ەلشى تاسماعامبەتوۆ سايلاۋعا قاتىسا الادى

كونستيتۋتسيالىق كەڭەس قازاقستان پرەزيدەنتى قاسىم-جومارت توقاەۆتىڭ وتىنىشىنە بايلانىستى شەشىمىن جاريالادى.

بۇعان دەيىن توقاەۆ پرەزيدەنتتىككە ۇمىتكەرلەرگە قويىلاتىن تالاپ – سوڭعى 15 جىل بويى ەلدە تۇرۋ تۋرالى نورمانى ءتۇسىندىرۋدى سۇراعان ەدى.

كونستيتۋتسيالىق كەڭەستىڭ شەشىمى بويىنشا، 15 جىل بويى ەلدە تۇرۋ مەرزىمىنە ءبىرىنشى كەزەكتە ازاماتتىڭ ەل اۋماعىندا تۇرعىلىقتى تۇرۋ ۋاقىتى جاتادى، بۇل ازاماتتىڭ مەكەنجايى بويىنشا تىركەلۋى ارقىلى انىقتالادى.

"بۇدان بولەك، قازاقستان رەسپۋبليكاسىنىڭ ديپلوماتيالىق قىزمەتكەرلەرى جانە قازاقستان رەسپۋبليكاسى قۇرامىنا كىرەتىن حالىقارالىق ۇيىمداردا لاۋازىمعا تاعايىندالعان ازاماتتاردىڭ شەتەلدە تۇرۋى دا وسى مەرزىمگە جاتادى", - دەلىنگەن كونستيتۋتسيالىق كەڭەستىڭ تۇسىنىكتەمەسىندە.

كونستيتۋتسيالىق كەڭەستىڭ توراعاسى قايرات ءمامي تۇسىندىرگەندەي، وسى ايتىلعان سەبەپتەر بويىنشا ەلدەن تىسقارى اۋماقتا تۇرۋ قازاقستان ازاماتتىعىن توقتاتتى نەمەسە تۇرعىلىقتى مەكەنجايىن وزگەرتتى دەگەن ءسوز ەمەس.

قازاقستان پرەزيدەنتى قاسىم-جومارت توقاەۆ 9 ساۋىردە ەل حالقىنا ۇندەۋ جاساپ، ەلدە كەزەكتەن تىس پرەزيدەنت سايلاۋى وتەتىنىن جاريالادى. مەملەكەت باسشىسى سايلاۋدى 2019 جىلدىڭ 9 ماۋسىمىنا بەلگىلەدى.

پرەزيدەنتتىككە كانديداتتاردى ۇسىنۋ 28 ءساۋىر ساعات 18:00-گە دەيىن جالعاسادى. ۇمىتكەرلەردى ەلىمىزدە تىركەلگەن ساياسي پارتيالار مەن رەسپۋبليكالىق قوعامدىق بىرلەستىكتەر ۇسىنا الادى. ءار كانديدات 118 140 سەنىمدى سايلاۋشىنىڭ قولىن جيناۋى ءتيىس. كانديداتتاردى تىركەۋ 11 مامىرعا دەيىن جالعاسادى.