ەلىمىزدە 80 مىڭعا جۋىق جاس ينتەرنەت ارقىلى دەسترۋكتيۆتى قوعامداستىققا قوسىلعان. بۇل تۋرالى ۇلتتىق قاۋىپسىزدىك كوميتەتى توراعاسىنىڭ ورىنباسارى رۋسلان سەيسەمباەۆ ايتتى، دەپ حابارلايدى «ادىرنا» ءتىلشىسى.
«حالىقتى راديكالداندىرۋدىڭ تاعى ءبىر ماڭىزدى فاكتورى - تەرروريزمدى ينتەرنەت ارقىلى ناسيحاتتاۋ. ينتەرنەتتى قولدانۋشىلاردىڭ بەلسەندىلىگى تەرروريزم مەن ەكسترەميزم يدەولوگتەرىنىڭ ۇگىت-ناسيحات جۇمىسىن جۇرگىزۋگە جاعداي جاساپ وتىر. وكىنىشكە قاراي، ەڭ وسال جانە تەرروريستىك قاۋىپكە ءجيى ۇشىرايتىن سانات - جاستار. تەك بيىل عانا قازاقستاندا دەسترۋكتيۆتى قاۋىمداستىقتارداعى جاستار اراسىنان 80 مىڭعا جۋىق جەلى پايدالانۋشىسى انىقتالدى. ولاردىڭ ىشىندە 6 مىڭعا جۋىعى 18 جاسقا تولماعان. بۇل ماسەلەنى شەشۋ ءۇشىن شىۇ ەلدەرىندە تەرروريزمگە قارسى اقپاراتتىق-ناسيحاتتىق ءىس-قيمىل جۇمىسىن ودان ءارى جەتىلدىرە ءتۇسۋ قاجەت»،—دەدى ول.