باتىل ادامدارمەن كەزدەسۋ

6597
Adyrna.kz Telegram

تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىلارى ۇلى وتان سوعىسىنىڭ ارداگەرلەرىن، تىل ەڭبەككەرلەرىن قۇتتىقتادى.

«ارداگەرلەردى ارداقتايىق» دەمەۋشىلىگىمەن ارداگەرلەردى قۇتتىقتاۋ زياتكەرلىك مەكتەپتىڭ يگى داستۇرىنە اينالعان. جىل وتكەن سايىن ولاردىڭ سانى ازايىپ بارادى، ناعىز باتىرلارمەن، پاتريوتتارمەن، عاجايىپ، باتىل ادامدارمەن وتكىزگەن ءاربىر مينۋتى اربىرىمىزگە قۇندى.

ۇوس ارداگەرى سارسەنباي قاڭتارباي اتامەن 10-سىنىپ وقۋشىلارى قۇتتىقتاپ قايتتى. سارسەنباي قاڭتارباي اتى اڭىزعا اينالعان قولباسشى باۋىرجان مومىشۇلى باسقارعان 9-گۆارديالىق اتقىشتار پولكىنىڭ قۇرامىندا شايقاسقان. بولىمشە كۇردەلى تاپسىرمانى – قۇپيا قارۋدى كۇزەتۋ ميسسياسىن ورىندادى. پولشانى، ليتۆانى، لاتۆيانى، ەستونيانى ازات ەتۋگە قاتىستى. مايداننان ورالعان اقساقال جۇرتپەن بىرگە ەلدى ىرگەسىنەن كوتەرىپ، پوشتاشى جانە مۇعالىم بولىپ جۇمىس ىستەدى.

99 جاستاعى ارداگەردى قازىر نۇرالى نەمەرەسى باعىپ وتىر.

 بىز ارقاشان قوعامىمىزدىڭ وتانعا دەگەن سۇيىسپەنشىلىك، ءبىر-بىرىمىزگە دەگەن قۇرمەت سياقتى رۋحاني قۇندىلىقتارىن جوعارى باعالايمىز. بۇگىندە بۇل رۋحاني قۇندىلىقتاردى سەندەر، جاس ۇرپاق، بۇرىنعىدان دا نىعايتىپ، كوبەيتۋ كەرەكسىندەر. ءبىز سەندەرگە سەنەمىز! — دەدى سوعىس ارداگەرى سارسەنباي قاڭتارباي ءوز سوزىندە.

9-سىنىپ وقۋشىلارى مەن اتا-انالارى ۇوس ارداگەرى پولىنكو ۆيكتور تروفيموۆيچكە قوناققا باردى. بالالار ونىڭ ءومىرى مەن قىزمەتى تۋرالى اڭگىمەلەرىن تىڭدادى. سوعىس جىلدارىندا سنارياد تيەۋشى بولىپ، ون جەتى جاسار جىگىت الماتى قالاسىنان مايدانعا اتتانعان. كەزدەسۋ بارىسىندا ونىمەن بىرگە وقۋشىلار وتكەن اسكەري ءومىرىنىڭ تاريحىن تىنداسا، ال ۆيكتور تروفموۆيچ وتكەن وقيعالاردى وكىنىشپەن ەسكە الدى ...

 بۇل سوعىس قايتالانباۋى ءۇشىن ونىڭ قاسىرەتىن ۇمىتۋعا قۇقىعىمىز جوق. قازىر ءومىر ءسۇرۋىمىز ءۇشىن قازا تاپقان جاۋىنگەرلەردى ۇمىتۋعا حاقىمىز جوق. ءبىز ءبارىن جادىمىزدا ۇستاۋعا مىندەتتىمىز...، — دەپ ءوز پىكىرىمەن 9-سىنىپ وقۋشىسى ايىم باۋىرجانقىزى ءبولىستى.

بارلىق سىنىپتاردا كۋراتورلىق ساعاتتار، «شاڭىراق» ساعاتتارى وتكىزىلدى. وقۋشىلار اتالارىنىڭ ەرلىكتەرى تۋرالى، قازاقستاننىڭ جەڭىسكە قوسقان ۇلەسى تۋرالى، ۇلى وتان سوعىسىنىڭ ماڭىزدى شايقاستارى تۋرالى اڭگىمەلەدى.

7-سىنىپ وقۋشىسى ءادينا مامبەتجانوۆا ارعى اتاسى ءدىنيسلام مامبەتجانوۆ تۋرالى اقپاراتپەن ءبولىستى.

مەنىڭ ارعى اتام – ءبىزدىڭ اۋلەتىمىزدىڭ باتىرى. بالا كەزىنەن وتە قاتال، زەردەلى ادام بولعان. سوعىسقا اتتانعاندا نەبارى 18 جاستا ەدى. سوعىستا اۋىر جارالانىپ، سوعان قاراماستان بۇكىل وتان سوعىسىن باسىنان وتكەرىپ، 50 جاسىندا بۇل دۇنيەدەن ءوتتى. بىراق ءبىز ءۇشىن دە، وتانى ءۇشىن دە ول ءالى ءتىرى، - دەپ باتىردىڭ شوبەرەسى اتاسىنىڭ فوتوسۋرەت تاريحىن ايتىپ بەردى.

سوعىس جىلدارىنداعى ەستەلىكتەر ۇرپاقتان-ۇرپاققا جالعاسۋدا. جىل سايىن زياتكەرلەرىمىز تالدىقورعان قالاسىنىڭ ۇلى وتان سوعىسىنىڭ ارداگەرلەرىمەن، ەڭبەككەرلەرىمەن كەزدەسىپ، اكتسيالار ۇيىمداستىرادى. بۇل جولى دا ارداگەرلەرگە، تىل ەڭبەككەرلەرىنە، قارتتارعا ازىق-تۇلىك سەبەتتەر تابىستادى.

سوعىس ەل ءۇشىن عانا ەمەس، ءاربىر جەكە ادام ءۇشىن قاشاندا اۋىر سىناق. سوڭعى جىلدارداعى تاريحىمىزدىڭ دەرەكتەرى قالاي وزگەرسە دە، 9 مامىر – جەڭىس كۇنى ماڭگى ەسىمىزدە.

پىكىرلەر