قازاقستاندىق Shymbulak تاۋ كۋرورتى حالىقارالىق SKI BUSINESS AWARDS 2026 سىيلىعىنىڭ جەڭىمپازى اتاندى، دەپ حابارلايدى “ادىرنا”.
ماراپات كۋرورتتىڭ تۇراقتى قوناقتارىنا ارنالعان Velvet Shymbulak Club باعدارلاماسىنا بەرىلدى.
بۇل تۋرالى Shymbulak Mountain Resort كوممۋنيكاتسيالار دەپارتامەنتى حابارلادى.
ماراپاتتاۋ ءراسىمى 28 قازاندا ماسكەۋدە وتكەن تۋريستىك اۋماقتار فورۋمى اياسىندا ۇيىمداستىرىلدى. Velvet Shymbulak Club «پرەميۋم ساناتىنداعى قوناقتارمەن جۇمىس ىستەۋگە ارنالعان ۇزدىك تاۋ شاڭعىسى جوباسى» اتالىمىندا ۇزدىك دەپ تانىلدى.
Velvet Shymbulak Club – كۋرورتقا تۇراقتى كەلەتىن قوناقتارعا ارنالعان ارنايى باعدارلاما. ونىڭ مۇشەلەرى جىل بويى اسپالى جولداردى پايدالانىپ، جەكە سۇرانىستارىنا ساي قىزمەتتەردى الا الادى. سونداي-اق دەمالىس ايماعى مەن SPA قىزمەتتەرىنە قول جەتكىزىپ، تاۋ شاڭعىسى جابدىقتارىنا تەحنيكالىق قىزمەت كورسەتكىزە الادى.
باعدارلامانىڭ باستى ەرەكشەلىكتەرىنىڭ ءبىرى – First Track قىزمەتى. ول قوناقتارعا جاڭادان دايىندالعان شاڭعى تراسسالارىنا العاشقىلاردىڭ ءبىرى بولىپ شىعۋعا مۇمكىندىك بەرەدى.
Shymbulak Mountain Resort باس ديرەكتورى رينات ابدراحمانوۆتىڭ ايتۋىنشا، بۇل ماراپات ۇجىمنىڭ قىزمەت كورسەتۋ ساپاسىن ارتتىرۋ باعىتىنداعى ەڭبەگىنە بەرىلگەن باعا.
ايتا كەتەيىك، Shymbulak كۋرورتى بۇعان دەيىن دە SKI BUSINESS AWARDS سىيلىعىنىڭ بىرنەشە اتالىمىندا جەڭىمپاز اتانعان. اتاپ ايتقاندا، 2021 جانە 2023 جىلدارى «ۇزدىك تاۋ شاڭعىسى كۋرورتى» اتالىمىن يەلەنسە، 2024 جىلى تمد ەلدەرى اراسىنداعى ۇزدىك تاۋ شاڭعىسى كۋرورتى دەپ تانىلعان. 2025 جىلى دا وسى ساناتتاعى ماراپاتقا يە بولدى.
قازىرگى ۋاقىتتا كۋرورت الماتى تاۋ كلاستەرىن دامىتۋ باعدارلاماسىنا قاتىسىپ، جاڭا اسپالى جولدار سالۋ، شاڭعى تەبۋ اۋماعىن كەڭەيتۋ جانە قولدانىستاعى ينفراقۇرىلىمدى جاڭعىرتۋ جۇمىستارىن جالعاستىرىپ كەلەدى. كۋرورت جىل سايىن شامامەن 1,5 ميلليون ءتۋريستى قابىلدايدى.
