Almaty halyqaralyq äuejaiyna qatysty 5 jastaǧy İnsaf esımdı qyzdyŋ ölımıne bailanysty sotqa talap aryz berıldı, dep habarlaidy "Adyrna" ūlttyq portaly.
Marqūm büldırşınnıŋ otbasyn qorǧauşy advokat Dänılhan Şaǧataevtyŋ aituynşa, Niu-Deliden Air Astana reisımen kelgen qyz auyr hälde bolǧanyna qaramastan, äuejaida jalpy tärtıp boiynşa pasporttyq baqylaudan ötuge mäjbür bolǧan. Sonymen qatar, oǧan qajettı arnaiy jedel järdem kölıgı emes, mügedekterge arnalǧan arba ūsynylǧan.
Qaiǧyly oqiǧa 2025 jyldyŋ qaŋtar aiynda oryn aldy. İnsaf ata-anasy jäne reanimatolog därıgermen bırge ūşyp kelgen. Ūşu barysynda ol ottegımen, arnaiy medisinalyq jaǧdaida tasymaldanǧan. Alaida Almaty äuejaiyna qonǧan soŋ, arnaiy reanimobil kıre almai, oǧan rūqsat berılmegen. Sol sebeptı, qyz ambulift arqyly ūşaqtan terminalǧa jetkızılgen. Būl qūrylǧy mügedek jolauşylarǧa arnalsa da, auyr häldegı balany tasymaldauǧa beiımdelmegen.
Advokattyŋ aituynşa, äuejaidaǧy jaǧdai ūşuǧa deiıngı daiyndyqqa müldem qaişy bolǧan. "Bala arnaiy medisinalyq baqylau arqyly emes, ädettegı jolauşylar sekıldı pasporttyq tekserısten öttı", – dedı ol.
Ūşudan keiın İnsaf qos ökpesınen pnevmotoraks alyp, jansaqtau bölımıne tüstı. Ökınışke qarai, 9 aqpanda köz jūmdy.
Türksıb audandyq soty balanyŋ otbasynan tüsken talap aryzdy qabyldap, azamattyq ıstı qarauǧa daiyndaudy bastady.
Air Astana kompaniiasy öz tarapynan äuejai qyzmetterın aldyn ala eskertkenı turaly mälımdedı. Al äuejai ökılderı mügedek arba äkelıngenın tüsındırmegenımen, jedel järdem kölıgın şaqyrudy ūsynǧandaryn, bıraq ata-anasy būl ūsynystan bas tartqanyn alǧa tartty.
