ۇلتتىق كادر ماسەلەسى تەك نازارباەۆقا عانا كەرەك ەمەس، ول ەلدىڭ بولاشاعى مەن كەلەشەگىنە كەرەك

2049
Adyrna.kz Telegram

ۇكىمەت جۇمىسىنان كەتتى... بىراق ءوزىنىڭ جاساپ كەتكەن رەفورمالارىنداعى ارتىقشىلىقتار مەن كەمشىلىكتىرىنە جاۋاپ بەرىپ كەتكەن جوق. بىزدە «تاۋەلسىزدىك» العان كۇننەن باستاپ ون رەتكە جاقىن وكىمەتتىڭ كورپۋسى مەن قۇرامى اۋىستى. سول وكىمەتتىڭ بارلىعىن دا پرەزيدەنت جاساقتادى. پرەزيدەنت سول وكىمەتتىڭ قۇرامىن جاساقتاعاندا ءبىر دە ءبىر رەت بولسىن حالىقتىڭ پىكىرىمەن ساناسقان جوق.

پرەزيدەنت جاساقتاعان وكىمەتتىڭ ءبىر دە ءبىر قۇرامى ءوزىنىڭ جاساعان رەفورمالارىنداعى كەمشىلىكتەرى ءۇشىن حالىقتان كەشىرىم سۇراعان ەمەس. نەگە ساعاديەۆ ءوزىنىڭ جاساعان رەفورمالارىنداعى كەمشىلىگى ءۇشىن ەلدەن كەشىرىم سۇرامايدى؟  ول نەگە حالىقتان كەشىرىم سۇرايدى ەكەن؟ ونى حالىق وتىرعىزعان جوق. ونى پرەزيدەنت وتىرعىزدى. ول سوندىقتان پرەزيدەنتتەن عانا كەشىرىم سۇرايدى. سەبەبى، ول حالىق ءۇشىن وتىرعان جوق، ول پرەزيدەنت ءۇشىن عانا وتىردى.

ءاربىر مينيسترگە قاتىستى وسىلاي ايتا الامىز. بۇعان دالەلدەر جەتىپ ارتىلاتىنىن ەل بىلەدى. ءبىزدىڭ ەلدە كادر ماسەلەسىن پرەزيدەنت قانا شەشەتىنىن ءبارىڭىز بىلەسىزدەر. سوندا كادر ماسەلەسى تەك پرەزيدەنتكە عانا كەرەك شارۋا ما؟

كادر ماسەلەسى ناعىز ۇلتتىق ماسەلە. كادر ماسەلەسى قاشاندا كوپشىلىكپەن كەلىسىپ شەشىلۋى كەرەك! سەبەبى، ول حالىقتىڭ يگىلىگىنە جۇمىس جاساۋ ءۇشىن كەلىپ جاتىر. وركەنيەتتى ەلدەردىڭ بارلىعىندا وسىلاي شەشىلەدى. ءبىزدىڭ حالىققا كادر ماسەلەسىن شەشۋدە وركەنيەتتى سانا كەرەك. ايتپەسە ءبىز الداعى ۋاقىتتا شاش ەتەكتەن اسقان الەۋمەتتىك ماسەلەلەرىمىزدى شەشە الماي تىعىرىققا تىرەلەمىز. قازاقتىڭ ۇلتتىق كادر دايىنداۋ ماسەلەسىنە ءبىرتۇتاس ەل بولىپ اتسالىساتىن ۋاقىتى كەلىپ، ەسىك قاعىپ تۇر. مۇنىڭ حالىقتىڭ، ەلدىڭ بولاشاعى ءۇشىن سونشالىقتى ماڭىزدى ەكەنىنە ءبىز دە نەمقۇرايلى قاراپ كەلدىك. ونى مويىنداۋىمىز كەرەك. ەندى نەمقۇرايلى بولماۋىمىز كەرەك. وسىنىڭ سوڭى شەكسىز جەمقورلىققا اپارىپ سوقتى.

ءبىر ادامنىڭ قۇزىرەتىندەگى تىرلىك دەپ قاراعاننان سوڭ، ونىڭ سوڭى جەمقورلىققا اپارىپ، توقىرايتىنىنا ءمان بەرگەن جوقپىز. سەبەبى، ءبىز ءوزىمىزدىڭ حالىقتىق كادرلاردى سايلاپ الۋعا قۇلىقسىز بولدىق، نەمقۇرايلى بولدىق، ءالسىز بولدىق. سول سەبەپتەن ولار سونى وزەرىنىڭ مۇددەسىنە اياۋسىز پايدالانىپ كەتتى. كۇشتىنىنىڭ ارتى ديىرمەن تارتادى، اۋزى قيسىق بولسا دا باي بالاسى سەن سويلە دەگەن سانادان ارىلماساق، ءبىز ەشقاشان دا وسپەيمىز. وسى ساياسي استارى بار ماقالدى سانامىزعا ابدەن ءسىڭىرىپ تاستاعان. «وي، ءبىزدىڭ قولىمىزدان نە كەلەدى، وزدەرى شەشەدى عوي» دەگەن پرينتسيپتەن اۋىتقىماي كەلدىك. بۇل نەنى بىلدىرەدى؟ بۇل ءبىزدىڭ ساياسي بەلسەندىلىگىمىزدىڭ وتە تومەن ەكەنىن بىلدىرەدى. حالىقتىڭ ءوزى وسىنداي بولسا، ارينە، ولار بىلگەنىن جاساي بەرەدى. 30 جىلعا جۋىقتادى، ءوز دەگەنىن جاساپ كەلدى.

ءبىزدىڭ ساياسي قوزعالىسىمىز ەندى باستالدى. حالىق ءوزىنىڭ جانىنا الەۋمەتتىك اۋىرتپالىقتىڭ قاتتى باتقانىن ەندى انىق سەزىندى. اششى داۋىسىن كوتەرە باستادى. قازىرگى قازاق بۇرىنعى قازاق ەمەس. وسى ۋاقىتقا دەيىن ەلدىڭ ەستىمەگەن داۋىسىن وكىمەت تە، پرەزيدەنت تە ەستىدى. ولار وزدەرى بيلىك جاساپ وتىرعان حالىقتى ابدەن زەرتتەگەن. اقىر سوڭىندا ەشقانداي كونفليكتىگە جول بەرگىسى كەلمەيدى. سوعان بارىن سالىپ، وكىمەتتى تاعى دا جاساقتاپ جاتىر. بىراق بۇل ولاردىڭ ەڭ سوڭعى شەشىمدەرىنىڭ ءبىرى سياقتى كوزگە ۇرىپ تۇر. باسقا ەشقانداي جول مەن ساياسي تەحنولوگيالىق شەشىم قالماعان دا سياقتى. ناتيجە قاي كەزدە بولادى؟ ناتيجە ەلدىڭ ساياسي ءبىلىمى مەن بەلسەندىلىگى كۇشىنە مىنگەندە بولادى.

بەكبولات قارجان

"ادىرنا" ۇلتتىق پورتالى

پىكىرلەر