بۇگىن جەزقازعان قالاسىندا ەڭ ۇزدىك بيزنەس جوبا ۇسىنعان كاسىپكەرلەر ماراپاتتالدى. بيىل گرانت الۋعا بارلىعى 78 ءوتىنىم كەلىپ ءتۇستى، 120 ادام كەڭەس الدى.
ءماسليحات دەپۋتاتتارى، «اتامەكەن» ۇلتتىق پالاتا وكىلدەرى، ۇزدىك كاسىپكەرلەر، قوعامدىق بىرلەستىك توراعالارى، كاسىپوداق ۇيىمدارىنىڭ وكىلدەرى، قالالىق اكىمدىك وكىلدەرىنەن قۇرالعان كوميسسيا مۇشەلەرى ۇزدىك 18 جوبانى انىقتادى.
ۇزدىك بيزنەس-جوبالار ىشىندە مۋلتيپليكاتسيالىق ستۋديا، زاماناۋي ۇلگىدەگى لوفت-جيھاز جاساۋ، ۇلتتىق ناقىشتاعى تىگىن تسەح، كولىك پانەلدەرىنە جابىن، «ناكيدكا» جاساۋ جانە ت.ب. جوبالار بولدى.
گرانتتاردى جەزقازعان قالالىق ءماسليحاتىنىڭ توراعاسى ر.قاپاروۆا، جەزقازعان قالاسى اكىمىنىڭ ورىنباسارى ب. جايلاۋباەۆ جانە كوميسسيا مۇشەلەرى تابىستاپ، جەڭىمپازداردى قۇتتىقتادى.
