Almaty qalasynyŋ äkımı Darhan Satybaldy qala üşın ekologiialyq kün tärtıbınıŋ basym baǧyt ekenın mälımdedı. Onyŋ aituynşa, 2026 jyldyŋ soŋyna deiın Almatydaǧy JEO-2-nı tolyqtai tabiǧi gazǧa köşıru josparlanyp otyr. Sonymen qatar, JEO-3 nysanyn bu-gaz tehnologiiasyna köşıru arqyly qaita jaŋǧyrtu jūmystary jürgızılude. Būl şaralar jylu közderınen bölınetın ziiandy şyǧaryndylardy jiyntyǧynda 92 paiyzǧa deiın azaituǧa mümkındık beredı, dep habarlaidy «Adyrna» ūlttyq portaly.
Äkımnıŋ mälımetınşe, 2027 jylǧa qarai jeke sektor tolyqtai, iaǧni 100 paiyz gazben qamtylady. Al 2028 jylǧa deiın qaladaǧy qoǧamdyq kölık baǧyttaryn kezeŋ-kezeŋımen ekologiialyq taza kölık türlerıne köşıru közdelıp otyr.
Sondai-aq qatty tūrmystyq qaldyqtardy basqaru jüiesın jetıldıru baǧytynda keşendı jūmystar josparlanǧan. Atap aitqanda, qaldyqtardy poligondarda kömu täjıribesınen bas tartyp, olardy tereŋ qaita öŋdeu jäne energiia alu maqsatynda kädege jaratuǧa köşu qarastyryluda. Osy maqsatta jylyna 80 myŋ tonnaǧa deiın plastiktı öŋdeitın, sondai-aq quattylyǧy 150 myŋ tonna makulaturany qaita öŋdeuge arnalǧan zauyttar salu josparlanyp otyr.
Qaita öŋdeuge kelmeitın qaldyqtardy örteu arqyly joiu közdelgen. Ol üşın täulıgıne 2 myŋ tonna qoqysty öŋdei alatyn qoqys örteu zauytyn salu josparlanuda. Qabyldanǧan şaralardyŋ nätijesınde 2030 jylǧa qarai kommunaldyq qaldyqtardy qaita öŋdeu jäne kädege jaratu ülesı qazırgı 17,3 paiyzdan 37 paiyzǧa deiın ösedı dep kütılude.
«Ekologiialyq kün tärtıbı qala üşın basym baǧyt bolyp qala beredı. Ekologiialyq ıs-şaralardy jüzege asyru qala tūrǧyndarynyŋ ömır süru sapasyn arttyrudyŋ, qauıpsız ärı ornyqty zamanaui qala qalyptastyrudyŋ negızgı şarty retınde qarastyrylady», — dedı Almaty qalasynyŋ äkımı Darhan Satybaldy.
