الماتى قالاسىنىڭ اكىمى دارحان ساتىبالدى قالا ءۇشىن ەكولوگيالىق كۇن ءتارتىبىنىڭ باسىم باعىت ەكەنىن مالىمدەدى. ونىڭ ايتۋىنشا، 2026 جىلدىڭ سوڭىنا دەيىن الماتىداعى جەو-2-ءنى تولىقتاي تابيعي گازعا كوشىرۋ جوسپارلانىپ وتىر. سونىمەن قاتار، جەو-3 نىسانىن بۋ-گاز تەحنولوگياسىنا كوشىرۋ ارقىلى قايتا جاڭعىرتۋ جۇمىستارى جۇرگىزىلۋدە. بۇل شارالار جىلۋ كوزدەرىنەن بولىنەتىن زياندى شىعارىندىلاردى جيىنتىعىندا 92 پايىزعا دەيىن ازايتۋعا مۇمكىندىك بەرەدى، دەپ حابارلايدى «ادىرنا» ۇلتتىق پورتالى.
اكىمنىڭ مالىمەتىنشە، 2027 جىلعا قاراي جەكە سەكتور تولىقتاي، ياعني 100 پايىز گازبەن قامتىلادى. ال 2028 جىلعا دەيىن قالاداعى قوعامدىق كولىك باعىتتارىن كەزەڭ-كەزەڭىمەن ەكولوگيالىق تازا كولىك تۇرلەرىنە كوشىرۋ كوزدەلىپ وتىر.
سونداي-اق قاتتى تۇرمىستىق قالدىقتاردى باسقارۋ جۇيەسىن جەتىلدىرۋ باعىتىندا كەشەندى جۇمىستار جوسپارلانعان. اتاپ ايتقاندا، قالدىقتاردى پوليگونداردا كومۋ تاجىريبەسىنەن باس تارتىپ، ولاردى تەرەڭ قايتا وڭدەۋ جانە ەنەرگيا الۋ ماقساتىندا كادەگە جاراتۋعا كوشۋ قاراستىرىلۋدا. وسى ماقساتتا جىلىنا 80 مىڭ تونناعا دەيىن پلاستيكتى وڭدەيتىن، سونداي-اق قۋاتتىلىعى 150 مىڭ توننا ماكۋلاتۋرانى قايتا وڭدەۋگە ارنالعان زاۋىتتار سالۋ جوسپارلانىپ وتىر.
قايتا وڭدەۋگە كەلمەيتىن قالدىقتاردى ورتەۋ ارقىلى جويۋ كوزدەلگەن. ول ءۇشىن تاۋلىگىنە 2 مىڭ توننا قوقىستى وڭدەي الاتىن قوقىس ورتەۋ زاۋىتىن سالۋ جوسپارلانۋدا. قابىلدانعان شارالاردىڭ ناتيجەسىندە 2030 جىلعا قاراي كوممۋنالدىق قالدىقتاردى قايتا وڭدەۋ جانە كادەگە جاراتۋ ۇلەسى قازىرگى 17,3 پايىزدان 37 پايىزعا دەيىن وسەدى دەپ كۇتىلۋدە.
«ەكولوگيالىق كۇن ءتارتىبى قالا ءۇشىن باسىم باعىت بولىپ قالا بەرەدى. ەكولوگيالىق ءىس-شارالاردى جۇزەگە اسىرۋ قالا تۇرعىندارىنىڭ ءومىر ءسۇرۋ ساپاسىن ارتتىرۋدىڭ، قاۋىپسىز ءارى ورنىقتى زاماناۋي قالا قالىپتاستىرۋدىڭ نەگىزگى شارتى رەتىندە قاراستىرىلادى»، — دەدى الماتى قالاسىنىڭ اكىمى دارحان ساتىبالدى.
