ابەل سانچەس. "گولوۆكين جاقسىلىقتى بىلمەدى"

گەننادي گولوۆكين باپكەر ابەل سانچەسپەن بۇدان بىلاي جۇمىس ىستەمەيتىنىن مالىمدەگەن بولاتىن. قازاقستاندىق بوكسشىنى توعىز جىل جاتتىقتىرعان امەريكالىق باپكەر بۇل اقپاراتتى راستادى.

سانچەستىڭ ايتۋىنشا، گولوۆكين ونىڭ قىزمەت اقىسىنىڭ كولەمىن قايتا قاراۋعا شەشىم قابىلداعان. ال باپكەر جاڭا ۇسىنىس مەنىڭ نامىسىما ءتيدى ءارى ءتيىمسىز دەپ وتىر.

"بۇگىننەن باستاپ گەننادي گولوۆكينمەن جۇمىس ىستەمەيمىن", – دەدى سانچەس باسپاسوزگە. – توعىز جىلدا رەكوردتار ورناتۋىنا جانە DAZN كومپانياسىمەن التى جەكپە-جەككە 100 ميلليوندىق كەلىسىمشارت جاساۋىنا جاعداي جاسادىم، بوكس داڭقى زالىنىڭ بولاشاق مۇشەسىنىڭ كارەراسىن دامىتۋعا كومەكتەستىم، وسىدان كەيىن ول باپكەرلىك قىزمەتىم ءۇشىن مەنى قورلايتىن جاڭا وتەماقى سحەماسىن قابىلداۋدى ۇسىندى جانە تالاپ ەتتى. مۇنداي ۇسىنىستى قابىلداۋعا مەنىڭ ار-نامىسىم جىبەرمەدى. وكىنىشكە قاراي، ساراڭدىق، جاقسىلىقتى بىلمەۋ جانە ەتيكانىڭ، قۇرمەتتىڭ نەمەسە ادالدىقتىڭ بولماۋى قارىم-قاتىناسىمىزدى توقتاتۋعا اكەلدى".

سانچەس باپكەرلىك ەڭبەگىنە قانشا اقى الىپ كەلگەنىن ايتقان جوق، الايدا Los Angeles Daily News-كە تەلەفون ارقىلى گولوۆكيننىڭ گونورارىنىڭ 10 پوتسەنتىن العانىن حابارلاعان، بوكسشى بۇدان ەداۋىر از سوما ۇسىنعان. گولوۆكيننىڭ وكىلى توم لەففلەر بۇل جاعدايعا تۇسىنىكتەمە بەرۋدەن باس تارتتى، دەپ حابارلادى Sports.kz.