ەردوعان پالەستينا-يزرايل قانتوگىسىنىڭ الدىن الۋ قاجەتتىگىن ايتتى

تۇركيا پرەزيدەنتى رەجەپ تايىپ ەردوعان پالەستينا-يزرايل قاقتىعىس تاراپتارىن ماسەلەنى ءادىل بەيبىتشىلىك ورناتۋ ارقىلى شەشۋگە شاقىردى. بۇل تۋرالى تۇرىك باسشىسى انكارادا اۆستريا كانتسلەرى كارل نەحاممەرمەن كەزدەسۋدەن كەيىن وتكەن ءباسپاسوز ءماسليحاتىندا ايتتى، - دەپ حابارلايدى "ادىرنا" ءتىلشىسى haqqin.az سايتىنا سىلتەمە جاساپ. «ءادىل الەمدە جەڭىلگەندەر جوق» ۇرانىمەن ايماقتاعى بارلىق كۇشتى ويىنشىلاردى بەيبىتشىلىك ورناتۋ جاۋاپكەرشىلىگىن الۋعا شاقىرامىز... ءبىز قانتوگىستىڭ ارتۋىنا اكەلەتىن قادامداردان اۋلاق بولۋىمىز كەرەك»، - دەدى ەردوعان. تۇرىك كوشباسشىسى تاياۋ شىعىس ماسەلەسىن شەشۋ قاجەت ەكەنىن جانە «تۇپكىلىكتى شەشىم - استاناسى شىعىس يەرۋساليمدە بولاتىن تاۋەلسىز پالەستينا مەملەكەتىن قۇرۋ» دەپ كورسەتتى. ونىڭ ايتۋىنشا، انكارا ايماقتاعى قاقتىعىستىڭ شيەلەنىسىپ، ۇزاققا سوزىلۋىنان قاۋىپتەنەدى. ء"بىزدىڭ بۇل ماسەلەگە قاتىستى الاڭداۋشىلىعىمىز وتە، وتە جوعارى. مۇنىڭ ءبارى ءبىر-ەكى اپتانىڭ ىشىندە اياقتالاتىنىنا سەنىمدى ەمەسپىن. سوندىقتان ءبىز جۇمىستى جالعاستىرامىز، باسشىلارمەن بايلانىس جاسايمىز. ءبىز سوعىستى توقتاتۋ ءۇشىن مەدياتسيانىڭ شەشىمدەرىن ىزدەيمىز»، - دەدى تۇركيا پرەزيدەنتى. سونداي-اق ەردوعان «بولىپ جاتقان جايتقا تەك حاماس يسلام پارتياسىنىڭ كوزقاراسىمەن قاراۋعا بولمايدى» دەپ اتاپ ءوتتى. ونىڭ ايتۋىنشا، «ولاردىڭ شىعىنى 750 ادام، ەكى مىڭنان استامى جارالانعان». «يزرايل تاراپىنان شىعىن بار. بۇل مەن بۇرىن العان دەرەكتەر...»، - دەپ قوستى ول. تۇركيا پرەزيدەنتى سونداي-اق امەريكانىڭ ۇشاق تاسىعىشىنىڭ جەرورتا تەڭىزىنىڭ شىعىسىنا جىبەرىلۋىنىڭ وسى شەشىمنىڭ ماقساتىنا قاتىستى سۇراقتار تۋعىزاتىنىن ايتتى. "اقش-تىڭ ۇشاق تاسىعىشى يزرايلدە نە ىستەپ ءجۇر؟ نەلىكتەن ول جاققا بارادى؟ ول ءوزىنىڭ بارلىق ۇشاقتارىن، قايىقتارىن ۇشىرىپ، گازانى قورشاپ، ونى سوققىعا جىعىپ، وتە اۋىر جاپپاي ولىمگە جول اشادى ما؟" – دەدى ول بريفينگتە. پالەستينا-يزرايل قاقتىعىستارىنىڭ شيەلەنىسۋى سالدارىنان قازا تاپقان يزرايلدىك تۇرعىنداردىڭ سانى مىڭنان استى، دەپ حابارلادى سەيسەنبى كۇنى اقش-تاعى يزرايل ەلشىلىگى. پالەستينا دەنساۋلىق ساقتاۋ مينيسترلىگىنىڭ سوڭعى مالىمەتتەرى بويىنشا، ءيزرايلدىڭ گازا سەكتورىنا جاساعان سوققىلارىنان قازا تاپقاندار سانى 900-گە جەتتى.