«قۇربان ايت» مەرەكەسىنە وراي الماتى مەشىتتەرىندە مەرەكەلىك ءىس-شارالار وتەدى. اتاپ ايتقاندا، مەرەكەلىك داستارحان جايىلىپ، بالالارعا ايتتىق تاراتىلادى، بۇلدىرشىندەر ءۇشىن ارنايى باتۋت قۇرىلىپ، ۇلتتىق ويىندار ۇيىمداستىرىلادى. بۇل تۋرالى الماتى وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا الماتى قالاسىنىڭ «بايكەن» مەشىتىنىڭ باس يمامى دانيار جۇماباەۆ ايتتى، دەپ حابارلايدى قازاقپارات ءتىلشىسى.
«قۇربان ايت مەرەكەسىنە وراي، الماتى ورتالىق مەشىتى، «بەكەت اتا»، «مىرزاحمەت»، «ءال-ءمادينا»، «ابدۋللا»، «رايىمبەك باتىر»، «نۇر-مۇباراك»، «ىنتىماق» جانە «مۇحامەد ءال-ءامين» مەشىتتەرىنىڭ اۋلالارىنا كيىز ۇيلەر قۇرىپ، جاماعاتقا داستۇرگە ساي ءدام ۇسىنىلاتىن بولادى. «نۇر»، «قىستاۋبايۇلى ماناس»، «قاراساي باتىر»، «باقىتكەلدى»، «ءال-حاميد» «رايىمبەك باتىر»، «قاراعايلى»، «تۇركىسب»، «اسكەر اتا»، «ارافات»، «وربيتا» جانە «نۇر» (اقجار) مەشىتتەرىندە مۇقتاج وتباسىلارعا ايتتىق قورجىندارى تاراتىلادى. اۋەزوۆ اۋدانىندا «تاۋگۇل» مەشىتىنىڭ اسحاناسىندا اقساقالدار مەن اپالارعا ايتتىق داستارحان جايىلادى. الاتاۋ جانە ناۋرىزباي اۋداندارى بالالار ۇيىنە ارنايى بارىپ، بالالارعا ايتتىق بازارلىق تاراتىپ، ايت مەرەكەسىمەن قۇتتىقتاۋ ۇيىمداستىرىلادى. بوستاندىق، تۇركسىب اۋداندارى قارتتار ۇيىنە ارنايى ايتتىق داستارحان جايىپ، مەرەكەلىك شارا ۇيىمداستىرماق. ايەل-قىزدارى سەكتورىنىڭ ۇيىمداستىرۋىمەن الماتى ورتالىق مەشىتىندە قايىرىمدىلىق جارمەڭكەسى وتەدى»، - دەدى دانيار جۇماباەۆ.
