الماتىدا جاستارعا ارنالعان كوميۋنيتي-ورتالىقتاردىڭ جۇمىسىن جاڭعىرتۋ جوسپارلانىپ وتىر.
2027 جىلدان باستاپ ولاردى بىرىڭعاي قالالىق جەلىگە بىرىكتىرۋ ۇسىنىلدى. بۇل باستاما قىزمەت كورسەتۋ ساپاسىن ارتتىرۋعا، ورتالىقتاردىڭ جۇمىسىن ءتيىمدى ۇيلەستىرۋگە جانە بيۋدجەت شىعىندارىن قىسقارتۋعا باعىتتالعان. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى حابارلادى.
قازىر قالادا 13 كوميۋنيتي-ورتالىق جۇمىس ىستەيدى. مۇندا جاستار جۇمىس ىزدەۋ بويىنشا تەگىن كومەك الىپ، ءبىلىم بەرۋ ماسەلەسى جونىندە كەڭەس الا الادى. سونداي-اق پسيحولوگيالىق جانە قۇقىقتىق قولداۋ كورسەتىلەدى. بۇدان بولەك، ورتالىقتاردا وقىتۋ ساباقتارى، مادەني جانە سپورتتىق ءىس-شارالار ۇيىمداستىرىلادى.
2026 جىلى توعىز ايدا ورتالىقتارعا 510 مىڭ رەت كەلۋ تىركەلگەن. وسى كەزەڭدە 2 200 ءىس-شارا وتكىزىلىپ، 10,6 مىڭ جەكە كەڭەس بەرىلگەن. ونىڭ 7,4 مىڭى جۇمىسقا ورنالاسۋعا، تاعى 2,6 مىڭى پسيحولوگيالىق جانە قۇقىقتىق ماسەلەگە قاتىستى بولعان.
كەڭەس بەرۋ قىزمەتتەرىنەن بولەك، كەلۋشىلەرگە كوۆوركينگ كەڭىستىكتەرى، كىتاپحانا رەسۋرستارى مەن كەزدەسۋلەر وتكىزۋگە ارنالعان الاڭدار بار. اسىرەسە، ەش جەردە جۇمىس ىستەمەيتىن، ءبىلىم المايتىن جانە كاسىبي دايارلىقتان وتپەيتىن NEET ساناتىنداعى جاستاردى قولداۋعا باسىمدىق بەرىلگەن. ماماندار ولارعا ماماندىق تاڭداۋعا، جاڭا داعدىلاردى يگەرۋگە جانە ەڭبەك نارىعىنان ءوز ورنىن تابۋعا كومەكتەسەدى.
ورتالىقتاردا جاستار مەن ەرىكتىلىك قاۋىمداستىقتار دا جۇمىس ىستەپ، ءتۇرلى جوبالار جۇزەگە اسىرىلادى. اتاپ ايتقاندا، Youth Nomads ۇلتتىق سپورت تۇرلەرى فەستيۆالىنە مىڭ ادام قاتىسسا، Jas Camp باعدارلاماسى اياسىندا 100 جاس ون جوبالىق كومانداعا بىرىكتى.
جوسپارلانعان وزگەرىستەرگە سايكەس، ورتالىقتاردا ورتاق باسقارۋ جۇيەسى ەنگىزىلىپ، ازاماتتاردىڭ وتىنىشتەرى ەلەكتروندى فورماتتا تىركەلمەك. سونىمەن بىرگە ءار ورتالىقتىڭ جۇمىس ناتيجەسىن باعالاۋ تەتىگى قالىپتاستىرىلادى.
جاستارعا كورسەتىلەتىن قىزمەتتەردىڭ قولجەتىمدىلىگىن ارتتىرۋ ءۇشىن كوشپەلى كەڭەس بەرۋ جۇمىستارى دا قولعا الىنباق. ماماندار بازارلار مەن حالىق كوپ شوعىرلاناتىن ورىندارعا بارىپ، بوس جۇمىس ورىندارى، وقۋ كۋرستارى جانە كاسىبي دامۋ مۇمكىندىكتەرى تۋرالى اقپارات بەرەدى.
باسقارمانىڭ ەسەپتەۋىنشە، ون كوميۋنيتي ورتالىقتى بىرىكتىرۋ جىل سايىن شامامەن 100 ملن تەڭگە بيۋدجەت قاراجاتىن ۇنەمدەۋگە مۇمكىندىك بەرەدى.
بۇل قارجىنىڭ ءبىر بولىگىن جاستارعا ارنالعان جاڭا باستامالارعا جۇمساۋ ۇسىنىلىپ وتىر. بوستاندىق اۋدانىنداعى كوميۋنيتي ورتالىق بازاسىندا OI LAB تالداۋ ورتالىعىن اشۋ جوسپارلانعان. ول جاستاردىڭ قاجەتتىلىكتەرىن، قىزىعۋشىلىقتارى مەن ماسەلەسىن زەرتتەپ، قالالىق باعدارلامالارعا قاتىستى ۇسىنىستار ازىرلەۋمەن اينالىسادى.
باسقارمانىڭ ەسەپتەۋىنشە، ون كوميۋنيتي-ورتالىقتى بىرىكتىرۋ جىل سايىن شامامەن 100 ملن تەڭگە بيۋدجەت قاراجاتىن ۇنەمدەۋگە مۇمكىندىك بەرەدى. بۇل قارجىنىڭ ءبىر بولىگىن جاستارعا ارنالعان جاڭا باستامالارعا جۇمساۋ ۇسىنىلىپ وتىر.
باسقارمانىڭ مالىمەتىنشە، كوميۋنيتي ورتالىقتاردى بىرىكتىرۋ جانە جاڭا جوبالاردى ىسكە قوسۋ باستامالارى ازىرگە تالقىلانىپ جاتىر. تۇپكىلىكتى شەشىم ءالى قابىلدانعان جوق.
