71 جاستاعى كۇيشى، جازۋشى، جۋرناليست جارقىن شاكارىم دۇنيەدەن وزدى. قايراتكەردىڭ قازاسىن سەيسەنبى كۇنى قازاقستان مادەنيەت جانە سپورت ءمينيسترى ارىستانبەك مۇحامەديۇلى ءوزىنىڭ Facebook پاراقشاسىندا ەستىرتتى.
جارقىن شاكارىم - زەرتتەۋشى، مۋزىكاتانۋشى، بىرنەشە كىتاپتىڭ اۆتورى. ءانشى، اكتەر امىرە قاشاۋباەۆتىڭ ءومىرى مەن شىعارماشىلىعى تۋرالى ەڭبەك جازعان. 1976-1980 جىلدارى شاكارىم "جالىن" جۋرنالىنىڭ رەداكتورى بولدى. 1980 جىلى "سازگەن" ءانسامبلىن ۇيىمداستىرعان. قازاق ۇلتتىق اسپاپتار مۋزىكاسى مۋزەيىنىڭ قۇرىلۋىنا اتسالىسقان. 1980-1982 جىلدارى سول مۋزەيدىڭ ديرەكتورى بولدى.
1974 جىلى شاكارىم اكادەميك احمەت جۇبانوۆتىڭ ورىنداۋىنداعى بىرنەشە كۇي جازىلعان ءۇنتاسپانى لەنينگرادتان تاۋىپ، 2007 جىلى الماتىعا اكەلدى.
1982-2010 جىلدارى "قازاقستان" رەسپۋبليكالىق تەلەراديوكورپوراتسياسىنىڭ مۋزىكالىق رەداكتورى بولدى. وسى ۋاقىت ارالىعىندا "تەرمە", "مۋزىكالىق كينوجىلناما" سياقتى بىرنەشە اۆتورلىق باعدارلامانى جۇرگىزدى.
1998 جىلى جارقىن شاكارىم قازاقستاننىڭ ەڭبەك سىڭىرگەن قايراتكەرى اتاعىن الدى. شىعىس قازاقستان وبلىسى ءۇرجار اۋدانىنىڭ قۇرمەتتى ازاماتى.
