الماتىنىڭ مەدەۋ اۋدانىنداعى №56 ق. ساتباەۆ اتىنداعى گيمنازيا مەن №17 مەكتەپ-ينتەرنات كۇردەلى جوندەۋدەن كەيىن قايتا اشىلدى. جاڭا زەرتحانالار، جاڭارتىلعان وقۋ كابينەتتەرى مەن سپورت الاڭدارى وقۋشىلاردىڭ يگىلىگىنە بەرىلدى. بۇگىن گيمنازيانىڭ 1 400 وقۋشىسى مەن مەكتەپ-ينتەرناتتىڭ 166 تاربيەلەنۋشىسى جاڭارتىلعان عيماراتتاردا وقۋىن جالعاستىردى.
№56 گيمنازيادا عىلىم مەن تەحنولوگيانى مەڭگەرۋگە مۇمكىندىك جاسالدى. مۇندا روبوتوتەحنيكا كابينەتى مەن زاماناۋي زەرتحاناسى بار STEM كابينەتى اشىلدى. فيزيكا جانە حيميا زەرتحاناسى جاڭارتىلىپ، وقۋ كابينەتتەرى جاڭا جيھازبەن جانە كومپيۋتەرلىك تەحنيكامەن جابدىقتالدى.
ساباقتان تىس ۋاقىتتا پايدالانىلاتىن ورىندار دا جاڭاردى. ءماجىلىس زالى كەڭىرەك بولمەگە كوشىرىلىپ، جاڭا جابدىقتارمەن قامتاماسىز ەتىلدى. كىتاپحانا جاڭعىرتىلدى. سپورت زالى كەڭەيتىلىپ، دۋش بولمەسى بار كيىم اۋىستىراتىن ورىندار جابدىقتالدى. گيمنازيا اۋماعىنداعى فۋتبول جانە باسكەتبول الاڭدارى، جۇگىرۋ جولى دا جاڭارتىلدى.
№17 مەكتەپ-ينتەرناتتا وقۋ جانە جاتىن بولمەلەرىنىڭ ءبارى جوندەۋدەن ءوتتى. بالالار مۇندا اپتاسىنا بەس كۇن بولعاندىقتان، وقۋ كابينەتتەرىن جابدىقتاۋمەن قاتار، ولاردىڭ تۇرمىس جاعدايىنا دا ەرەكشە كوڭىل ءبولىندى. جاتىن بولمەلەرگە جاڭا كەرەۋەتتەر مەن جيھازدار قويىلدى. 120 ورىندىق اسحانا جاڭا تەحنيكامەن جابدىقتالدى. تاربيەلەنۋشىلەر كۇنىنە بەس رەت ىستىق تاماقپەن قامتاماسىز ەتىلەدى.
تاريح، بيولوگيا جانە اعىلشىن ءتىلى كابينەتتەرى زاماناۋي قۇرال-جابدىقتارمەن تولىقتى. مەكتەپ-ينتەرناتقا ينتەراكتيۆتى تاقتالار ورناتىلىپ، سپورت زالى مەن سپورت الاڭى جاڭارتىلدى.
عيماراتتاردىڭ قاۋىپسىزدىگىنە دە ايرىقشا نازار اۋدارىلدى. №17 مەكتەپ-ينتەرناتتا سەيسميكالىق كۇشەيتۋ جۇمىستارى جۇرگىزىلدى. ال №56 گيمنازيادا ينجەنەرلىك جەلىلەر، بەينەباقىلاۋ جانە ءورت دابىلى جۇيەلەرى جاڭارتىلدى.
جاڭارتىلعان عيماراتتارعا ورالعان وقۋشىلار ەكىنشى توقساندى جايلى ءارى قاۋىپسىز ورتادا باستادى. ەندى ولاردىڭ ساپالى ءبىلىم الىپ، شىعارماشىلىقپەن اينالىسۋىنا جانە سپورتپەن شۇعىلدانۋىنا بارلىق جاعداي جاسالعان.
