تىركەلمەگەن ۇيىمنىڭ ناسيحاتى
جەلىدە 19 ناۋرىز كۇنى پەتروپاۆل قالاسىندا ءبىر توپ بەلسەندىلەردىڭ قازاقستاننان «تاۋەلسىز» بولعىسى كەلەتىنىن جاريالاپ، «حالىق كەڭەسى» اتالاتىن ۇيىم قۇرعانى تۋرالى بەينەجازبا تارادى.
جيىنعا جينالعاندار قازاقستاندى «كورپوراتسيا» دەپ اتاپ، ونىڭ قۇقىقتىق نەگىزدەرىن جوققا شىعارعان. بەينەجازبادان بەلسەندىلەر قاتارىندا جەرگىلىكتى قازاقتاردىڭ دا بارىن بايقاۋعا بولادى.
«ءبىز ءوزىمىزدىڭ تاۋەلسىزدىگىمىزدى، دەربەس ارەكەت ەتە الاتىنىمىزدى جانە ەگەمەندىگىمىزدى جاريالايمىز. جالپىعا بىردەي بولىنبەيتىن ۇلتتىق مۇرانى ساقتاۋدىڭ سوزسىزدىگىن، تۋعان جەردەگى ازاماتتىق مەنشىك قۇقىعىنىڭ اينىماستىعىن ەسكەرە وتىرىپ، سولتۇستىك قازاقستان وبلىسىنىڭ پەتروپاۆل قالاسىندا حالىقتىق ەڭبەكشىلەر كەڭەسىن جانداندىرىپ جاتىرمىز»، - دەيدى بەلسەندىلەر.
اتالعان بەينەجازبا جەلىدە قىزۋ تالقىلانىپ، جۇرتتىڭ نارازىلىعىن تۋدىردى.
تىركەلمەگەن «حالىق كەڭەسى» ءوز ىشىنەن توراعا مەن حاتشىلارىن سايلاپ، «دەكلاراتسيا»، «جارعى جوباسى»، «حالىق كەڭەسىنىڭ رامىزدەرىنە» دەيىن قابىلداپ ۇلگەرگەن. ءتىپتى، الەۋمەتتىك جەلىدە پاراقشالارىن اشىپ، ۇگىت جۇرگىزۋدى دە باستاپ كەتكەنگە ۇقسايدى.
كەڭەستىك گوست-پەن ولشەۋ
ۇيىم قازاقستاننىڭ ازىق-تۇلىك، ءبىلىم بەرۋ، مەديتسينا جۇيەسىنە دە پىسقىرمايدى ەكەن. ولار كەڭەستىك ءبىلىم بەرۋدىڭ «ءساتتى» بولعانىن ايتىپ، قازىر ونىڭ شەتەلدىك سۋرروگاتپەن اۋىستىرىلعانىن سىنادى.
«ال جوعارى، تەحنيكالىق جانە كاسىپتىك ءبىلىم قارجىلىق پايدا تابۋ قۇرالىنا اينالدى. ازىق-تۇلىك ونىمدەرى كەڭەستىك گوست-قا سايكەس كەلمەيدى، ادامداردىڭ ءومىرى مەن دەنساۋلىعىنا قاۋىپ توندىرەتىن تاۋارلار تولىپ جاتىر. تەگىن مەديتسينا بيزنەس سالاسىنا اينالعاندىقتان قوعام بالالار مەن ەرەسەكتەردى «ەمدەۋ» ءۇشىن قاراجات جينايدى»، - دەپ قوستى 19 بەلسەندى.
«حالىق كەڭەسى» قالاي جازالانۋى مۇمكىن؟
سوڭعى مالىمەتتەرگە قاراعاندا، سەپاراتيستىك ارەكەتكە شاقىرعان وسى ۇيىمعا قارسى ءىس قوزعالعان.
«بۇل اقپارات سولتۇستىك قازاقستان وبلىسىنىڭ پوليتسيا دەپارتامەنتىندە تىركەلدى. جەدەل-ىزدەستىرۋ شارالارى جۇرگىزىلۋدە»، - دەپ حابارلادى سولتۇستىك قازاقستان وبلىسىنىڭ پوليتسيا دەپارتامەنتى.
كاسىبي زاڭگەر الىبەك ۋاقابۇلىنىڭ سوزىنشە، توپ مۇشەلەرىن مەملەكەتكە وپاسىزدىق جاساعانى ءۇشىن 13 جىلعا دەيىنگى باس بوستاندىعىنان ايىرۋ جازاسى كۇتىپ تۇر.
«بۇل – ءبىزدىڭ ۇلتتىق قاۋىپسىزدىگىمىزگە تونگەن قاۋىپ. ۇيىم مۇشەلەرىن اۋىر جازاعا تارتۋعا ءتيىسپىز. وسىعان جول بەرگەندەر دە شەت قالماۋى كەرەك. بۇل ءبىر كۇندە پايدا بولا قالعان دۇنيە ەمەس. ابدەن ويلاستىرىلعان، پىسىقتالعان. ءۇي ىشىنەن ءۇي تىگۋگە ۇمتىلعاندار قوعامنىڭ الاڭداۋشىلىعىن تۋدىرىپ وتىر»، - دەيدى زاڭگەر.
ءبىر قىزىعى، «قازاقستان كورپوراتسياسىنا بولىنگەندەردىڭ» مالىمدەمەسى 19 ناۋرىز، ياعني ءدال ساياسي ناۋقان، قازاقستاندا ءماجىلىس جانە ءماسليحات سايلاۋى ءوتىپ جاتقان كەزدە جاسالعان.
ورالباي مەرگەنبايۇلى،
«ادىرنا» ۇلتتىق پورتالى
