2026 جىلى 25 قازاندا الماتىدا ۇلكەن جانە كىشى الماتى شاتقالدارىن تازارتۋ بويىنشا اۋقىمدى ەكولوگيالىق اكتسيا ءوتتى. ءىس-شاراعا اكىمدىك پەن ۇلتتىق پارك قىزمەتكەرلەرى، جاستار ۇيىمدارىنىڭ وكىلدەرى، ەرىكتىلەر جانە تابيعات جاناشىرلارى قاتىستى.
اكتسيانىڭ باستى ماقساتى – تابيعي اۋماقتاردى تۇرمىستىق قالدىقتاردان تازارتۋ عانا ەمەس، سونىمەن قاتار ەكولوگيالىق مادەنيەتتى قالىپتاستىرۋ، الماتىنىڭ بىرەگەي تابيعاتىن ساقتاۋدا تۇرعىندار مەن تۋريستەردىڭ جەكە جاۋاپكەرشىلىگىن ارتتىرۋ.
تاۋ شاتقالدارى – قالاداعى تۋريستەر ەڭ كوپ باراتىن ورىنداردىڭ ءبىرى. تۋريستەر سانى ارتقان سايىن قورشاعان ورتاعا تۇسەتىن جۇكتەمە دە كوبەيەدى. تازالىق جۇمىستارى تۇراقتى جۇرگىزىلگەنىمەن، كەيبىر كەلۋشىلەر قوقىس جيناماي كەتىپ، تابيعي اۋماقتاردى لاستاپ، ەكوجۇيەگە زيان كەلتىرۋىن جالعاستىرىپ كەلەدى.
تاۋلاردىڭ تازالىعىن ساقتاۋ – كوممۋنالدىق جانە تابيعات قورعاۋ قىزمەتتەرىنىڭ عانا ەمەس، ءاربىر كەلۋشىنىڭ دە جاۋاپكەرشىلىگى. ادامدار تابيعاتقا جاناشىرلىق تانىتپاسا، ءتىپتى اۋقىمدى ەكولوگيالىق اكتسيانىڭ ءوزى بۇل ماسەلەنى شەشە المايدى.
قۇقىق بۇزۋشىلىقتاردىڭ الدىن الۋ ماقساتىندا الماتى قالاسىنىڭ پوليتسيا دەپارتامەنتى تاۋلى اۋماقتاردى باقىلاۋ مەن پاترۋلدەۋ شارالارىن كۇشەيتتى. تازالىقتى ساقتاۋ، قۇقىق بۇزۋشىلىقتاردىڭ الدىن الۋ جانە ەكولوگيالىق باقىلاۋدى كۇشەيتۋ جۇمىستارى تۇراقتى تۇردە جالعاسادى.
الماتى تاۋلارىنىڭ تازالىعى – بارشامىزعا ورتاق جاۋاپكەرشىلىك. تابيعات اياسىندا دەمالۋعا كەلگەن ءاربىر ادام قوقىس قالدىرماي، قورشاعان ورتاعا ۇقىپتى قاراۋ سىندى قاراپايىم قاعيدانى ۇستانۋعا ءتيىس.
