قازاقستاندىق شاحماتشى ءبيبىسارا اساۋباەۆا جانسايا ابدىمالىكپەن بولعان جانجالعا قاتىستى پىكىر ءبىلدىرىپ، ءوزى رەنجىتكەن ادامداردان كەشىرىم سۇرادى، دەپ حابارلايدى "ادىرنا" ۇلتتىق پورتالى Azattyq Ruhy-نا سىلتەمە جاساپ.
سپورتشىنىڭ ايتۋىنشا، ۇندىستانداعى گران-پريدە بولعان بەيبەرەكەتسىزدىكتى كوبەلەكتىڭ قانات قاعۋى اسەرىمەن سالىستىرۋعا بولادى.
«كوبەلەكتىڭ بولماشى قانات قاعۋىنان جاعالاۋدىڭ ار جاعىندا پايدا بولعان تسۋنامي ءبارىمىزدى باسىپ قالعانداي كۇيدە ءجۇرمىز. كەشە مەن ايتقان ءبىر جاعداي وسىنداي ۇلكەن داۋ تۋدىردى. ەندى ونىڭ سالدارىمەن ىستەۋ كەرەك ەكەنىن ءوزىمىز دە تۇسىنبەي وتىرمىز. بالكىم، مەن كەشە قاتتى تولقىپ كەتكەن شىعارمىن (ايتپاقشى، سول ءۇشىن حەيتەرلەردەن سىباعامدى الدىم). البەتتە، اقىل-ويدىڭ الدىنا ءتۇسىپ كەتەتىن ەموتسيالاردىڭ اۋىر زارداپقا اكەلۋى مۇمكىن ەكەنى ءسوزسىز. بۇل بارلىعىنا ساباق بولسىن. شاحماتشى بىرنەشە قادامدى الدىن الا ەسەپتەۋى كەرەك، ەڭ الدىمەن ومىردە سولاي ەتكەنى دۇرىس. ويتكەنى ومىردە جىبەرگەن قاتەنىڭ باعاسى شاحمات تاقتاسىنداعىدان الدەقايدا جوعارى بولادى. ال قاتەلەسسەم، مويىنداۋعا دايىنمىن»، - دەپ جازدى ءبيبىسارا اسساۋباەۆا Instagram پاراقشاسىندا.
سپورتشى تۋرنيرلەر كەزىندە نەمقۇرايلى ۇيىمداستىرۋ، ۇيقىسىزدىق، كەلەڭسىزدىكتەر مەن ناتيجەسىز ۋادەلەر ەندى ەشقاشان بولمايدى دەپ ۇمىتتەنەتىنىن جەتكىزدى.
«مەن جاي عانا ويىن ويناپ، رەكورد ورناتىپ، ەلىمىزدىڭ ابىرويىن اسقاقتاتىپ، تۋعان-تۋىستارىمىزدى قۋانتقىم كەلەدى. ويتكەنى ءبىز وسى ءۇشىن كەلدىك. جانە بىزگە وسىنداي مۇمكىندىك بەرەدى دەپ سەنەمىن. قاسيەتتى رامازان ايىندا اسىرەسە، تازا وي، تازا نيەت بولۋى ماڭىزدى. رەنجىتكەن ادامداردان كەشىرىم سۇرايمىن. جامان ماقساتىم بولعان جوق. ال لايىقتى ادام ءوز ماراپاتىن السىن»، - دەپ تۇيىندەدى ب. اساۋباەۆا.
ەسكە سالايىق، وسىدان بىرەر كۇن بۇرىن ءبيبىسارا اساۋباەۆا ارىپتەسى، حالىقارالىق گروسسمەيستەر، الماتى قالاسى ءماسليحاتىنىڭ بۇرىنعى دەپۋتاتى جانسايا ابدىمالىكتى سىناپ، جەلىدە جازبا قالدىرعان بولاتىن.
"ادىرنا" ۇلتتىق پورتالى
