Qazaqstan Prezidentı Qasym-Jomart Toqaev transşekaralyq su mäselelerı men Aral, Kaspii teŋızderınıŋ ekologiialyq problemalaryna nazar audardy, dep habarlaidy “Adyrna”.
Toqaev transşekaralyq sudy paidalanu jäne Aral men Kaspii teŋızderınde qalyptasqan ekologiialyq ahualǧa erekşe män beru qajettıgın atap öttı.
"Su tapşylyǧy ülken problemaǧa ainalyp otyr. Resursty saqtau jäne ūqypty paidalanu – elımız üşın ǧana emes, aimaqtaǧy basqa memleketter üşın de strategiialyq, ömırlık maŋyzdy basymdyq. Transşekaralyq sudy paidalanu mäselesın, Aral jäne Kaspii teŋızderınıŋ ekologiialyq jaǧdaiyn keşıktırmei şeşu üşın tiıstı şaralar qajet. Özara mämılege negızdelgen bırlesken äreketter Halyqaralyq Araldy qūtqaru qorynyŋ tiımdılıgın arttyra alady. Kaspii teŋızınıŋ tartyluy ekologiialyq, äleumettık-ekonomikalyq jäne saiasi saldarǧa äkep soǧuy mümkın. Qazaqstan Kaspii ekojüiesın saqtau men teŋızdıŋ tartyluyn aldyn alu maqsatynda arnaiy memleketaralyq baǧdarlama äzırleu bastamasyn köterdı", – dedı Prezident.
Sonymen qatar, Memleket basşysy BŪŪ qūramynda Halyqaralyq su ūiymyn qūrudy ūsyndy.
"BŪŪ jüiesınde tek su mäselesımen ainalysatyn arnauly qūrylym joq. Qazaqstan Halyqaralyq su ūiymyn qūrudy ūsynady. Būl bastama arqyly BŪŪ aiasyndaǧy türlı ūiymdardyŋ mandatyn bır maqsatqa jūmyldyruǧa bolady. UN-Water vedomstvoaralyq tetıgın tolyqqandy agenttıkke nemese ūiymǧa ainaldyru oŋtaily şeşım bolar edı. Būl BŪŪ-nyŋ ornyqty damu maqsattaryna jäne halyqaralyq qoǧamdastyq müddesıne sai keledı. Kelesı jyly säuırde Astanada ötetın Aimaqtyq ekologiialyq sammitte Qazaqstan jahandyq su ūiymyn qūru jönınde halyqaralyq konsultasiiany bastamaq", – dedı Toqaev.
Memleket basşysy forum aiasynda müddelı elderdıŋ jasampaz serıktestıgın nyǧaituǧa jäne älemde ädılettı tärtıp ornatuǧa baǧyttalǧan halyqaralyq küş-jıgerge jaŋa serpın berıletınıne senım bıldırdı.
