فۋتبول سۇيەر قاۋىم ءۇشىن وتكەن اپتا ماڭىزدى ماتچتارعا تولى بولدى. «مانچەستەر سيتي» «چەلسيدى» ەستە قالارلىقتاي جەڭىپ، پرەمەر-ليگا چەمپيونى اتاندى. قازاقستاندا جەرگىلىكتى پرەمەر-ليگانىڭ 10 تۋرى ويىندارى ءوتتى.
چەمپيوندىق سىرى: ەپتى شابۋىل، بەرىك قورعانىس
انگليانىڭ «مانچەستەر سيتي» كلۋبى وسى جىلى دا پرەمەر-ليگا كۋبوگىن ەشكىمگە بەرمەدى. «مانچەستەر ءسيتيدىڭ» باس باپكەرى پەپ گۆارديولانىڭ تاكتيكاسىنىڭ ارقاسىندا ولار ماۋسىم سوڭىندا كەرەمەت تۇراقتىلىقتى، تاباندىلىقتى جانە شەبەرلىكتى كورسەتتى.
كوماندا «ارسەنال» كلۋبىنىڭ 37-تۋردا «نوتتينگەم فورەست» كلۋبىنان 0:1 ەسەبىمەن جەڭىلگەنىنە بايلانىستى، ماۋسىم اياقتالماي تۇرىپ انگليا چەمپيونى اتاندى. كوماندانىڭ شابۋىلداعى ەپتىلىگى جانە قورعانىستاعى بەرىكتىگى ولاردى پرەمەر-ليگانىڭ چەمپيوندىققا جەتكىزگەن ۇزدىك ساپا بولعان سياقتى. سونىڭ ناتيجەسىندە «مانچەستەر سيتي» كلۋبى ءۇشىنشى جىل قاتارىنان انگليا چەمپيونى اتاندى.
انگليا پرەمەر ليگاسىنىڭ 37-تۋرىنىڭ اياسىندا «مانچەستەر سيتي» مەن لوندوندىق «چەلسي» كلۋبتارى كەزدەستى. «مانچەستەر سيتي» «چەلسي» كلۋبىن ءوز الاڭىندا انگليا چەمپيونى رەتىندە قارسى العان بولاتىن. سودان دا بولسا كەرەك، «مانچەستەر سيتي» بۇل ماتچتقا ءوزىنىڭ قوسالقى قۇرامىن سالدى. ناتيجەدە جەڭىس!
كەزدەسۋ 1:0 ەسەبىمەن الاڭ يەلەرىنىڭ جەڭىسىمەن اياقتالدى. كەزدەسۋدەگى جالعىز گولدىڭ اۆتورى - الەم چەمپيونى جانە «مانچەستەر سيتي» كلۋبىنىڭ شابۋىلشىسى حۋليان الۆارەس.
«چەلسي» بولسا، 37-تۋردىڭ قورىتىندىسى بويىنشا 43 ۇپايمەن تۋرنير كەستەسىندە 12 ورىندا تۇر. ويىن سوڭىندا انگليا چەمپيوندارىنا كۋبوك تابىستاۋ ءراسىمى ءوتتى.
قازاقشا ويىن: «قايرات» «قايساردان» جەڭىلدى
وسى دەمالىستا قازاقستان پرەمەر-ليگاسىنىڭ 10-تۋر ويىندارى وتكەن بولاتىن. ازىرگە تۋرنيردە «استانا» فۋتبول كومانداسى 25 ۇپايمەن كوش باستاسا، «ورداباسى» 23 ۇپايمەن 2 ورىندا، «قىزىل-جار 22 ۇپايمەن 3 ورىنعا جايعاستى.
وسى جەكسەنبىدە قازاقستان چەمپيوناتىنىڭ 10-تۋرىنىڭ اياسىندا الماتىلىق «قايرات» ءوز الاڭىندا قىزىلوردالىق «قايسارمەن» كەزدەسكەن بولاتىن.
الايدا ەسەپ اشۋ قوناقتاردىڭ ەنشىسىنە بۇيىردى. ءبىرىنشى تايمنىڭ 10 مينۋتىندا قوناق-كوماندانىڭ قورعاۋشىسى جۋان پەدرو وليۆەيرانىڭ تەپكەن دوبى «قايراتتىڭ» قاقپاسىنا ءدوپ تيسە، 22 مينۋتتا «قايسار» كلۋبىنىڭ جارتىلاي قورعاۋشىسى دميتري بورودين ايىپ دوبىمەن ەسەپتى 0:2 عىلدى.
ويىننىڭ 37 مينۋتىندا «قايرات» كومانداسىنىڭ گولى ويىننان تىس قالعاندىقتان ەسەپكە الىنبادى. ءبىرىنشى تايمنىڭ قوسىلعان ۋاقىتىندا بۇرىشتاما دوبى ويناتىلدى.
بۇدان كەيىن «قايرات» كلۋبىنىڭ جارتىلاي قورعاۋشىسى اندرەي ءۋلشيننىڭ قولىنا دوپ تيگەندىكتەن، تورەشى الماتىلىق كلۋبتىڭ قاقپاسىنا پانەلتي بەلگىلەگەن. ونى دميتري بورودين ورىنداپ، وسى ويىندا دۋبل جاسادى.
ەكىنشى تايمدا «قايرات» كلۋبى «قايسار» قاقپاسىنىڭ وسال تۇسىن تابا الماي ويىن 0:3 ەسەبىمەن قوناق كوماندانىڭ جەڭىسىمەن اياقتالدى. ويىن ناتيجەسى بويىنشا «قايسار» كلۋبى 3 ۇپاي الىپ، جالپى 16 ۇپايمەن قازاقستان چەمپيوناتىندا 7 ورىنعا، ال «قايرات» 18 ۇپايمەن 5 ورىنعا جايعاستى.
مۇحاممەتجان الپىسباي،
"ادىرنا" ۇلتتىق پورتالى
