Äielder käsıpkerlıgınıŋ öŋırlık ortalyǧy oblystyŋ är tükpırınde jürgen eŋbekqor da talantty jandardyŋ arman-maqsattaryn jüzege asyruǧa järdemdesedı. Mäselen, 2022 jyly ortalyqqa kömek sūrap jügınıp, tiıstı aqparat alǧannan keiın ısın bastauǧa bel buǧan käsıpker Almagül Mūratbek biyl jemıs-jidekten jaima qaq jasaudy qolǧa aldy. Oǧan käsıpkerlıktı damytu jönındegı ūlttyq joba şeŋberınde biznes-ideiasyn ıske asyruǧa berılgen 5 mln.teŋge somasyndaǧy grant zor kömek boldy. Qajettı qūral-jabdyqtardy satyp alyp, qazır Eskeldı audanynda üi jaǧdaiynda qaq öndırısın jolǧa qoiyp otyr.
Osylaişa Almagül Mūratbek "Qonaq Kade" brendınıŋ negızın qalady. Qazır jergılıktı jemıs-jidekterden qaqtyŋ bırneşe türın jasaidy. Onyŋ dämdı, eŋ bastysy tabiǧi ärı paidaly önımderıne degen sūranys qazırdıŋ özınde artyp otyr.
- Öz biznes-ideiamdy jüzege asyru üşın Almaty qalasynan Eskeldı audanynyŋ Qaratal auylyna köşıp keldım, öitkenı mūnda jergılıktı fermerler qūlpynai men taŋquraidy jaqsy ösıredı. Keide tekelılık tūrǧyndardan da jidekter satyp alamyn. Negızı farmasevt mamanmyn. Bıraq biznespen ainalysyp, paidaly önım şyǧarǧym keldı. Būl maqsatyma memlekettık qoldaudyŋ arqasynda qol jetkızdım, - deidı käsıpker.Onyŋ aituynşa, qaq öndıru qarapaiym prosess, ony kez kelgen äiel üiınde jasai alady.
- Qai-qaisymyz da bala kezımızde almadan qaq jasaǧanbyz, men de solardyŋ bırımın. Bıraq qazır arnaiy qūral-jabdyqtardyŋ arqasynda jūmys būrynǧydan äldeqaida jeŋıldedı. Ärine, azyq-tülık jinauǧa, jemıs-jidekterdı juuǧa, tasymaldaityn ydystarǧa saluǧa köp uaqyt ketedı, bıraq blenderdı paidalanu uaqytty edäuır ünemdeidı. Mūnan soŋ daiyn qoimaljyŋ 10-12 saǧatqa degidratorǧa keptıru üşın jıberıledı. Osy uaqyt aralyǧynda basqa şarualaryŋyzben ainalysuyŋyzǧa bolady. Naryqta jaima qaq öte qymbat, degenmen bızde ösetın jemıs-jidekterdıŋ türı köp. Sondyqtan jyl boiy sapaly ärı paidaly jergılıktı önım öndırudı jolǧa qoiuǧa jäne odan tūraqty tabys aluǧa bolady, - deidı oi bölısken Almagül Mūratbek.Atap ötsek, jaqynda Almagül Mūratbek «Bır auyl – bır önım» jobasynyŋ jeŋımpazy atandy. Sol siiaqty «Qorǧas» HŞYO aumaǧynda ötken halyqaralyq körmege qatysyp qaitty. Bügınde şaǧyn biznesın jürgızıp, ekı adamdy tūraqty jūmyspen qamtyp otyr. Öŋırlık käsıpkerler palatasy ötkızetın master-klasstar şeŋberınde täjıribe almasuǧa belsendı qatysady. Aldaǧy uaqytta kooperativ qūru esebınen öndırısın ūlǧaityp, jūmysşylar sanyn arttyryp, ülken naryqqa şyqsam degen jospary bar. Jetısu oblysy äkımınıŋ baspasöz qyzmetı
