ءماجىلىس دەپۋتاتى قازىبەك يسا پەتروپاۆلدا بولعان جاعدايدى قاتاڭ باقىلاۋعا الۋ قاجەت ەكەنىن ايتتى، دەپ حابارلايدى "ادىرنا" ۇلتتىق پورتالى.
ول دەپۋتاتىق ساۋالىن پرەمەر-مينيستر ءاليحان سمايىلوۆقا، باس پروكۋرور بەرىك اسىلوۆقا، ۇقك توراعاسى ەرمەك ساعىنباەۆقا جولدادى.
"19 ناۋرىزدا پەتروپاۆلدا 19 سەپاراتيست «حالىقتىق كەڭەس» ۇيىمىن قۇرىپ، قازاقستان تاۋەلسىزدىگىن مويىندامايتىنىن جاريالادى. تەك قوعامداعى ۇلكەن شۋدان سوڭ وبلىستىق قۇقىق قورعاۋ ورگاندارى «قىلمىستىق ءىس قوزعالدى» دەگەن بولار-بولماس حابار تاراتتى. وعان دەيىن جارتى اي وتكەنشە، ولار قايدا قاراپ كەلگەن؟ قىلمىستىق كودەكستە مەملەكەت بىرتۇتاستىعىن بۇزۋعا شاقىرعاندارعا قاتاڭ جازا بار. ال وسى قىلمىسقا بارعان 19 سەپاراتيست تۇك بولماعانداي ۇيلەرىندە وتىر. ال سەپاراتيزم قاۋپىن الدىن الا سەزىپ، باتىل قارسى شىعىپ كۇرەسكەن مارعۇلان بورانباي 3 جىلدان بەرى تاس تۇرمەدە وتىر...»، - دەدى دەپۋتات قازىبەك يسا.ونىڭ پىكىرىنشە، قازىر ۇلتشىلدىقپەن ەمەس، ۇلتسىزدىقپەن كۇرەسەتىن كەز. سونداي-اق پەتروپاۆل مەن پاۆلودار قالالارىنىڭ تاريحي اتاۋىن دا قايتارۋ كەرەك.
«بوس جاتقان جەر جاۋ شاقىرادى» دەگەن. كەڭ بايتاق جەرىمىزدەگى از قازاقتىڭ قاتارىن تولتىرار التىن قورىمىز – شەتتەگى قالىڭ قانداس كوشىنە شەكتەۋ قويعاندار، سولتۇستىكتى وڭتۇستىكتەن قونىس اۋدارۋشىلارمەن تولتىرۋ جوباسىن جولدا قالدىرعانداردىڭ جاۋاپ بەرەتىن كەزى كەلدى! ءوزىمىز، ءوز بيلىگىمىز قالا كوشەلەرىنەن تاۋەلسىزدىك اتىن الىپ تاستاسا تاۋەلسىزدىك قادىرىن جات قايدان ۇقسىن؟ بۇعان كىنالى اكىمدەر بىلق ەتپەي ورىندارىندا ءالى وتىر…»، - دەدى دەپۋتات.ايتا كەتەيىك، 19 ناۋرىز كۇنى پەتروپاۆل قالاسىندا ءبىر توپ بەلسەندىلەر قازاقستاننان «تاۋەلسىز» بولعىسى كەلەتىنىن جاريالاپ، «حالىق كەڭەسى» اتالاتىن ۇيىم قۇرعان بولاتىن. سول وقيعادان سوڭ ولاردىڭ ۇستىنەن قىلمىستىق ءىس قوزعالىپ، قازاقستان حالقى اسسامبلەياسى بەلسەندىلەردى ايىپتادى. ارتىنشا، ولاردىڭ كەشىرىم سۇراعان بەينەجازباسى پايدا بولدى. سوزدەرىنشە، تۇسىنبەستىك بولعان جانە مۇنى ءابليازوۆتىڭ ادامدارى الاۋىزدىق تۋدىرۋ ءۇشىن ۇيىمداستىردى دەپ ەسەپتەيدى.
