[embed]
[/embed]Qazaqfılm kınostýdııasynyń qorjyny taǵy bir tarıhı fılimmen tolyqty. Dálirek aıtsaq, Ilııas Esenberlınniń «Kóshpendiler» trılogııasynyń izimen «Qazaq handyǵy. Altyn taq» kınotýyndysyn ázirledi. «Qazaq handyǵynyń» izin ala shyǵarylǵan bul fılmniń rejısseri Rústem Ábdirashev. Al prodıýsseri – Arman Asenov. XV ǵasyrdaǵy tarıhı oqıǵalardyń sóz tizbegin (dıalog) jasaǵan belgili ónertanýshy Erlan Tóleýtaı. Kóp serııaly kınotýyndy Mádenıet jáne sport mınıstrliginiń tapsyrysy boıynsha túsirilgen.
Qoıýshy-rejısser Rústem Ábdirashevtiń aıtýynsha, bul jobanynyń jalǵasyn túsirýge halyqtyń yqylasy túrtki bolǵan.
- «Qazaq handyǵy» serııaly halqymyzdyń tarıhqa degen qyzyǵýshylyǵyn oıatty. Áleýmettik jelilerden shyǵarmashyl toptyń atyna alǵystaryn aıtty. Pikirtalas ta boldy, syn da aıtyldy. Men úshin mundaı jobany túsirý – jaýapkershilik júkteıdi, – deıdi Rústem Ábdirashev
Qazaq handarynyń ishindegi aıryqsha tulǵalardyń biri Jánibek han ekendigi belgili. El qurmetine bólengen ony «Áz-Jánibek» dep ataýynyń ózi biraz jaıdan habar berse kerek... Áz-Jánibek hannyń beınesin Erkebulan Daıyrov somdaıdy. Akter óz keıipkeri jóninde biraz izden. Aıtýynsha, ár akter ózi somdaǵan keıipkerdiń atymen este qalǵanyn tileıdi. Áz-Jánibek hannyń rólin somdaý úshin barlyq qarym-qabiletimdi saldym deıdi akter.
Burynǵy han-sultandar men bı-sheshender sózdiń maıyn tamyzyp, shyraıyn kirgizip, maqaldap-máteldep, tuspaldap sóılegen. Árıne, bári biz oılaǵandaı bola bermeıdi. Keıde qınalamyz. Ásirese, ómirinde birinshi ret estigen kónergen sózderdiń mánin-maǵynasyn jas akterlar túsinbeıdi. Olardyń túsinbegeni ekranda aıqyn kórinip qalady, kadrda sezilip turady eken. Akterdiń kózi aıtyp turady. Sodan keıin olarǵa sheberlik sabaǵyn ótkizip: "Áı, shyraǵym, ol – mynandaı sóz ǵoı. Sen ony myna sebeppen, mynadaı maǵynada aıtyp tursyń" dep túsindirip turýǵa týra keledi, – deıdi Erlan Tóleýtaı.
Eske túsire ketsek, Qazaq handyǵynyń 550 jyldyǵyna oraı túsirilgen «Almas qylysh» fılmi jalpyulttyq prokatqa shyǵyp, odan 72 mln teńgeden astam qarjy jınaǵan. Al «Qazaq handyǵy» ataýymen shyqqan 10 serıaly kınotýyndy alǵash ret «31-arnada» kórsetilgen edi.
Naýryz aıynda «Qazaq handyǵy. Altyn taq» kınotýyndysynyń tusaýkeseri ótetinin habarlaımyz.
[embed]
[/embed]Jasulan Naýryzáli,
"Adyrna ulttyq" portaly.
