تاشكەنتتەگى ونەركاسىپ قويماسىندا بولعان جارىلىس سالدارىنان 17 جاستاعى ءجاسوسپىرىم قازا تاۋىپ، 163 ادام جاراقات الدى. بۇل تۋرالى Gazeta.uz پورتالى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 24 ادام رەسپۋبليكالىق جەدەل مەديتسينالىق جاردەم عىلىمي ورتالىعى مەن ونىڭ تاشكەنت وبلىستىق فيليالىنا، قالالىق جەدەل جاردەم اۋرۋحاناسىنا، 1-ءشى رەسپۋبليكالىق جانە 1-ءشى قالالىق كلينيكالىق اۋرۋحاناعا، 1-ءشى پەرزەنتحاناعا جاتقىزىلعان.
ال قالعان 138 زارداپ شەككەندەرگە امبۋلاتورلىق كومەك كورسەتىلىپ، ۇيلەرىنە جىبەرىلگەن. 17 جاستاعى ءجاسوسپىرىمنىڭ ءوز پاتەرىندە قايتىس بولعانى تۋرالى اقپاراتتى دەنساۋلىق ساقتاۋ مينيسترلىگى راستادى.
قازىرگى ۋاقىتتا ستاتسيوناردا ەمدەلىپ جاتقان ناۋقاستاردىڭ اراسىندا اۋىر جاراقات العاندار جوق. ولاردىڭ دەنساۋلىقتارى قاناعاتتانارلىق. مەديتسينالىق كومەك كورسەتۋگە رەسپۋبليكامىزدىڭ جەتەكشى ماماندارى جۇمىلدىرىلدى، - دەپ حابارلادى ۆەدومستۆونىڭ ءباسپاسوز قىزمەتى.
سونداي-اق، جارىلىس تولقىنى كوپقاباتتى ۇيلەردەگى ونداعان پاتەردىڭ تەرەزەلەرىن سىندىرعان. كوپتەگەن تۇرعىندار كولىكتەرىنە ۇيىقتاۋعا ءماجبۇر بولعان. كەيبىر كولىكتەرگە زاقىم كەلگەن.
توتەنشە جاعدايلار مينيسترلىگى جارىلىس بولعان جەرگە 16 ءورت ءسوندىرۋ جانە قۇتقارۋ بريگاداسى مەن ءۇش باسپالداق كولىگى جىبەرىلگەنىن حابارلادى.
