جالعان قۇجات جاساپ "التىن القا", "كۇمىس القا" يەلەنىپ، مەملەكەتتەن جاردەماقى الىپ كەلگەن انالار انىقتالدى.
شىعىس قازاقستان وبلىسى، ءۇرجار اۋدانى، ناۋالى اۋىلىندا وسىنداي جالعان قۇجات جاساتىپ، زاڭسىز ارەكەتكە باردى دەگەن كۇدىكپەن سەگىز انا تەرگەلىپ جاتىر. قىلمىستىق ءىس قوزعالىپ، زاڭ ورگاندارى اۋدانداعى وزگە دە اۋىلداردى تەكسەرۋگە كوشتى. بۇل تۋرالى Qazaqstan تەلەارناسى حابارلادى.
جىمىسقى جولمەن جاردەماقى الىپ كەلگەن ايەلدەردى اۋىلداستارى اڭعارعان. ەكى بالاسى بولا تۇرىپ، باتىر انا اتانعانداردى كورىپ اڭ-تاڭ بولعان جەرگىلىكتى تۇرعىندار اكىمشىلىككە شاعىمدانعان. ىشىندە ءبىر بالامەن العاندار دا بار ەكەن. اۋىل اكىمى جالعان قۇجاتتى اڭعارماي قالدىق دەيدى. جەتپەگەن بالالار قىتايدا تۇرىپ جاتىر دەپ ايتتى دەگەن سوڭ سەنىپ قالعان. كۇيەۋىنىڭ بۇرىنعى ايەلىنىڭ قىتايداعى بالالارىن دا تىركەتىپ العاندار بار ەكەن.
قازىر تەرگەۋدەگى سەگىز ادامنىڭ بەسەۋىنىڭ ۇستىنەن قىلمىستىق ءىس قوزعالدى. قۇجاتتى جاساپ جۇرگەن 2 ادام قاماۋعا الىندى. جالعان قۇجاتپەن جاردەم اقى الىپ كەلگەندەر كوپ بولۋى مۇمكىن دەگەن كۇدىكپەن قازىر بارلىق اۋىلدار تەكسەرىلۋدە.
"ادىرنا" ۇلتتىق پورتالى
