Qazaqstannyń birneshe aımaǵynda júzdegen áıel jergilikti bılikke baryp, aryzdaryn aıtyp jatyr. Aqpannyń 11-i kúni Qaraǵandyda júzge jýyq ana oblystyq ákimdikke jınalyp, bılikke talap qoıdy. Al Aqtóbede memlekettik mekeme ókilderi kóp balaly analardy qabyldaýdy bastady. Eldiń qarjy mınıstrligi kóp balaly analarǵa tólenetin járdemaqyny ósirý máselesine pikir bildirdi.
"MEDALDARYŃYZDY TÓRGE ILIP QOIYP, QARAP OTYRAMYZ"
Qaraǵandyda oblystyq ákimdikke kelgen júzdegen kóp balaly ana járdemaqyny kóbeıtýdi, kommýnaldyq qyzmet pen kómir baǵasyn azaıtýdy, balalarǵa úıirmelerdi tegin etýdi talap etti. Jınalǵandarmen oblys ákiminiń orynbasary Ashat Aımaǵambetov kezdesti.
Al Aqtóbe qalasynda 11 aqpannan bastap tórt memlekettik mekeme ókilderi kóp balaly analardy qabyldaı bastady. Azattyq tilshisi barǵan Taxaýı Axtanov atyndaǵy drama teatrynda júzdegen adam jınalǵan. Arasynda shalǵaı aýyldardan kelgen áıelder de bar.
Analar baspana máselesi, balaǵa tólenetin járdemaqyny kóbeıtý, balalaryn balabaqshaǵa ornalastyrý alý, bastaýysh synypta oqıtyn balalardy tegin tamaqpen jáne qoǵamdyq kólikte tegin jol júrý bıletimen qamtamasyz etý, úı salýǵa jer bólý syndy áleýmettik problemalaryn sheshýdi surap kelip jatyr.
- Bizdiń jeńildikterdi ósirsin, járdemaqymyzdy aı saıyn jetetindeı etip qoısyn. Odan artyq eshteme suramaımyz. Men 200 shaqyrym jerden Jarótkel aýylynyń barsha analarynyń muń-muqtajyn jetkizýge keldim. [Kóp balaly anaǵa bergen] medaldaryńyz bar bolsyn, tórge ilip qoıyp, qarap otyramyz. Onyń ornyna bizdiń paıdamyzǵa asyratyndaı etip járdem jasasyn, - deıdi alty balanyń anasy Gúlnar Toqabaeva.
Aqtóbe oblystyq ákimdigi ishki saıasat basqarmasynyń basshysy Bulbul Eleýsinova aldaǵy úsh kún boıy jınalatyn aqparattar saralanyp, kómekke muqtaj analardyń tizimi jasalatynyn aıtty.
"Eń aldymen solardyń máselelerin sheshemiz. Bul - jergilikti bıliktiń quzyryndaǵy jumys. Al járdemaqyny kóbeıtý tárizdi máseleler ortalyqtan sheshilýi kerek. Ol bizdiń quzyrymyzda emes" dedi ákimdik ókili.
Buǵan deıin Aqtóbede kóp balaly analar áleýmettik problemalaryn sheshýdi talap etip jergilikti bılikke eki márte barǵan bolatyn.
Ákimdik esebinshe, Aqtóbede 995 turmysy tómen otbasy bar. Ótken jyly olarǵa áleýmettik kómek kórsetý úshin bıýdjetten 196 myń teńge bólingen.
Aqtóbelik belsendi Baqyt Janshaevanyń paıymdaýynsha, Aqtóbede memleket kómegine muqtaj otbasylardyń sany budan da kóp jáne olardyń kóbi bılik baspana máselesin sheship beredi dep úmittenedi.
"HALYQQA OLIMPIADA KEREK JOQ"
Aqpannyń 10-y kúni Shymkent ákimdiginiń qyzmetkerleri shaǵym aıtyp kelgen kóp balaly analardy qabyldady. Analar járdemaqy, baspana, jumyssyzdyq, kúnkóris qıyndyǵy syndy áleýmettik máselelerdi kótergen.
"Osy jınalysqa kelýge jolaqysyn taba almaı qansha kóp balaly ana zarlap, jylap otyr. Solardyń bárine sanaq júrgizilýi kerek. Jylamaǵan balaǵa nan joq. Kimniń jaǵdaıy qandaı ekenin balalardyń synyp jetekshileri ózi-aq aıtyp beredi. Usynysym, analar kapıtaly ashylýy kerek" dedi jıynǵa kelgen úsh balanyń anasy Elmıra Áshirbekova.
Jıynǵa kelgen kóp balaly ananyń biri "11 mıllıon teńgege aıaldama salýdyń ne keregi bar? Bizge shyrsha kerek joq. Halyqqa olımpıada kerek joq" dedi.
Analar bılikke óz talaptaryn jetkizdi
Aqpannyń 9-y kúni Astanada ondaǵan ana "Astana" konert zalynyń aldyna jınalǵan. Sol kúni Qyzylorda oblysynyń ákimdigi kóp balaly analarǵa arnap ashyq esik kúnin ótkizgen.
4 aqpanǵa qaraǵan túni Astananyń Kóktal-1 shaǵyn aýdanynda jeke úıdiń aýlasyndaǵy ýaqytsha baspana órtenip, bir otbasyndaǵy 2006, 2008, 2013, 2015 jáne 2018 jyly týǵan bes qyz bala opat bolǵan edi. Osy oqıǵadan keıin kóp balaly analar narazylyǵy kúsheıgen.
Aqpannyń 6-sy kúni Astanada júzdegen ana Astanada jınalyp, bılikten járdemaqy men jórgekpuldy ósirýdi, kóp balaly otbasylardyń balalaryna tegin bilim berýdi, ana men balany tegin emdeýdi, baspana alýdy jeńildetýdi talap etken. Keıin astanalyq analardyń talabyn basqa aımaqtaǵy áıelder de qoldaǵan.
Aqpannyń 11-i kúni Astanada ótken baspasóz máslıhatynda Qazaqstan qarjy mınıstri Álıhan Smaılov kóp balaly analarǵa beriletin járdemaqyny kóterý máselesi qaralyp jatqanyn aıtty.
"Qazir bul másele jumys tobynda qaralap jatyr. Buryn bala bir jasqa tolǵanǵa deıin anaǵa járdemaqy beriletin. Qazir bul jasty ósirý jaǵyn qarastyryp jatyrmyz. Járdemaqynyń kólemin ósirýdi de qarastyramyz. Tıisti usynystardy jasaımyz" dedi mınıstr.
"Azattyq" radıosy
