Almatyda qala Mäslihatynyŋ deputattary men Qoǧamdyq keŋes müşelerınıŋ bırlesken keŋeitılgen otyrysy öttı. Jiyn barysynda Almatynyŋ 2040 jylǧa deiıngı Bas josparyna engızıletın tüzetuler mäselesı qaraldy.
Otyrysqa qatysuşylarǧa Bas jospardy tüzetu jobasy boiynşa tolyqqandy tanystyrylym ūsynylyp, barlyq baǧyt boiynşa jan-jaqty ärı naqty aqparat berıldı.
Almaty äkımınıŋ orynbasary Beibıt Şahanov būl kezdesu qūjattyŋ negızgı erejelerın aldyn ala talqylauǧa, eskertuler men ūsynystardy eskeruge baǧyttalǧanyn atap öttı. Onyŋ aituynşa, būl ūsynystar jobany keŋ kölemde qoǧamdyq talqylauǧa şyǧaruda maŋyzdy röl atqarady.
«Jobanyŋ qoǧamdyq talqylauy biyl 24–26 jeltoqsan aralyǧynda ötedı. Bızdıŋ ortaq mındetımız — qala damuynyŋ müddesı men strategiialyq baǧyttaryn aiqyn körsetetın, jan-jaqty ärı sapaly pysyqtalǧan qūjatty ūsynu. Aldymyzda ūsynylǧan jobany talqylaudyŋ barynşa aşyq, inkliuzivtı jäne käsıbi üderısın qamtamasyz etu mındetı tūr», — dedı Beibıt Şahanov.
Öz kezegınde qalalyq Mäslihattyŋ qūrylys, säulet, qala qūrylysy, jer qatynastary jäne qoǧamdyq keŋıstıkterdı damytu jönındegı komissiiasynyŋ töraǧasy Däuren Maralov Bas jospardy tüzetu qala damuynyŋ joǧary qarqyny jaǧdaiynda teŋgerımdı damudy qamtamasyz etu, sondai-aq Memleket basşysynyŋ tau bökterınde qūrylys saluǧa tyiym salu jönındegı tapsyrmasyn eskeru üşın qajet ekenın aitty.
«Halyq sanynyŋ ösuı äleumettık infraqūrylymdy edäuır küşeitudı talap etedı. 2030 jylǧa deiın 107,5 myŋ oquşy orny, 101,5 myŋ balabaqşa orny, 1,2 mln şarşy metr medisinalyq nysandar, sondai-aq mädeniet, sauda jäne ört qauıpsızdıgı obektılerınıŋ damyǧan jelısın salu qajet. Poliortalyqtardy damytu erekşe maŋyzǧa ie. Būl maiatniktık köşı-qondy azaityp, ekonomikalyq belsendılıktı qaita böluge mümkındık beredı. Qazırgı taŋda kün saiyn ortalyqqa şamamen 600 myŋ sapar jasalady. Poliortalyqtardy qalyptastyru kölık jüiesıne tüsetın jüktemenı azaityp, ömır sapasyn arttyruǧa jol aşady. Osy tūrǧyda Bas jospardy tüzetu — formaldylyq emes, qala üşın asa qajettı qadam. Būl jūmysty qoldaimyn jäne ony qalanyŋ bolaşaǧy üşın strategiialyq maŋyzy bar dep esepteimın», — dedı Däuren Maralov.
Qalalyq Qoǧamdyq keŋestıŋ töraǧasy Mahambet Hasenov te öz sözınde Bas jospardy tüzetu jobasyn qoldaitynyn aitty. Onyŋ aituynşa, qūjat megapolistıŋ negızgı ekologiialyq mındetterıne tolyq jauap beredı.
«Tüzetu jasyl aimaqtardyŋ aumaǧyn üş eseden asa ūlǧaityp, 3 800 gektarǧa deiın jetkızudı közdeidı. Būl jaŋa orman men saiabaqtar saludy, özen aŋǧarlaryn qorǧaudy jäne qalanyŋ bırtūtas ekologiialyq qūrylymyn qalyptastyrudy qamtidy. Sonymen qatar qūrylys tyǧyzdyǧyn tömendetuge erekşe köŋıl bölıngen: būrynǧy gektaryna 330 adam normativınıŋ ornyna şamamen 260 adam deŋgeiı qarastyrylyp otyr. Būl infraqūrylymnyŋ şamadan tys jükteluınıŋ aldyn alyp, kölıkke tüsetın qysymdy azaityp, şaǧynklimatty jaqsartuǧa mümkındık beredı. Atalǧan jaittardyŋ barlyǧy jobanyŋ uaqytyly, negızdı ärı almatylyqtardyŋ ömır sapasyn arttyruǧa baǧyttalǧanyn körsetedı», — dedı ol.
Otyrys qorytyndysy boiynşa Mäslihat deputattary men Qoǧamdyq keŋes müşelerı Bas jospardy tüzetu jobasyn qoldady. Qoǧam ökılderı ūsynǧan barlyq eskertu men ūsynys jüielenıp, qūjatty odan ärı pysyqtau barysynda eskerıletın bolady.
