نۇر-سۇلتان، 11 ءساۋىر – Sputnik. سەنات دەپۋتاتتارى ءماجىلىس ماقۇلداعان "قازاقستان ۇكىمەتى مەن قىتاي ۇكىمەتى اراسىنداعى قىتايدىڭ جەڭىلدىكتى كرەديت بەرۋى تۋرالى نەگىزدەمەلىك كەلىسىمدى راتيفيكاتسيالاۋ تۋرالى" زاڭدى قابىلدادى، دەپ حابارلايدى Sputnik قازاقستان تىلشىسى.

پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆتىڭ ايتۋىنشا، قىتايدان قارىزعا الىناتىن اقشاعا 9 اۆتوكولىك جانە 1 تەمىرجول وتكىزۋ پۋنكتى جاڭعىرتىلادى. قازىر ەاەو سىرتقى شەكاراسىنىڭ قازاقستان ۋچاسكەسىندەگى وتكىزۋ پۋنكتەرى كولىكتەردى جىلدام ءارى توقتاۋسىز وتكىزۋگە قاۋقارلى ەمەس. ماسەلەن، جۋىردا قازاق-وزبەك شەكاراسىندا تۋىنداعان جاعداي وسىعان دالەل بولا الادى.

"قازاقستان تاراپىنداعى وتكىزۋ پۋنكتەرىندە كۇن سايىن 100-دەن 300-گە دەيىن اۆتوكولىك كەپتەلىپ قالادى. جۇرگىزۋشىلەر كەزەكتە 3 تاۋلىككە دەيىن تۇرۋعا ءماجبۇر", - دەدى مينيستر سەناتتىڭ جالپى وتىرىسىندا.

وتكىزۋ پۋنكتەرىنىڭ مۇمكىندىگىن ۇلعايتۋ ءۇشىن قارجى مينيسترلىگى "ەتالوندىق وتكىزۋ پۋنكتى" تۇجىرىمداماسىن ازىرلەگەن.

ايتا كەتسەك، نەگىزدەمەلىك كەلىسىمگە 2018 جىلدىڭ ماۋسىم ايىندا بەيجىڭدە قول قويىلعان.

قارىزدىڭ جالپى سوماسى 2 062 ميلليارد يۋان، ياعني تەڭگەگە شاققاندا 100 ميلليارد تەڭگەدەن استام. كەلىسىمگە سايكەس، قىتاي بانكى جەڭىلدەتىلگەن كرەديتتى جىلدىق ستاۆكاسى 2 پروتسەنتپەن 20 جىلعا بەرەدى.

جوبا وسى جىلدىڭ سوڭىندا باستالىپ، 2022 جىلى اياقتالماق.