بۇگىن وبلىس اكىمى نۇرلىبەك نالىباەۆ 1 ماۋسىم – حالىقارالىق بالالاردى قورعاۋ كۇنىنە وراي وبلىستىق مامانداندىرىلعان ءسابي ۇيىنە بارىپ، جۇمىسىمەن تانىستى.
ايماق باسشىسى «بار مەيىرىمىمىز – بالالارعا» اتتى ەرتەڭگىلىككە قاتىسىپ، بالالاردىڭ ونەرىن تاماشالادى. ولارعا مەرەكەلىك سىيلىق تابىستاپ، ەستەلىك سۋرەتكە ءتۇستى. ءىس-شارا بارىسىندا نۇرلىبەك ماشبەكۇلى مەكەمە تاربيەلەنۋشىسى ادىلبەك سانجاردىڭ تۇساۋىن كەسىپ، العاشقى قادامىنا اق جول تىلەدى.
ءارى قاراي وبلىس اكىمى ءسابي ۇيىندە 2022 جىلى دەمەۋشىلىك ارقىلى سالىنعان تۇزدى شاحتا بولمەسىن جانە 2020 جىلى ىسكە قوسىلعان سەنسورلىق بولمەنى، ەگۋ، ەمدىك-دەنەشىنىقتىرۋ، فيزيوتەراپيا كابينەتتەرىن ارالادى. ءۇش جىل بۇرىن مەكەمەگە قوندىرىلعان تسيفرلى بەينەباقىلاۋ جۇيەسىن، ءان-كۇي، مونتەسسوري كابينەتتەرىن، اتا-انا مەن بالانىڭ كەزدەسۋ بولمەسىن كورگەن ايماق باسشىسى ۇجىم ساتتىلىك تىلەپ، مەرەكەلىك سىيلىق تارتۋ ەتتى.
ايتا كەتەيىك، وبلىستىق ءسابي ءۇيى 2012 جىلى «ءسابي» قايىرىمدىلىق قورىنىڭ گۋمانيتارلىق كومەگىمەن اشىلدى. نىسان 60 ورىنعا ارنالعان، قازىرگى تاڭدا مۇندا 45 بالا تاربيەلەنۋدە.
