ايەلدەر كاسىپكەرلىگىنىڭ وڭىرلىك ورتالىعى وبلىستىڭ ءار تۇكپىرىندە جۇرگەن ەڭبەكقور دا تالانتتى جانداردىڭ ارمان-ماقساتتارىن جۇزەگە اسىرۋعا جاردەمدەسەدى. ماسەلەن، 2022 جىلى ورتالىققا كومەك سۇراپ جۇگىنىپ، ءتيىستى اقپارات العاننان كەيىن ءىسىن باستاۋعا بەل بۋعان كاسىپكەر الماگۇل مۇراتبەك بيىل جەمىس-جيدەكتەن جايما قاق جاساۋدى قولعا الدى. وعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە بيزنەس-يدەياسىن ىسكە اسىرۋعا بەرىلگەن 5 ملن.تەڭگە سوماسىنداعى گرانت زور كومەك بولدى. قاجەتتى قۇرال-جابدىقتاردى ساتىپ الىپ، قازىر ەسكەلدى اۋدانىندا ءۇي جاعدايىندا قاق ءوندىرىسىن جولعا قويىپ وتىر.
وسىلايشا الماگۇل مۇراتبەك "Qonaq Kade" برەندىنىڭ نەگىزىن قالادى. قازىر جەرگىلىكتى جەمىس-جيدەكتەردەن قاقتىڭ بىرنەشە ءتۇرىن جاسايدى. ونىڭ ءدامدى، ەڭ باستىسى تابيعي ءارى پايدالى ونىمدەرىنە دەگەن سۇرانىس قازىردىڭ وزىندە ارتىپ وتىر.
- ءوز بيزنەس-يدەيامدى جۇزەگە اسىرۋ ءۇشىن الماتى قالاسىنان ەسكەلدى اۋدانىنىڭ قاراتال اۋىلىنا كوشىپ كەلدىم، ويتكەنى مۇندا جەرگىلىكتى فەرمەرلەر قۇلپىناي مەن تاڭقۋرايدى جاقسى وسىرەدى. كەيدە تەكەلىلىك تۇرعىنداردان دا جيدەكتەر ساتىپ الامىن. نەگىزى فارماتسەۆت مامانمىن. بىراق بيزنەسپەن اينالىسىپ، پايدالى ءونىم شىعارعىم كەلدى. بۇل ماقساتىما مەملەكەتتىك قولداۋدىڭ ارقاسىندا قول جەتكىزدىم، - دەيدى كاسىپكەر.ونىڭ ايتۋىنشا، قاق ءوندىرۋ قاراپايىم پروتسەسس، ونى كەز كەلگەن ايەل ۇيىندە جاساي الادى.
- قاي-قايسىمىز دا بالا كەزىمىزدە المادان قاق جاساعانبىز، مەن دە سولاردىڭ ءبىرىمىن. بىراق قازىر ارنايى قۇرال-جابدىقتاردىڭ ارقاسىندا جۇمىس بۇرىنعىدان الدەقايدا جەڭىلدەدى. ارينە، ازىق-تۇلىك جيناۋعا، جەمىس-جيدەكتەردى جۋعا، تاسىمالدايتىن ىدىستارعا سالۋعا كوپ ۋاقىت كەتەدى، بىراق بلەندەردى پايدالانۋ ۋاقىتتى ەداۋىر ۇنەمدەيدى. مۇنان سوڭ دايىن قويمالجىڭ 10-12 ساعاتقا دەگيدراتورعا كەپتىرۋ ءۇشىن جىبەرىلەدى. وسى ۋاقىت ارالىعىندا باسقا شارۋالارىڭىزبەن اينالىسۋىڭىزعا بولادى. نارىقتا جايما قاق وتە قىمبات، دەگەنمەن بىزدە وسەتىن جەمىس-جيدەكتەردىڭ ءتۇرى كوپ. سوندىقتان جىل بويى ساپالى ءارى پايدالى جەرگىلىكتى ءونىم ءوندىرۋدى جولعا قويۋعا جانە ودان تۇراقتى تابىس الۋعا بولادى، - دەيدى وي بولىسكەن الماگۇل مۇراتبەك.اتاپ وتسەك، جاقىندا الماگۇل مۇراتبەك «ءبىر اۋىل – ءبىر ءونىم» جوباسىنىڭ جەڭىمپازى اتاندى. سول سياقتى «قورعاس» حشىو اۋماعىندا وتكەن حالىقارالىق كورمەگە قاتىسىپ قايتتى. بۇگىندە شاعىن بيزنەسىن جۇرگىزىپ، ەكى ادامدى تۇراقتى جۇمىسپەن قامتىپ وتىر. وڭىرلىك كاسىپكەرلەر پالاتاسى وتكىزەتىن ماستەر-كلاسستار شەڭبەرىندە تاجىريبە الماسۋعا بەلسەندى قاتىسادى. الداعى ۋاقىتتا كووپەراتيۆ قۇرۋ ەسەبىنەن ءوندىرىسىن ۇلعايتىپ، جۇمىسشىلار سانىن ارتتىرىپ، ۇلكەن نارىققا شىقسام دەگەن جوسپارى بار. جەتىسۋ وبلىسى اكىمىنىڭ ءباسپاسوز قىزمەتى
