Bügın Jetısu oblysynda futboldan Qazaqstan ūlttyq qūramasynyŋ ardagerlerı joldastyq kezdesu öttı. Būl jarys «Būqaralyq sport - bolaşaq jeŋısterdıŋ bastauy» sporttyq ıs-şarasy şeŋberınde ūiymdastyryldy.
Taldyqorǧandaǧy «Jetısu» stadionynda bolǧan jarystyŋ aşyluynda söz söilegen oblys äkımı Beibıt İsabaev öŋırge arnaiy kelgen qonaqtarǧa rizaşylyǧyn bıldıre kele:
- Bügıngı kezdesu – būl tek sport ardagerlerınıŋ dostyq matchy ǧana emes, türlı buyn ökılderın bırıktıretın mümkındık. Öitkenı sporttyŋ tılı bärıne ortaq. Qadırlı qonaqtar, sızdermen kezdesken jastar salauatty ömır saltyn ūstanuǧa, sportpen ainalysuǧa, jalpy özıne senuge, armanyna qol jetkızuge şabyt alady dep senemın. Bügıngı joldastyq kezdesu sättı ötsın! - dedı oblys basşysy.
Sol siiaqty «Astana» FK direktory, el futbolynyŋ körnektı ökılı Mihail Gurman, qazaq futbolynda aty aŋyzǧa ainalǧan qaqpaşy, sport ardagerı Qūralbek Ordabaev, futboldan olimpiada chempiony Evgenii Iаrovenko söilep, jetısulyqtardyŋ sporttaǧy aiaqalysyna jaŋa tabystar tıledı.
Mūnan soŋ ardagerler sportşylar Qazaqstan Ūlttyq qūramasy men Jetısu qūrama äuesqoi komandalary sapynda futbol alaŋyna şyqty. Atap aitqanda, respublikalyq komandanyŋ qūramynda joǧaryda aty atalǧan futbolşylarmen qatar Vait Talgaev, Sergei Volgin, Berık Arǧymbaev, Asqar Qojabergenov jäne basqa da ardagerler, al oblys komandasynda oblys äkımınıŋ orynbasary Dias Esdäuletov, oblystyq dene şynyqtyru jäne sport basqarmasynyŋ basşysy Ūlan Rysqūl, «Jetısu» FK bas jattyqtyruşysy Samat Smaqov, «Jetısu» FK direktory Mark Gurman jäne basqa da azamattar boldy. Joldastyq kezdesu 2:2 esebımen teŋ aiaqtaldy.
Qos komandaǧa da medaldar tabystaldy, al Qazaqstan ūlttyq qūramasyna oiynnyŋ Kubogy berıldı.
Bügın Taldyqorǧanǧa arnaiy kelgen qonaqtardyŋ bırı KSRO jäne Qazaqstan futbolynyŋ jarqyn ökılınıŋ bırı Asqar Qojabergenov öz pıkırın bıldırdı:
- Futboldy nasihattaǧan, sportty därıptegen öte dūrys. Mūndai şaralar jastar üşın asa qajet. Qazır futbol alaŋdary köbeiıp, jattyǧuǧa tamaşa jaǧdailar jasalyp jatyr. Futbolşylarǧa jaqsy mümkındıkter tuǧyzylady.Sonyŋ bärı jastardyŋ osy oiyn türıne qyzyǧuşylyǧyn arttyryp keledı. Bügın janküierler stadionnyŋ bır jaq qanatyn toltyryp otyrdy. Mūnda kelgen jasöspırımder ūlttyq qūramanyŋ sapynda Qazaqstanǧa äigılı futbolşylardy, jergılıktı janküierler özderınıŋ būrynǧy kumirlaryn jüzbe-jüz kördı. Men özımızdıŋ «Jetısu» stadionyna qaita kelgenıme quanyştymyn, - dedı ol.
