الماتىدا قالا ءماسليحاتىنىڭ دەپۋتاتتارى مەن قوعامدىق كەڭەس مۇشەلەرىنىڭ بىرلەسكەن كەڭەيتىلگەن وتىرىسى ءوتتى. جيىن بارىسىندا الماتىنىڭ 2040 جىلعا دەيىنگى باس جوسپارىنا ەنگىزىلەتىن تۇزەتۋلەر ماسەلەسى قارالدى.
وتىرىسقا قاتىسۋشىلارعا باس جوسپاردى تۇزەتۋ جوباسى بويىنشا تولىققاندى تانىستىرىلىم ۇسىنىلىپ، بارلىق باعىت بويىنشا جان-جاقتى ءارى ناقتى اقپارات بەرىلدى.
الماتى اكىمىنىڭ ورىنباسارى بەيبىت شاحانوۆ بۇل كەزدەسۋ قۇجاتتىڭ نەگىزگى ەرەجەلەرىن الدىن الا تالقىلاۋعا، ەسكەرتۋلەر مەن ۇسىنىستاردى ەسكەرۋگە باعىتتالعانىن اتاپ ءوتتى. ونىڭ ايتۋىنشا، بۇل ۇسىنىستار جوبانى كەڭ كولەمدە قوعامدىق تالقىلاۋعا شىعارۋدا ماڭىزدى ءرول اتقارادى.
«جوبانىڭ قوعامدىق تالقىلاۋى بيىل 24–26 جەلتوقسان ارالىعىندا وتەدى. ءبىزدىڭ ورتاق مىندەتىمىز — قالا دامۋىنىڭ مۇددەسى مەن ستراتەگيالىق باعىتتارىن ايقىن كورسەتەتىن، جان-جاقتى ءارى ساپالى پىسىقتالعان قۇجاتتى ۇسىنۋ. الدىمىزدا ۇسىنىلعان جوبانى تالقىلاۋدىڭ بارىنشا اشىق، ينكليۋزيۆتى جانە كاسىبي ۇدەرىسىن قامتاماسىز ەتۋ مىندەتى تۇر»، — دەدى بەيبىت شاحانوۆ.
ءوز كەزەگىندە قالالىق ءماسليحاتتىڭ قۇرىلىس، ساۋلەت، قالا قۇرىلىسى، جەر قاتىناستارى جانە قوعامدىق كەڭىستىكتەردى دامىتۋ جونىندەگى كوميسسياسىنىڭ توراعاسى داۋرەن مارالوۆ باس جوسپاردى تۇزەتۋ قالا دامۋىنىڭ جوعارى قارقىنى جاعدايىندا تەڭگەرىمدى دامۋدى قامتاماسىز ەتۋ، سونداي-اق مەملەكەت باسشىسىنىڭ تاۋ بوكتەرىندە قۇرىلىس سالۋعا تىيىم سالۋ جونىندەگى تاپسىرماسىن ەسكەرۋ ءۇشىن قاجەت ەكەنىن ايتتى.
«حالىق سانىنىڭ ءوسۋى الەۋمەتتىك ينفراقۇرىلىمدى ەداۋىر كۇشەيتۋدى تالاپ ەتەدى. 2030 جىلعا دەيىن 107,5 مىڭ وقۋشى ورنى، 101,5 مىڭ بالاباقشا ورنى، 1,2 ملن شارشى مەتر مەديتسينالىق نىساندار، سونداي-اق مادەنيەت، ساۋدا جانە ءورت قاۋىپسىزدىگى وبەكتىلەرىنىڭ دامىعان جەلىسىن سالۋ قاجەت. پوليورتالىقتاردى دامىتۋ ەرەكشە ماڭىزعا يە. بۇل ماياتنيكتىك كوشى-قوندى ازايتىپ، ەكونوميكالىق بەلسەندىلىكتى قايتا بولۋگە مۇمكىندىك بەرەدى. قازىرگى تاڭدا كۇن سايىن ورتالىققا شامامەن 600 مىڭ ساپار جاسالادى. پوليورتالىقتاردى قالىپتاستىرۋ كولىك جۇيەسىنە تۇسەتىن جۇكتەمەنى ازايتىپ، ءومىر ساپاسىن ارتتىرۋعا جول اشادى. وسى تۇرعىدا باس جوسپاردى تۇزەتۋ — فورمالدىلىق ەمەس، قالا ءۇشىن اسا قاجەتتى قادام. بۇل جۇمىستى قولدايمىن جانە ونى قالانىڭ بولاشاعى ءۇشىن ستراتەگيالىق ماڭىزى بار دەپ ەسەپتەيمىن»، — دەدى داۋرەن مارالوۆ.
قالالىق قوعامدىق كەڭەستىڭ توراعاسى ماحامبەت حاسەنوۆ تە ءوز سوزىندە باس جوسپاردى تۇزەتۋ جوباسىن قولدايتىنىن ايتتى. ونىڭ ايتۋىنشا، قۇجات مەگاپوليستىڭ نەگىزگى ەكولوگيالىق مىندەتتەرىنە تولىق جاۋاپ بەرەدى.
«تۇزەتۋ جاسىل ايماقتاردىڭ اۋماعىن ءۇش ەسەدەن اسا ۇلعايتىپ، 3 800 گەكتارعا دەيىن جەتكىزۋدى كوزدەيدى. بۇل جاڭا ورمان مەن ساياباقتار سالۋدى، وزەن اڭعارلارىن قورعاۋدى جانە قالانىڭ ءبىرتۇتاس ەكولوگيالىق قۇرىلىمىن قالىپتاستىرۋدى قامتيدى. سونىمەن قاتار قۇرىلىس تىعىزدىعىن تومەندەتۋگە ەرەكشە كوڭىل بولىنگەن: بۇرىنعى گەكتارىنا 330 ادام ءنورماتيۆىنىڭ ورنىنا شامامەن 260 ادام دەڭگەيى قاراستىرىلىپ وتىر. بۇل ينفراقۇرىلىمنىڭ شامادان تىس جۇكتەلۋىنىڭ الدىن الىپ، كولىككە تۇسەتىن قىسىمدى ازايتىپ، شاعىنكليماتتى جاقسارتۋعا مۇمكىندىك بەرەدى. اتالعان جايتتاردىڭ بارلىعى جوبانىڭ ۋاقىتىلى، نەگىزدى ءارى الماتىلىقتاردىڭ ءومىر ساپاسىن ارتتىرۋعا باعىتتالعانىن كورسەتەدى»، — دەدى ول.
وتىرىس قورىتىندىسى بويىنشا ءماسليحات دەپۋتاتتارى مەن قوعامدىق كەڭەس مۇشەلەرى باس جوسپاردى تۇزەتۋ جوباسىن قولدادى. قوعام وكىلدەرى ۇسىنعان بارلىق ەسكەرتۋ مەن ۇسىنىس جۇيەلەنىپ، قۇجاتتى ودان ءارى پىسىقتاۋ بارىسىندا ەسكەرىلەتىن بولادى.
