الماتىدا BALAFEST فەستيۆالى ءوتتى

حالىقارالىق بالالاردى قورعاۋ كۇنىنە وراي «الماتى BALAFEST – 2023» قالالىق بالالار فەستيۆالىنىڭ قورىتىندى ءىس-شاراسى ءوتتى. بالالاردى قورعاۋ كۇنىنە وراي ۇيىمداستىرىلعان بۇل مەرەكەلىك شارانىڭ قورىتىندى كەزەڭىنە 1200 بالا قاتىستى. فەستيۆال باعدارلاماسى تانىمدىق ويىنداردى، سپورتتىق ەستافەتالاردى، شەبەرلىك سىنىپتار مەن كورمەلەردى، كۆەستتەر جانە تەاتر قويىلىمدارى سياقتى كوپتەگەن ءىس-شارانى قامتىدى. ءار ايماقتا قولونەر (كرافت) ويىندارى، پوەتيكالىق باتتل، پلاستماسسانى ۇساقتاۋ بويىنشا جارىس (بوتەلكە قاقپاقتارى), بەينەلەۋ ونەرى بويىنشا شەبەرلىك ساباعى ۇيىمداستىرىلدى. فەستيۆال قالا وقۋشىلارىن، اتا-انالارى مەن پەداگوگتارىن بىرىكتىردى جانە ءار بالا ءۇشىن ناقتى مۇمكىندىكتەر كەڭىستىگىنە اينالدى. بالالار ءۇشىن فوتوايماق ۇيىمداستىرىلدى، وندا اركىم تانىمال سۋرەتشىلەرمەن، سپورتشىلارمەن، قولونەرشىلەرمەن، ارتىستەرمەن سۋرەتكە تۇسۋگە مۇمكىندىك الادى. باستى الاڭدا 2023 جىلدىڭ حالىقارالىق جانە رەسپۋبليكالىق زياتكەرلىك وليمپيادالاردىڭ 60 التىن مەدال يەگەرى ماراپاتتالدى. اتالعان جەتىستىكتەر ارقىلى الماتى قالاسىنىڭ قۇراما كومانداسى 18 جىل قاتارىنان «قر ەڭ ۇزدىك وليمپيادا كومانداسى» اتانىپ كەلەدى. فەستيۆال اياسىندا ەسترادا جۇلدىزدارى، بالالار حورەوگرافيالىق ۇجىمدارى مەن «جۇلدىزدى ءسات» قالالىق بايقاۋى ۆوكاليستەرىنىڭ قاتىسۋىمەن مەرەكەلىك كونتسەرت ءوتتى. ايتا كەتەيىك، «Almaty BALAFEST» فەستيۆالى العاش رەت مەملەكەت باسشىسىنىڭ قاتىسۋىمەن 2022 جىلى بالالار جىلى اياسىندا وتكەن بولاتىن.