[embed]
[/embed]قازاقفيلم كينوستۋدياسىنىڭ قورجىنى تاعى ءبىر تاريحي فيلىممەن تولىقتى. دالىرەك ايتساق، ءىلياس ەسەنبەرليننىڭ «كوشپەندىلەر» تريلوگياسىنىڭ ىزىمەن «قازاق حاندىعى. التىن تاق» كينوتۋىندىسىن ازىرلەدى. «قازاق حاندىعىنىڭ» ىزىن الا شىعارىلعان بۇل ءفيلمنىڭ رەجيسسەرى رۇستەم ابدىراشەۆ. ال پروديۋسسەرى – ارمان اسەنوۆ. XV عاسىرداعى تاريحي وقيعالاردىڭ ءسوز تىزبەگىن (ديالوگ) جاساعان بەلگىلى ونەرتانۋشى ەرلان تولەۋتاي. كوپ سەريالى كينوتۋىندى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن.
قويۋشى-رەجيسسەر رۇستەم ابدىراشەۆتىڭ ايتۋىنشا، بۇل جوبانىنىڭ جالعاسىن تۇسىرۋگە حالىقتىڭ ىقىلاسى تۇرتكى بولعان.
- «قازاق حاندىعى» سەريالى حالقىمىزدىڭ تاريحقا دەگەن قىزىعۋشىلىعىن وياتتى. الەۋمەتتىك جەلىلەردەن شىعارماشىل توپتىڭ اتىنا العىستارىن ايتتى. پىكىرتالاس تا بولدى، سىن دا ايتىلدى. مەن ءۇشىن مۇنداي جوبانى ءتۇسىرۋ – جاۋاپكەرشىلىك جۇكتەيدى، – دەيدى رۇستەم ابدىراشەۆ
قازاق حاندارىنىڭ ىشىندەگى ايرىقشا تۇلعالاردىڭ ءبىرى جانىبەك حان ەكەندىگى بەلگىلى. ەل قۇرمەتىنە بولەنگەن ونى «ءاز-جانىبەك» دەپ اتاۋىنىڭ ءوزى ءبىراز جايدان حابار بەرسە كەرەك... ءاز-جانىبەك حاننىڭ بەينەسىن ەركەبۇلان دايىروۆ سومدايدى. اكتەر ءوز كەيىپكەرى جونىندە ءبىراز ىزدەن. ايتۋىنشا، ءار اكتەر ءوزى سومداعان كەيىپكەردىڭ اتىمەن ەستە قالعانىن تىلەيدى. ءاز-جانىبەك حاننىڭ ءرولىن سومداۋ ءۇشىن بارلىق قارىم-قابىلەتىمدى سالدىم دەيدى اكتەر.
بۇرىنعى حان-سۇلتاندار مەن بي-شەشەندەر ءسوزدىڭ مايىن تامىزىپ، شىرايىن كىرگىزىپ، ماقالداپ-ماتەلدەپ، تۇسپالداپ سويلەگەن. ارينە، ءبارى ءبىز ويلاعانداي بولا بەرمەيدى. كەيدە قينالامىز. اسىرەسە، ومىرىندە ءبىرىنشى رەت ەستىگەن كونەرگەن سوزدەردىڭ ءمانىن-ماعىناسىن جاس اكتەرلار تۇسىنبەيدى. ولاردىڭ تۇسىنبەگەنى ەكراندا ايقىن كورىنىپ قالادى، كادردا سەزىلىپ تۇرادى ەكەن. اكتەردىڭ كوزى ايتىپ تۇرادى. سودان كەيىن ولارعا شەبەرلىك ساباعىن وتكىزىپ: ء"اي، شىراعىم، ول – مىنانداي ءسوز عوي. سەن ونى مىنا سەبەپپەن، مىناداي ماعىنادا ايتىپ تۇرسىڭ" دەپ ءتۇسىندىرىپ تۇرۋعا تۋرا كەلەدى، – دەيدى ەرلان تولەۋتاي.
ەسكە تۇسىرە كەتسەك، قازاق حاندىعىنىڭ 550 جىلدىعىنا وراي تۇسىرىلگەن «الماس قىلىش» ءفيلمى جالپىۇلتتىق پروكاتقا شىعىپ، ودان 72 ملن تەڭگەدەن استام قارجى جيناعان. ال «قازاق حاندىعى» اتاۋىمەن شىققان 10 سەريالى كينوتۋىندى العاش رەت «31-ارنادا» كورسەتىلگەن ەدى.
ناۋرىز ايىندا «قازاق حاندىعى. التىن تاق» كينوتۋىندىسىنىڭ تۇساۋكەسەرى وتەتىنىن حابارلايمىز.
[embed]
[/embed]جاسۇلان ءناۋرىزالى،
"ادىرنا ۇلتتىق" پورتالى.
