الماتى قالاسىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «ادىلەتتى قوعامعا – شىنشىل ءسوز» اتتى كىتابىن جاستار اراسىندا ناسيحاتتاۋعا باعىتتالعان «ادىلەتتى قوعام قۇر» جوباسى ءساتتى جۇزەگە اسىرىلدى.
اتالعان باستاما اياسىندا مەگاپوليستىڭ جوعارى وقۋ ورىندارىندا 30-دان استام كەزدەسۋ وتكىزىلىپ، 5 مىڭنان استام ستۋدەنت قامتىلدى.
جوبانىڭ اۆتورى ءارى نەگىزگى سپيكەرى – الماتى قالاسىنىڭ ستۋدەنتتىك ومبۋدسمەنى راباتوۆ امانجول ازاماتۇلى. ول بارلىق كەزدەسۋدى ءوزى جۇرگىزىپ، ستۋدەنتتەرگە مەملەكەت باسشىسىنىڭ رەفورمالارى مەن ەل دامۋىنىڭ ستراتەگيالىق باعىتتارى جونىندە تۇسىندىرمە جۇمىستارىن جۇرگىزدى.
ءىس-شارالاردىڭ باستى ماقساتى – جاستاردىڭ ازاماتتىق جاۋاپكەرشىلىگىن ارتتىرۋ، قۇقىقتىق مادەنيەتىن قالىپتاستىرۋ جانە قوعامداعى ادىلەتتىلىك قاعيداتتارىن دارىپتەۋ.
كەزدەسۋلەر بارىسىندا پرەزيدەنتتىڭ «ادىلەتتى قوعامعا – شىنشىل ءسوز» كىتابىندا كوتەرىلگەن ماڭىزدى ماسەلەلەر تالقىلانىپ، «زاڭ مەن ءتارتىپ» قاعيداتى، «تازا قازاقستان» جالپىۇلتتىق باستاماسى جانە ابايدىڭ «تولىق ادام» تۇجىرىمداماسىنىڭ ءمانى كەڭىنەن ءتۇسىندىرىلدى. سونىمەن قاتار، مەملەكەت پەن قوعام اراسىنداعى ءوزارا سەنىم، جاستاردىڭ ەل بولاشاعىنا قوسار ۇلەسى جانە ازاماتتىق بەلسەندىلىكتىڭ ماڭىزى ءسوز بولدى.
باعدارلاما شەڭبەرىندە ستۋدەنتتىك ومبۋدسمەن ينستيتۋتىنىڭ قىزمەتىنە دە ەرەكشە نازار اۋدارىلدى. امانجول ازاماتۇلى ءبىلىم الۋشىلاردىڭ قۇقىقتارى مەن زاڭدى مۇددەلەرىن قورعاۋ، وتىنىشتەردى قاراۋ تەتىكتەرى جانە ۋنيۆەرسيتەتتەردە تۋىندايتىن ماسەلەلەردى شەشۋ جولدارى تۋرالى باياندادى.
بۇدان بولەك، قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ عىلىم مەن ءبىلىم سالاسىنداعى باستامالارى، ستۋدەنتتەردىڭ عىلىمي جوبالارعا قاتىسۋ مۇمكىندىكتەرى جانە ينتەللەكتۋالدىق الەۋەتتى دامىتۋ ماسەلەلەرى قوزعالدى.
جيىنداردا مەملەكەت باسشىسىنىڭ «كىتاپ وقيتىن ۇلت» يدەياسىن جۇزەگە اسىرۋعا باعىتتالعان باستامالارى دا نازاردان تىس قالمادى. جاستارعا كىتاپ وقۋ مادەنيەتىن قالىپتاستىرۋدىڭ، ادەبي شىعارمالار ارقىلى دۇنيەتانىمدى كەڭەيتۋدىڭ جانە بىلىمگە ۇمتىلۋدىڭ ماڭىزدىلىعى ايتىلدى.
جوبا اۆتورىنىڭ پىكىرىنشە، ادىلەتتى قوعام قۇرۋ ەڭ الدىمەن ءبىلىمدى، سانالى جانە جاۋاپكەرشىلىگى جوعارى ۇرپاق تاربيەلەۋدەن باستالادى. وسى رەتتە جاس بۋىننىڭ مەملەكەتتىك باستامالارعا قاتىستى ءوز كوزقاراسىن قالىپتاستىرۋى، قوعامدىق ماسەلەلەرگە بەلسەندى ارالاسۋى جانە ەل دامۋىنا ۇلەس قوسۋى ماڭىزدى.
ستۋدەنتتەر كەزدەسۋلەرگە بەلسەندى قاتىسىپ، وزدەرىن تولعاندىرعان ساۋالدارىن قويىپ، ءتۇرلى تاقىرىپتار بويىنشا پىكىر الماستى. قاتىسۋشىلار باستاماعا وڭ باعاسىن بەرىپ، وسىنداي اشىق ديالوگ الاڭدارىنىڭ قاجەتتىلىگىن اتاپ ءوتتى.
ايتا كەتەيىك، «ادىلەتتى قوعام قۇر» جوباسى الماتىداعى ستۋدەنت جاستاردى ورتاق قۇندىلىقتار توڭىرەگىندە بىرىكتىرىپ، ولاردىڭ قوعامدىق-ساياسي ساۋاتتىلىعىن ارتتىرۋعا باعىتتالدى.
الماتى قالاسىنىڭ ستۋدەنتتىك ومبۋدسمەنى راباتوۆ امانجول ازاماتۇلى الداعى ۋاقىتتا دا جاستاردىڭ مۇددەسىن قورعاۋ، ولاردىڭ باستامالارىن قولداۋ جانە ازاماتتىق قوعامدى دامىتۋ باعىتىنداعى جۇمىستاردى جالعاستىرۋدى جوسپارلاپ وتىر.
