Jetısu garnizonynda desanttyq-şabuyldauşy äskerlerdıŋ merzımdı äskeri qyzmetşısı qaza tapty, dep habarlaidy "Adyrna" ūlttyq portaly Tengrinews.kz-ke sıltep.
Oqiǧa 23 qyrküiekte bolǧan.
Qorǧanys ministrlıgınıŋ Desanttyq-şabuyldauşy äskerler baspasöz qyzmetınıŋ mälımetınşe, äskeri daiyndyq sabaqtary barysynda qarumen jūmys ısteu kezındegı qauıpsızdık şaralarynyŋ būzyluy saldarynan sarbaz oq tiıp, qaza bolǧan.
«Oqiǧa boiynşa qylmystyq ıs qozǧaldy, tergeu şaralary jürgızılude. Eger qyzmettık tūlǧalardyŋ nemqūrailylyǧy men baqylausyzdyǧy däleldense, kınälıler eŋ qataŋ jauapkerşılıkke tartylady. Oqiǧa qorǧanys ministrınıŋ erekşe baqylauyna alyndy», – delıngen vedomstvo habarlamasynda.
Sonymen qatar, qaruly küşterdıŋ basşylyǧy qaza tapqan sarbazdyŋ tuystary men jaqyndaryna şyn jürekten köŋıl aityp, olarǧa barlyq qajettı kömek körsetıletının mälım ettı.
