Fýtbol súıer qaýym úshin ótken apta mańyzdy matchtarǵa toly boldy. «Manchester Sıtı» «Chelsıdi» este qalarlyqtaı jeńip, Premer-lıga chempıony atandy. Qazaqstanda jergilikti Premer-lıganyń 10 týry oıyndary ótti.
ChEMPIONDYQ SYRY: EPTI ShABÝYL, BERIK QORǴANYS
Anglııanyń «Manchester Sıtı» klýby osy jyly da Premer-lıga kýbogyn eshkimge bermedi. «Manchester Sıtıdiń» bas bapkeri Pep Gvardıolanyń taktıkasynyń arqasynda olar maýsym sońynda keremet turaqtylyqty, tabandylyqty jáne sheberlikti kórsetti.
Komanda «Arsenal» klýbynyń 37-týrda «Nottıngem Forest» klýbynan 0:1 esebimen jeńilgenine baılanysty, maýsym aıaqtalmaı turyp Anglııa chempıony atandy. Komandanyń shabýyldaǵy eptiligi jáne qorǵanystaǵy beriktigi olardy Premer-lıganyń chempıondyqqa jetkizgen úzdik sapa bolǵan sııaqty. Sonyń nátıjesinde «Manchester Sıtı» klýby úshinshi jyl qatarynan Anglııa chempıony atandy.
Anglııa Premer lıgasynyń 37-týrynyń aıasynda «Manchester Sıtı» men Londondyq «Chelsı» klýbtary kezdesti. «Manchester Sıtı» «Chelsı» klýbyn óz alańynda Anglııa chempıony retinde qarsy alǵan bolatyn. Sodan da bolsa kerek, «Manchester Sıtı» bul matchtqa óziniń qosalqy quramyn saldy. Nátıjede jeńis!
Kezdesý 1:0 esebimen alań ıeleriniń jeńisimen aıaqtaldy. Kezdesýdegi jalǵyz goldyń avtory - álem chempıony jáne «Manchester Sıtı» klýbynyń shabýylshysy Hýlıan Alvares.
«Chelsı» bolsa, 37-týrdyń qorytyndysy boıynsha 43 upaımen týrnır kestesinde 12 orynda tur. Oıyn sońynda Anglııa chempıondaryna kýbok tabystaý rásimi ótti.
QAZAQShA OIYN: «QAIRAT» «QAISARDAN» JEŃILDI
Osy demalysta Qazaqstan Premer-lıgasynyń 10-týr oıyndary ótken bolatyn. Ázirge týrnırde «Astana» fýtbol komandasy 25 upaımen kósh bastasa, «Ordabasy» 23 upaımen 2 orynda, «Qyzyl-Jar 22 upaımen 3 orynǵa jaıǵasty.
Osy jeksenbide Qazaqstan chempıonatynyń 10-týrynyń aıasynda almatylyq «Qaırat» óz alańynda qyzylordalyq «Qaısarmen» kezdesken bolatyn.
Alaıda esep ashý qonaqtardyń enshisine buıyrdy. Birinshi taımnyń 10 mınýtynda qonaq-komandanyń qorǵaýshysy Jýan Pedro Olıveıranyń tepken doby «Qaırattyń» qaqpasyna dóp tıse, 22 mınýtta «Qaısar» klýbynyń jartylaı qorǵaýshysy Dmıtrıı Borodın aıyp dobymen esepti 0:2 ǵyldy.
Oıynnyń 37 mınýtynda «Qaırat» komandasynyń goly oıynnan tys qalǵandyqtan esepke alynbady. Birinshi taımnyń qosylǵan ýaqytynda buryshtama doby oınatyldy.
Budan keıin «Qaırat» klýbynyń jartylaı qorǵaýshysy Andreı Ýlshınniń qolyna dop tıgendikten, tóreshi almatylyq klýbtyń qaqpasyna paneltı belgilegen. Ony Dmıtrıı Borodın oryndap, osy oıynda dýbl jasady.
Ekinshi taımda «Qaırat» klýby «Qaısar» qaqpasynyń osal tusyn taba almaı oıyn 0:3 esebimen qonaq komandanyń jeńisimen aıaqtaldy. Oıyn nátıjesi boıynsha «Qaısar» klýby 3 upaı alyp, jalpy 16 upaımen Qazaqstan chempıonatynda 7 orynǵa, al «Qaırat» 18 upaımen 5 orynǵa jaıǵasty.
Muhammetjan ALPYSBAI,
"Adyrna" ulttyq portaly
