1 قازان – حالىقارالىق قارتتار كۇنى. بۇل كۇندى بۇكىل الەم تويلاتۋدا.
قارتتار كۇنى 1990 جىلى 14 جەلتوقساندا بۇۇ باس اسسامبلەياسىندا رەسمي بەكىتىلگەن. بىرىككەن ۇلتتار ۇيىمى كەلتىرگەن دەرەككە سايكەس الەم بويىنشا جاسى 60-تان اسقان ازاماتتاردىڭ سانى 1 ميللياردتان اسادى ەكەن. ال بۇل كورسەتكىش 2050 جىلى 1,5 ميللياردقا جەتۋى مۇمكىن.
ال قازاقستاندا زەينەت جاسىنداعى تۇرعىنداردىڭ سانى 2,3 ميلليوننان استام. قولدانىستاعى زاڭعا سايكەس، قازاقستاندا ەرلەر 63 جاسىندا، ال ايەلدەر 2028 جىلعا دەيىن 61 جاسىندا زەينەتكە شىعاتىنىن ەسكە سالايىق.
قازاقستاندا قارتتارعا بىرقاتار قولداۋ كورسەتىلىپ كەلەدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، اتالمىش مەيرام اياسىندا استانا قالاسى، قاراعاندى، ماڭعىستاۋ، تۇركىستان، جەتىسۋ جانە ۇلىتاۋ وبلىستارىنداعى قارتتارعا 2-دەن 10 اەك مولشەرىندە 234 مىڭ قارياعا بىرجولعى ماتەريالدىق كومەك كورسەتىلگەن.
اعا ۇرپاقتىڭ قوعام ءومىرىنە قوسقان ۇلەسىنە شىنايى ريزاشىلىق ءبىلدىرىپ، قامقورلىق كورسەتەتىن ەرەكشە مەيىرىمگە تولى كۇن قارساڭىندا بىرقاتار وبلىستاردا دا شارالار ءوتىپ جاتىر. الماتى، شقو، جامبىل، تۇركىستان، اباي جانە ۇلىتاۋ وبلىستارىندا مەرەكەلىك ازىق-تۇلىك سەبەتتەرى تابىستالسا، قارتتاردى الەۋمەتتىك قولداۋعا شامامەن 4,6 ملرد تەڭگە باعىتتالعان.
"قارتى بار ەلدىڭ قازىناسى بار" دەپ بەكەر ايتىلماعان. قاريالاردىڭ كەۋدەسى – ءىشى تولى التىن ساندىق. ومىرلىك تاجىريبەسى مول، كوپتى كورگەن قاريالار ەل ىشىلىك، تۋىسارالىق، وتباسىلىق ۇلكەن داۋلاردى، ماسەلەلەردى شەشىپ، داۋدى ءوز اقىلىمەن توقتاتىپ وتىرعان.
سوندىقتان قارتتارىن قادىرلەگەن ەل ارداقتى ەكەنىن ەستەن شىعارمايىق!
