مارات ءبايدىلداۇلى: بيلىككە سەنىم تومەندەدى

3699
Adyrna.kz Telegram

جاقسىلىقتان ۇمىتتەنىپ، اسىعا كۇتكەن سايلاۋ كۇنى دە كورگەن تۇستەي وتە شىقتى. «ادىلەتتى قازاقستان»، «جاڭا قازاقستان» دەگەن ۇراندار – تەك يدەولوگيالىق تىركەستەر ەكەندىگىنە كوز جەتكىزدىك.

ءوزىمىز دە «نازارباەۆ رەجيمىنىڭ شىرىگەن ىرگەتاسىنىڭ ۇستىنە قالاي «جاڭا قازاقستان» قۇرىلماق دەپ كۇماندانىپ ءجۇرۋشى ەدىك. بۇلىنگەن ىرگەتاس جاڭا قۇرىلىسقا نەگىز بولا المايدى ەكەن. بيلىك رەفورمالاردى كونستيتۋتسيالىق دەڭگەيدە جۇزەگە اسىرماعان سوڭ ءبارى سول كونە كۇيىندە قالا بەرمەك.

ءبىزدىڭ بيلىكتەگى ەڭ تاپشى قاسيەت – مەملەكەتشىلدىك بولىپ تۇر. شەنەۋنىكتەر، سايلاۋ ۋچاسكەسىنىڭ قىزمەتكەرلەرى مەملەكەتتىڭ دەموكراتيالىق دامۋ باعىتىنا ەمەس اكىمشىلىك ارقىلى جەكەلەگەن بىرەۋلەردىڭ نەمەسە كلانداردىڭ مۇددەسىنە قىزمەت ەتىپ جاتادى. وكىنىشكە قاراي رىسبەك پەن ەرمۇراتتىڭ جاعدايى سوعان دالەل. ەكەۋى دە باقىلاۋشى قويىپ قاداعالاعان سايلاۋ ۋچاسكەلەرىندە باسىم داۋىسقا يە دە، باقىلاۋشى قويا الماعان ۋچاسكەلەردە «ۋقان-سۋقان» جاعدايلار ورىن الىپ جاتىر. ءبىر ادامنىڭ بىرنەشە ۋچاسكەدە داۋىس بەرۋى، قىزمەتكەرلەردىڭ بيۋللەتەندەردى توپتاپ سالۋى، «كارۋسەل» قۇبىلىستارى، بىرەۋدىڭ ورنىنا بىرەۋ داۋىس بەرۋى سياقتى جاعدايلار باسقا دا سايلاۋ وكرۋگتەرىندە بايقالىپ جاتتى. الەۋمەتتىك جەلىلەردە ۆيدەولارى بار.

قازاقستانداعى سايلاۋلاردى باقىلاۋ جونىندەگى ەقىۇ قىسقا مەرزىمدىك ميسسياسىنىڭ جەتەكشىسى ءارى ارنايى ۇيلەستىرۋشىسى يرەن حارالامبيدەس حانىم بيلىكتىڭ ءماجىلىس پەن ءماسليحات سايلاۋىنا تىڭعىلىقتى دايىندالعانىن اتاپ وتە وتىرىپ، بىرقاتار زاڭ بۇزۋشىلىقتارعا جول بەرىلگەنىن، «ولار كوبىنە سايلاۋ قورىتىندىسىن شىعارۋ مەن ساناۋ كەزىندە» ورىن العانىن ايتتى. بۇل نەنى كورسەتەدى؟ بۇل نازارباەۆتىڭ كادرلارى قازاقستاندى جاڭا جولعا سالا الماعانىن كورسەتەدى. رەجيم قانشا تىرىسسا دا ەجەلدەن ۇيرەنشىكتى «كوللەياسىنان» شىعا الماي قالعان. ەلەكتوراتتىڭ بيلىككە سەنىمى مۇلدە تومەن ەكەندىگىن سايلاۋعا قاتىسۋشىلار سانىنىڭ كۇرت كەمىپ كەتكەنى كورسەتىپ بەردى. اسا وكىنىشتى! اقىرىن كۇتەمىز ەندى!

"ادىرنا" ۇلتتىق پورتالى 

پىكىرلەر