«ادىرنا» ۇلتتىق-ەتنوگرافيالىق بىرلەستىگى» قوعامدىق قورى قر اقپارات جانە قوعامدىق دامۋ مينيسترلىگى قولداۋىمەن «ازاماتتىق باستامالاردى قولداۋ ورتالىعى» كەاق مەملەكەتتىك گرانت اياسىندا «ءداستۇرلى رۋحاني قۇندىلىقتاردى قولداۋ جونىندەگى جۇمىستاردى ۇيىمداستىرۋ» اتتى الەۋمەتتىك جوبانى جۇزەگە اسىرۋعا كىرىسىپ كەتكەلى ءبىر ايدىڭ ءجۇزى بولدى.
جوبانىڭ باستى ماقساتى – ۇلتتىق قۇندىلىقتارىمىزدى ۇلىقتاۋ، ءتول تاريحىمىز بەن وزىمىزگە عانا ءتان ەرەكشەلىكتەرىمىزدى ەلدىڭ تۇتقاسى سانالاتىن جاستاردىڭ بويىنا سىڭىرۋگە ۇلەس قوسۋ، ولاردىڭ بويىنداعى وتانسۇيگىشتىك قاسيەتتەردى ارتتىرۋعا سەبەپكەر بولۋ دەسەك ارتىق ايتپاسپىز.
قازاق ەلىنىڭ تۇڭعىش پرەزيدەنتى ن. ءا. نازارباەۆ «بولاشاققا باعدار: رۋحاني جاڭعىرۋ» اتتى ءبىر جىل بۇرىنعى باعدارلامالىق ماقالاسىندا «ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا، ول اداسۋعا باستايدى» دەپ شەگەلەپ ايتقان ەدى. سوندىقتان دا قوعامداعى ءاربىر ادام ۇرپاق تاربيەسى مەن وتباسى قۇندىلىقتارى ماسەلەسىن ءاردايىم باسشىلىقتا ۇستاپ، جادىنان ءبىر ساتكە دە شىعارماسا ەكەن دەيسىڭ... ۇلتتىق تۇتاستىقتى ساقتاۋ، ۇلتتىق مادەنيەتتى دامىتۋ، جاھاندانۋدا جالپى اعىمعا ىلەسىپ كەتپەۋ مادەنيەتتى ساقتاۋعا تىكەلەي بايلانىستى. مادەنيەت بىزدە بار، بولعان جانە بولا بەرەدى دە. قازاق مادەنيەتى جەر بەتىندە قازاق دەگەن ۇلت باردا جاساي بەرەتىنى اقيقات. تەك، ءداستۇرلى ۇلتتىق قۇندىلىقتارىمىزدى ۇمىتپاي، ۇمىتۋعا جول بەرمەي، ناسيحاتتاي بەرۋىمىز كەرەك. جاھاندانۋدىڭ جان-جاقتى اسەرلەرىنە شەكتەۋ قويىپ، ۇلتتىڭ وزەگى سانالاتىن وتباسىلىق قۇندىلىقتاردىڭ وزىق ۇلگىلەرىن ساقتاپ، قولدانۋ اياسىن ودان سايىن كەڭەيتىپ وتىرۋىمىز قاجەت. سوندىقتان «ءداستۇرلى رۋحاني قۇندىلىقتاردى قولداۋ جونىندەگى جۇمىستاردى ۇيىمداستىرۋ» جوباسىنىڭ بەرەرى مول دەپ ۇمىتتەنەمىز. بولاشاققا نىق قادام باسۋ ءۇشىن وتكەنىڭدى ۇمىتپاۋ كەرەك! سەبەبى، ۇلتتىق تامىردان اجىراۋ جاقسىلىق اكەلمەيتىنى ءسوزسىز. تەرەڭدە جاتقان ۇلتتىق تامىردان اجىراماۋ ءۇشىن ءسىز-ءبىز بولىپ، ورتاق مۇددە ءۇشىن اتسالىسۋىمىز كەرەك-اق!
"ادىرنا" ۇلتتىق-ەتنوگرافيالىق بىرلەستىگى
