الماتىدا مەكتەپ وقۋشىلارى اراسىندا جاساندى ينتەللەكت بويىنشا ءۇشىنشى حالىقارالىق FAIO 2026 وليمپياداسى اياقتالدى. «كسەلل» اق activ برەندىمەن وليمپياداعا باس سەرىكتەس رەتىندە قولداۋ كورسەتتى.
بيىلعى جارىسقا قىزىعۋشىلىق بۇرىنعى جىلدارمەن سالىستىرعاندا ايتارلىقتاي ارتتى. ىرىكتەۋ كەزەڭىنە 28 ەلدەن شامامەن 1500 وقۋشى قاتىسىپ، ولاردىڭ اراسىنان 16 مەملەكەتتەن 47 كوماندا الماتى قالاسىندا وتكەن فينالعا جولداما الدى. قاتىسۋشىلار ءۇش كۇن بويى ماشينامەن وقىتۋ، دەرەكتەردى تالداۋ جانە باعدارلامالاۋ باعىتتارى بويىنشا زاماناۋي IT-يندۋستريانىڭ ناقتى مىندەتتەرىنە نەگىزدەلگەن پراكتيكالىق تاپسىرمالاردى ورىندادى. وليمپيادانىڭ جۇلدە قورى 11 ميلليون تەڭگەنى قۇرادى.
ء«ۇش جىلدىڭ ىشىندە FAIO جەرگىلىكتى باستامادان الەمنىڭ تۇكپىر-تۇكپىرىنەن كەلگەن مەكتەپ وقۋشىلارىن بىرىكتىرەتىن حالىقارالىق وليمپياداعا اينالدى. وسىنداي جوبالاردى قولداۋ تەحنولوگيالار مەن تسيفرلىق ەكونوميكانى دامىتۋعا ۇلەس قوساتىن جاڭا بۋىن ماماندارىن قالىپتاستىرۋعا مۇمكىندىك بەرەدى»، — دەدى «كسەلل» اق قوعاممەن بايلانىس ءبولىمىنىڭ باسشىسى بايرام ازيزوۆ.
FAIO نەگىزىن قالاۋشى ءارى تانىمال جي ساراپشىلار قۋانىش وتەۋ مەن ءادىلحان توقتاعانوۆ وليمپيادانى حالىقارالىق دەڭگەيگە شىعارۋعا، جاساندى ينتەللەكت سالاسىنداعى بولاشاق مامانداردى ەرتە انىقتاۋعا جانە قولداۋعا ارنالعان ءتيىمدى الاڭ قالىپتاستىرۋعا كوپ ەڭبەك ءسىڭىردى.
FAIO مەكتەپ وقۋشىلارى اراسىندا وتكىزىلەتىن جاساندى ينتەللەكت سالاسىنداعى ەڭ ءىرى حالىقارالىق وليمپيادالاردىڭ ءبىرى بولىپ سانالادى. باستاما جاستاردىڭ ينجەنەرلىك ويلاۋعا، زەرتتەۋ داعدىلارىن جانە وزىق تەحنولوگيالارعا قىزىعۋشىلىعىن دامىتۋعا باعىتتالعان. تاپسىرمالاردى جاساندى ينتەللەكت سالاسىنداعى تاجىريبەلى ماماندار مەن زەرتتەۋشىلەر ازىرلەيدى، ال ناتيجە تيىمدىلىك مەن ساپاسى بويىنشا باعالانادى.
