Qazaqstandyq Shymbulak tau kurorty halyqaralyq SKI BUSINESS AWARDS 2026 syilyǧynyŋ jeŋımpazy atandy, dep habarlaidy “Adyrna”.
Marapat kurorttyŋ tūraqty qonaqtaryna arnalǧan Velvet Shymbulak Club baǧdarlamasyna berıldı.
Būl turaly Shymbulak Mountain Resort kommunikasiialar departamentı habarlady.
Marapattau räsımı 28 qazanda Mäskeude ötken Turistık aumaqtar forumy aiasynda ūiymdastyryldy. Velvet Shymbulak Club «Premium sanatyndaǧy qonaqtarmen jūmys ısteuge arnalǧan üzdık tau şaŋǧysy jobasy» atalymynda üzdık dep tanyldy.
Velvet Shymbulak Club – kurortqa tūraqty keletın qonaqtarǧa arnalǧan arnaiy baǧdarlama. Onyŋ müşelerı jyl boiy aspaly joldardy paidalanyp, jeke sūranystaryna sai qyzmetterdı ala alady. Sondai-aq demalys aimaǧy men SPA qyzmetterıne qol jetkızıp, tau şaŋǧysy jabdyqtaryna tehnikalyq qyzmet körsetkıze alady.
Baǧdarlamanyŋ basty erekşelıkterınıŋ bırı – First Track qyzmetı. Ol qonaqtarǧa jaŋadan daiyndalǧan şaŋǧy trassalaryna alǧaşqylardyŋ bırı bolyp şyǧuǧa mümkındık beredı.
Shymbulak Mountain Resort bas direktory Rinat Abdrahmanovtyŋ aituynşa, būl marapat ūjymnyŋ qyzmet körsetu sapasyn arttyru baǧytyndaǧy eŋbegıne berılgen baǧa.
Aita keteiık, Shymbulak kurorty būǧan deiın de SKI BUSINESS AWARDS syilyǧynyŋ bırneşe atalymynda jeŋımpaz atanǧan. Atap aitqanda, 2021 jäne 2023 jyldary «Üzdık tau şaŋǧysy kurorty» atalymyn ielense, 2024 jyly TMD elderı arasyndaǧy üzdık tau şaŋǧysy kurorty dep tanylǧan. 2025 jyly da osy sanattaǧy marapatqa ie boldy.
Qazırgı uaqytta kurort Almaty tau klasterın damytu baǧdarlamasyna qatysyp, jaŋa aspaly joldar salu, şaŋǧy tebu aumaǧyn keŋeitu jäne qoldanystaǧy infraqūrylymdy jaŋǧyrtu jūmystaryn jalǧastyryp keledı. Kurort jyl saiyn şamamen 1,5 million turistı qabyldaidy.
