اسەم قالا – الماتى: مەگاپوليستە فوتوبايقاۋ ءوتتى

الماتىنىڭ مادەني مۇراسىن دارىپتەۋ. وسى ماقساتتا مەگاپوليستە «اسەم قالا – الماتى» فوتوبايقاۋى ءوتتى، دەپ حابارلايدى Almaty.tv. قالالىق قوعامدىق دامۋ باسقارماسىنىڭ قوعامدىق دامۋ ورتالىعى ۇيىمداستىرعان ءىس-شاراعا 13 پەن 62 جاس ارالىعىنداعى 400-گە جۋىق ادام قاتىستى. ۇزدىك دەپ تانىلعان 20 فوتوسۋرەت كوشە بويىنا قويىلىپ، ساراپشىلار مەن ادىلقازىلار القاسى جەڭىمپازداردى ىرىكتەدى. بايقاۋ سۇيىكتى قالامىزدىڭ اسەم كەلبەتىن فوتوونەر ارقىلى كورسەتىپ قانا قويماي، تۋريستىك ورتالىق رەتىندە بەدەلىن ارتتىرۋدى كوزدەيدى. – تاڭداۋ پروتسەسى كەزىندە پلاگياتتار دا كەزدەستى. ينتەرنەتتەن ءبىر سۋرەتتى الىپ، بىرنەشە ادام جىبەرگەن. سوڭىندا 100 ادامنىڭ ىشىنەن فوتوسىن ىرىكتەۋ بارىسىندا كاسىبي فوتوگرافتىڭ كەڭەسىنە جۇگىندىك. ەسەپتەي كەلە، 20 بالا فينالعا شىقتى. قارجىلاي سىياقى بولعاندىقتان، وتە تياناقتى دايىندالۋ كەرەك بولدى، – دەدى فوتوبايقاۋ ۇيىمداستىرۋشىسى ماديار سارىباي. – بايقاۋدىڭ وتەتىنىن دوستارىم ايتتى. قاتىستىم، باسىندا قاتتى ءۇمىت بولعان جوق. بىراق ەكىنشى كەزەڭگە وتكەننەن كەيىن ءۇمىت پايدا بولدى. ءبىر ناتيجەسى شىعىپ قالار دەگەن ويمەن قاتىستىم، – دەدى فوتوبايقاۋعا قاتىسۋشى التىنبەك راحىمبەك.