما سالۋدىڭ نە كەرەگى بار؟ بىزگە شىرشا كەرەك جوق. حالىققا وليمپيادا كەرەك جوق" دەدى.

استانا قالاسى اكىمىنىڭ ورىنباسارى ەرمەك امانشاەۆ نارازى انالارمەن كەزدەسۋدە سويلەپ تۇر. استانا، 6 اقپان 2019 جىل

وقي وتىرىڭىز

انالار بيلىككە ءوز تالاپتارىن جەتكىزدى

اقپاننىڭ 9-ى كۇنى استانادا ونداعان انا "استانا" كونتسەرت زالىنىڭ الدىنا جينالعان. سول كۇنى قىزىلوردا وبلىسىنىڭ اكىمدىگى كوپ بالالى انالارعا ارناپ اشىق ەسىك كۇنىن وتكىزگەن.

4 اقپانعا قاراعان ءتۇنى استانانىڭ كوكتال-1 شاعىن اۋدانىندا جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى 2006, 2008, 2013, 2015 جانە 2018 جىلى تۋعان بەس قىز بالا وپات بولعان ەدى.​ وسى وقيعادان كەيىن كوپ بالالى انالار نارازىلىعى كۇشەيگەن.

اقپاننىڭ 6-سى كۇنى استانادا جۇزدەگەن انا استانادا جينالىپ، بيلىكتەن جاردەماقى مەن جورگەكپۇلدى ءوسىرۋدى، كوپ بالالى وتباسىلاردىڭ بالالارىنا تەگىن ءبىلىم بەرۋدى، انا مەن بالانى تەگىن ەمدەۋدى، باسپانا الۋدى جەڭىلدەتۋدى تالاپ ەتكەن. كەيىن استانالىق انالاردىڭ تالابىن باسقا ايماقتاعى ايەلدەر دە قولداعان.

اشىق ەسىك كۇنىنە كەلگەن تۇرعىندار. قىزىلوردا، 9 اقپان 2019 جىل.
اشىق ەسىك كۇنىنە كەلگەن تۇرعىندار. قىزىلوردا، 9 اقپان 2019 جىل.

اقپاننىڭ 11-ءى كۇنى استانادا وتكەن ءباسپاسوز ءماسليحاتىندا قازاقستان قارجى ءمينيسترى ءاليحان سمايلوۆ كوپ بالالى انالارعا بەرىلەتىن جاردەماقىنى كوتەرۋ ماسەلەسى قارالىپ جاتقانىن ايتتى.

"قازىر بۇل ماسەلە جۇمىس توبىندا قارالاپ جاتىر. بۇرىن بالا ءبىر جاسقا تولعانعا دەيىن اناعا جاردەماقى بەرىلەتىن. قازىر بۇل جاستى ءوسىرۋ جاعىن قاراستىرىپ جاتىرمىز. جاردەماقىنىڭ كولەمىن ءوسىرۋدى دە قاراستىرامىز. ءتيىستى ۇسىنىستاردى جاسايمىز" دەدى مينيستر.

"ازاتتىق" راديوسى

پىكىرلەر